༸གོང་ས་མཆོག་གི་སྐུ་པར་བདག་ཉར་བྱས་པར་ཉེས་འཛུགས་ཀྱིས་བོད་མི་༦༠ཙམ་བཀག་ཉར།

རྒྱ་ནག་གཞུང་གི་དབྱེ་བས་ཟི་ཁྲོན་ཞིང་ཆེན་དཀར་མཛེས་བོད་རིགས་རང་ཁུལ་སེར་ཤུལ་རྫོང་རྫ་ཆུ་ཁ་རྫ་སྨད་དབོན་ཁུལ་དུ་ཟླ་བ་འདིའི་ཕྱི་ཚེས་༢༢་ཉིན་གྱི་སྔ་དགོང་གཉིས་ཀྱི་དུས་སུ་རྒྱ་མིའི་དམག་མི་ཕོན་ཆེ་ཞིག་རླངས་འཁོར་མང་པོའི་ནང་འབྱོར་ཏེ་ཡུལ་དགོན་གཉིས་ཀྱི་གྲྭ་ཤག་དང་། ཁྱིམ་ཚང་གི་ནང་བརྔོག་བཤེར་སོགས་བྱེད་པའི་སྐབས་༧གོང་ས་མཆོག་གི་སྐུ་པར་སོགས་ཐོན་པའི་ནག་ཉེས་འོག་དབོན་པོ་དགོན་པའི་དགེ་འདུན་པ་༡༩དང་།  མི་སྐྱ་༤༠ཙམ་ཞིག་བཅས་ཁྱོན་སྔ་རྗེས་བོད་མི་སྐྱ་སེར་གྲངས་༦༠ཙམ་ཞིག་རྒྱ་ནག་དམག་མིས་འཛིན་བཟུང་བཙན་འཁྲིད་ཀྱི་སེར་ཤུལ་རྫོང་ཐོག་ཏུ་བཀག་ཉར་བྱས་ཡོད་པའི་སྐོར་བཙན་བྱོལ་ནང་ཡོད་པའི་མཚན་འདོན་གནང་འདོད་མེད་པའི་བོད་མི་ཞིག་གིས་འདི་གའི་གསར་འགོད་པར་འགྲེལ་བརྗོད་གནང་བྱུང་།

གོང་ཞུས་བོད་མི་འཛིན་བཟུང་བྱས་པའི་ཁྲོད་འདི་ལོ་ཕྱི་ཟླ་༣པའི་ནང་རྫ་ཆུ་ཁ་དབོན་པོ་ཁུལ་དུ་རྒྱ་གཞུང་གི་དམག་མི་ཕོན་ཆེ་འབྱོར་ཏེ་དབོན་པོ་ཡུལ་དགོན་གཉིས་ཀྱི་ནང་དམ་དྲག་ཤུགས་ཆེ་བྱེད་པ་མ་ཟད། སྐབས་དེར་བོད་མིའི་སྡོད་ཁང་བརྔོག་བཤེར་བྱེད་སྐབས་༸གོང་ས་མཆོག་གི་སྐུ་པར་ཐོན་པའི་ཁྱིམ་ཚང་གི་མིང་ཐོ་ཐོ་བཀོད་བྱས་པ་ཁག་ཀྱང་ད་ལན་འཛིན་བཟུང་བྱེད་ཡོད་པ་མ་ཟད། འདི་ཚེས་༢༥ཉིན་རྒྱ་གཞུང་གིས་ས་གནས་བོད་མི་རང་ལོ་༡༨ཡན་འཛོམས་དགོས་པ་དང་གལ་སྲིད་མ་འཛོམས་པ་ཡིན་ན་ཉེས་ཆད་གཅོད་རྒྱུ་ཡིན་པའི་གསལ་བསྒྲགས་སྤེལ་ཏེ་མི་མང་ཚོགས་ཆེན་ཞིག་འདུ་བསྐོང་བྱས་འདུག སྐབས་དེར་གཙོ་བོ་མང་ཚོགས་ལ་༸གོང་ས་མཆོག་གི་སྐུ་པར་སྒྲིག་གཤོམ་གི་བདག་ཉར་མི་ཆོག་པ་དང་ཁ་པར་ནང་ནས་གནས་ཚུལ་སོགས་བཏང་མི་ཆོག་པའི་བཙན་བཀའ་བཏང་ཡོད་པ་རེད་འདུག

རྫ་སྨད་གྲོང་རྡལ་གྱི་ཁྱབ་ཁོངས་ཡུལ་ཚོ་ལྔ་ནས་དྲུག་བར་ཡོད་པ་དང་དེའི་ནང་ནས་དབོན་པོ་ཡུལ་ཚོའི་ནང་རུ་ཁག་ཁག་ཅིག་ཡོད་པ་ལས་འདི་ཚེས་༢༥་ཉིན་རུ་ཁག་དང་པོ་ནས་བཟུང་རྒྱ་མིའི་དམག་མི་ཚོས་བོད་མིའི་ཁྱིམ་ཚང་བརྔོག་བཤེར་གྱིས་༧གོང་ས་མཆོག་གི་སྐུ་པར་ཡོད་མེད་ཞིབ་བཤེར་བྱེད་པ་དང་།  ཁ་པར་ནང་ཕྱི་ཕྱོགས་ལ་འབྲེལ་བ་བྱས་ཡོད་མིན་རྟོག་ཞིབ་བྱེད་འགོ་བཙུགས་ཡོད་སྐོར་གནས་ཚུལ་ངོ་སྤྲོད་པ་དེས་མུ་མཐུད་འགྲེལ་བརྗོད་གནང་བྱུང་།

ཁོང་གིས་མུ་མཐུད་གསུང་ན། གནས་ཚུལ་དེ་འབྱུང་རྐྱེན་གཙོ་བོ་ནི་དེ་སྔོན་རྒྱ་གཞུང་གི་རྫ་ཆུ་ཁ་དབོན་པའི་ཁུལ་དུ་འབྲོག་པ་གྲོང་རྡལ་ཅན་དུ་འགྱུར་པའི་སྲིད་བྱུས་ལག་བསྟར་བྱས་པའི་རྒྱུ་མཚན་གྱིས་བོད་མི་རྣམས་ལ་དཀའ་ངལ་འདྲ་མིན་སྣ་ཚོགས་འཕྲད་པ་མ་ཟད་བོད་མི་རྣམས་བཙན་ཤེད་ཀྱིས་ཏཱ་ལའི་རུ་ཚོགས་ལ་ངོ་རྒོལ་གྱི་ཀྲུང་གོ་གུང་ཁྲན་ཏང་གི་བཀྲིན་བསམ་ཤེས་དགོས་པ་སོགས་བོད་མི་རྣམས་ཀྱི་ཐོག་མི་འདོད་བཞིན་དུ་ལས་འགུལ་འདྲ་མིན་སྤེལ་བར་བརྟེན་ཕྱི་ལོ་༢༠༡༩ས་ཁུལ་དེར་བོད་མི་ཁག་ཅིག་གིས་བོད་དོན་ཆེད་ཡིག་ཆ་འགྲེམས་སྤེལ་བྱས་པའི་རྐྱེན་གྱིས་བོད་མི་མང་པོ་འཛིན་བཟུང་བྱས་པ་མ་ཟད། ད་ལྟའི་ཆར་ཡང་བོད་མི་བཞི་ནས་ལྔ་བར་དར་རྩེ་མདོར་ཕྱོགས་སུ་བཀག་ཉར་བྱེད་པའི་ཐོག་དེ་སྔོན་དབོན་པོ་དགོན་པའི་གྲྭ་རྟ་མེ་ལ་རྒྱ་ནག་གི་དམག་མིས་གཅར་རྡུང་མནར་སྤྱོད་འོག་འདས་གྲོངས་སུ་ཕྱིན་པ་དང་།  དེ་རྗེས་འདི་ལོ་ཕྱི་ཟླ་གསུམ་པའི་ནང་རྒྱ་མི་ཕོན་ཆེ་འགྲེམས་འཇོག་གི་དབོན་པོ་སྡེ་པའི་ཡུལ་དགོན་གཉིས་ཀྱི་བོད་མི་སེར་སྐྱ་མི་མང་རྣམས་ལ་དམ་དྲག་ཤུགས་ཆེ་བྱས་པ་སོགས་ལ་བརྟེན་ནས་བྱུང་བ་ཞིག་ཡིན་པ་གོང་ཞུས་གནས་ཚུལ་ངོ་སྤྲོད་པས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།།

གསར་འགོད་པ། པདྨ་དངོས་གྲུབ།

རྩོམ་སྒྲིག་པ། འབེན་པ་སྟོབས་རྒྱལ།

དྲ་ཐོག་རྩོམ་སྒྲིག་པ། དཔལ་ལྡན་རྒྱལ།

དྲ་ཐོག་སྤེལ་མཁན། པ་སངས་དོན་ལྡན།