རྒྱ་མཚོའི་ནང་ནས་ད་བར་གང་ཡང་རྙེད་མི་འདུག

དོཊ་ཡོད་མཚོ་ཁུལ་ནས་ད་བར་བོར་བརླག་ལ་སོང་བའི་གནམ་གྲུ་དང་འབྲེལ་བ་གང་ཡང་རྙེད་སོན་བྱུང་མེད་པ་ཨོ་སུ་ཀྲེར་ལེ་ཡའི་ཕྱོཊ་ནས་བཤད་འདུག
དེ་ཡང་གནས་ཚུལ་ལྟར་ན། ཟླ་༣པའི་ཚེས་༨ནས་འབྲེལ་ཐག་ཆད་པའི་མཱ་ལེ་ཞི་ཡའི་གནམ་གྲུ་དེ་མུ་མཐུད་འཚོལ་བཞིན་པ་དང་། ཉིན་ཤས་གོང་ཨོསུ་ཀྲེ་ལི་ཡའི་མི་བཟོས་སྲུང་སྐར་གྱིས་བར་སྣང་ནས་ཡུལ་དེའི་ལྷོ་ནུབ་ཁུལ་གྱི་རྒྱ་མཚོའི་ནང་གནམ་གྲུའི་ཆག་རོ་འདྲ་བའི་དངོས་པོ་ཆེན་པོ་གཉིས་ཡོད་པ་ཤེས་རྟོགས་བྱུང་བ་དང་། དེ་གང་ཡིན་འཚོལ་ཞིབ་ཆེད་ཨོས་ཀྲེ་ལི་ཡས་ཆེད་མངགས་འཚོལ་ཞིབ་མི་སྣ་བཏང་ནས་འཚོལ་བཞིན་ཡོད་ཀྱང་། ཡུལ་དེའི་སྲིད་བློན་Tony Abbotམཆོག་གིས་ད་བར་དོགས་ཡོད་རྒྱ་མཚོའི་ཁུལ་དེར་གར་སོང་ཆ་མེད་གྱུར་བའི་མ་ལེ་ཤི་ཡའི་གནམ་གྲུ་འཚོལ་ཞིབ་བྱས་ན་ཡང་དངོས་པོ་ངོ་རྟགས་བཟུང་ཐུབ་པ་དང་། གལ་འགངས་ཆེ་བའི་གནས་ཚུལ་གང་ཡང་འབྱོར་མ་བྱུང་། ཡིན་ན་ཡང་འཚོལ་ཞིབ་ལས་དོན་མུ་མཐུད་ནས་སྤེལ་རྒྱུ་ཡིན་ཅེས་དང་། ཡང་ཁོང་གིས་རྒྱ་མཚོའི་ཁུལ་གྱི་གནམ་གཤིས་ཡག་པོ་མེད་པ་མ་ཟད། མིས་བཟོས་སྲུང་སྐར་གྱིས་དངོས་པ་དེ་གཉིས་ངོ་རྟགས་བཟུང་ནས་ཉི་མ་ལྔ་ཕྱིན་ཚར་བས། ད་ལྟ་དངོས་པོ་དེ་དག་ས་གནས་རང་ལ་ཡོད་མེད་བཤད་དཀའ་བ་དང་། རྒྱ་མཚོའི་གཏིང་ལ་འཐིམ་ཡོད་སྲིད་ལ་ཡང་ན་ཐག་རིང་ལ་ཁུར་ཡོད་སྲིད་པ་ཡང་གསུངས་འདུག
མཱ་ལེ་ཤི་ཡའི་གནམ་གྲུ་ཨང་གྲངས་༣༧༠་འཁོད་པ་དེ་ཡུལ་དེའི་རྒྱལ་ས་ཀོ་ལ་ལམ་པུར་ནས་རྒྱ་ནག་གི་རྒྱལ་ས་པེ་ཅིན་ཕྱོཌ་སུ་འཕུར་བསྐྱོད་བྱས་པའི་ཆུ་ཚོད་ཁ་ཤས་རྗེས་སུ་གར་སོང་ཆ་མེད་དུ་གྱུར་ནས་ད་ཆ་བདུན་ཕྲག་གཉིས་མ་ཟིན་ཙམ་འགྲོ་བཞིན་པ་དང་། དེའི་ནང་འགྲུལ་བ་མི་གྲངས་༢༣༩་ཡོད་པ་དང་། དེ་ནི་ལོ་རྒྱུས་ཐོག་ཚོང་ལས་འགྲུལ་སྐྱེལ་གནམ་གྲུ་ཞིག་གར་སོང་མེད་པར་གྱུར་པའི་དུས་ཚོད་རིང་ཤོས་ཡིན་པ་རེད།
གསར་འགོད་པ་བསོད་ནམས་ལྷ་མོ།