ཉི་མ་གྲགས་པ་ལགས་ཀྱི་ཁ་ཆེམས་ཡིག་གེ་ཕྱི་ལ་ཐོན་པ།

རྒྱ་ནག་གིས་སྡུག་སྦྱོང་མནར་གཅོད་ཚད་མེད་བཏང་བ་འཁོད་པའི་ཉི་མ་གྲགས་པ་ལགས་ཀྱི་ཁ་ཆེམས་ཡིག་གེ་ཕྱི་ལ་ཐོན་འདུག
དེ་ཡང་ཕྱི་ལ་འབྱོར་བའི་ཁ་ཆེམས་ཡིག་གེ་ལྟར་ན། བོད་པའི་དགེ་འདུན་པ་དེ་ནི་ཁམས་རྟའུ་ནས་ཡིན་པ་གྲྭ་སྐེད་རི་ཉི་མ་གྲགས་པ་ལགས་ཡིན་པ་དང་། ཁོང་གིས་ཕྱི་ལོ་༡༩༨༨ནས་༡༩༩༩ བར་ཁྱོན་བསྡོམས་བོད་ལ་རང་བཙན་དགོས་པའི་སྦྱར་ཡིག་ཁག་བདུན་སྦྱར་ཞིང་། ཕྱི་ལོ་ ༢༠༠༠ ཐམ་པའི་ཕྱི་ཟླ་གསུམ་པའི་ཚེས་ ༢༢ ཡིན་ཁོང་ལྷ་སར་ཡོད་སྐབས་སྤྱི་བདེ་མི་སྣས་འཛིན་བཟུང་བྱས་ཡོད་པ་ཉེ་ཆར་གསར་དུ་ཐོན་པའི་ཤོག་ལྷེ་གསུམ་ཅན་གྱི་ཁ་ཆེམས་ཡི་གེའི་ནང་གསལ་འདུག སྐེད་རི་ཉི་མ་གྲགས་ལགས་ཀྱི་ཁ་ཆེམས་དེའི་ནང་ཁོང་ལ་ཉེན་རྟོག་པས་འདྲི་བརྩད་གང་ཡང་མ་བྱས་སྔོན་ནས་ཉེས་བརྡུང་ཚབས་ཆེ་བཏང་ཡོད་པ་གསལ་ཡོད་ལ། ལྷ་ས་ནས་དཀར་མཛེས་སུ་འཁྲིད་ནས་ལོ་དགུའི་བཙོན་འཇུག་གི་ཁྲིམས་ཐག་བཅད་ཅིང་། སྔ་རྗེས་བཙོན་ཁང་ནས་ཉེས་བརྡུང་དྲག་པོ་ཕོགས་པ་དང་། རྐང་པ་གཉིས་ཀ་བཅག་འདུག དེ་བཞིན་ཁོང་གིས་ཁ་ཆེམས་དེའི་ནང་། བོད་མི་ཚོས་རྒྱ་ནག་གིས་བོད་མི་ཚོར་བརྙས་བཅོས་ཚབས་ཆེན་ཁྲིམས་མེད་ལུགས་མེད་བྱེད་བཞིན་ཡོད་པ་ཤེས་པར་བྱས་སྟེ་ཚང་མས་རྡོག་རྩ་གཅིག་བསྒྲིལ་གྱིས་རྒྱ་ནག་ལ་ངོ་རྒོལ་བྱེད་དགོས་ཅེས་གསལ་འདུག ཉེས་རྡུང་འོག་ཁོང་གི་གཟུགས་གཞིའི་གནས་བབས་ཧ་ཅང་སྐྱོ་པོ་ཆགས་སྟེ་ཕྱི་ལོ་ ༢༠༠༣ ལོར་ཡ་ང་བའི་རང་བཞིན་གྱི་ཐོག་ནས་འདས་གྲོངས་སུ་གྱུར་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་སྐེད་རི་ཉི་མ་གྲགས་ལགས་ཀྱིས་བཞག་པའི་ཁ་ཆེམས་དེས་རྒྱ་ནག་གཞུང་གིས་དྲིལ་བསྒྲགས་ཇི་ཙམ་བྱས་མིན་ལ་མ་བལྟོས་པར་དོན་དངོས་བོད་མི་ཚོའི་འགྲོ་བ་མིའི་ཐོབ་ཐང་ཡོངས་སུ་རྡོག་རོལ་གཏོང་བཞིན་པ་གསལ་པོར་སྟོན་གྱི་ཡོད་པ་བརྗོད་འདུག
གསར་འགོད་པ་སྐལ་ལྡན་བློ་གྲོས།