སྐབས་བཅུ་བཞི་པའི་བོད་མི་མང་སྤྱི་འཐུས་ཚོཌ་དུས་དྲུག་པ་གྲོལ།

༄༅༎བཞུགས་སྒར་རྡ་རམ་ས་ལར་ཚོགས་པའི་སྐབས་བཅུ་བཞི་པའི་བོད་མི་དམངས་ཀྱི་གྲོས་ཚོགས་ཚོགས་དུས་དྲུག་པ་དེ་རེས་གཟའ་མིག་དམར་ཉིན་མཇུག་སྒྲིལ་བ་དང་ཉིན་གྲངས་བརྒྱད་རིང་ཚོགས་པའི་ཚོགས་དུས་དེའི་རིང་ལ་གྲོས་ཚོགས་ཀྱི་འཐུས་མི་ཚོས་བོད་ཀྱི་གནད་དོན་ཞི་བའི་ཐོག་སེལ་ཐབས་བྱ་རྒྱུའི་ཐད་སྔར་བས་འབད་བརྩོན་བྱ་ཕྱོགས་སྐོར་བཀའ་བསྡུར་ལྷུག་པོ་གནང་ཡོད་པ་རེད།

བོད་མི་དམངས་ཀྱི་སྤྱི་འཐུས་ཚོགས་གཙོ་སྐུ་ཞབས་ཀརྨ་ཆོས་འཕེལ་ལགས་ཀྱིས་ཚོགས་འདུ་མཇུག་སྒྲིལ་བའི་གསུང་བཤད་ནང༌། འདི་ལོ་ཕྱི་ཟླ གསུམ་པའི་ཚེས་བཅུ་བོད་མིའི་རང་དབང་སྒེར་ལངས་ཉི་མོ་ནས་བཟུང་རྒྱ་ནག་གཞུང་གིས་བོད་ནང་དམ་བསྒྲགས་བྱེད་པའི་ཛ་དྲག་གི་གནས་སྟངས་དེ་བཞིན་འཕྲལ་དུ་ཞི་བའི་ཐོག་ནས་སེལ་ཐབས་ཀྱི་ཆེད་དུ་རྒྱལ་སྤྱིའི་རྒྱབ་སྐྱོར་ཐོབ་ཐབས་འབད་བརྩོན་གནང་བའི་ལས་དོན་གྱི་བརྒྱུད་རིམ་ངོ་སྤྲོད་གནང་བ་དང་དེ་ཡང་སྦེལ་ཇེམ་གྱི་རྒྱལ་ས་སྦ་ར་སེལ་སེ་ནང་ཡོད་པའི་ཡོ་རོབ་གྲོས་ཚོགས་དང་དེ་བཞིན་སུད་སི་གྲོང་ཁྱེར་ཇི་ནི་ལྦ་དུ་ཡོད་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སོགས་རྒྱལ་སྤྱིའི་གླེང་སྟེགས་ཐོག་བོད་ནང་གི་ཛ་དྲག་གི་གནད་དོན་ལ་རྒྱབ་སྐྱོར་ཡོང་བའི་འབོད་སྐུལ་ཞུས་པ་མ་ཟད། དབྱིན་ཇིའི་གྲོས་ཚོགས་ཀྱི་འཐུས་མི་དང་བོད་མི་དམངས་གྲོས་ཚོགས་ཀྱི་འཐུས་མིའི་བར་ལ་བོད་དོན་གོ་རྟོགས་སྤེལ་རེས་གནང་བ་ཧ་ཅང་གི་ཡག་པོ་བྱུང་བ་སོགས་བོད་མིའི་གྲོས་ཚོགས་ཀྱི་ཐོག་ནས་གཙོ་བོ་ཆ་ཤས་རྒྱལ་སྤྱིའི་གླེང་སྟེགས་དེ་དག་ཐོག་བོད་ཀྱི་ཛ་དྲག་གི་གནད་དོན་གོ་རྟོགས་སྤེལ་བ་བརྒྱུད་འཛམ་གླིང་གི་རྒྱལ་ཁབ་ཁག་གི་གྲོས་ཚོགས་ཀྱི་རྒྱབ་སྐྱོར་ཐོབ་ཐབས་དམིགས་བསལ་གྱི་འབད་བརྩོན་གནང་བའི་སྐོར་གསུང་ཡོད་པ་རེད། ལྷག་པར་དུ་བོད་ནང་གི་ཛ་དྲག་གི་གནད་དོན་ཐད་ལ་དམིགས་བསལ་གྱི་ཚོགས་ཆེན་ཕྱི་ཟླ་བཅུ་གཅིག་པའི་སྐོང་ཚོགས་གནང་རྒྱུའི་ཐུགས་གཏན་འཁེལ་བ་བཞིན་ཚོགས་ཆེན་དེའི་ཐོག་ལ་བོད་མིའི་གཞིས་ཆགས་ཁག་དང་བདེ་དོན་ལས་ཁང་ཁག་ས་གནས་གྲོས་ཚོགས་ཀྱི་འཐུས་མི། བོད་རང་དབང་ལྡན་པའི་ཚོགས་ཆུང་སོགས་མཉམ་ཞུགས་གནང་རྒྱུ་ཡིན་པ་གསུང་ཡོད་པ་རེད།