རྒྱ་མ་ཤང་གི་དུད་ཁྱིམ་༢༠༠ལྷག་བཙན་གྱིས་གནས་སྤོ་བཅུག་འདུག

རྒྱ་མ་ཤང་ལ་གཅིག་གྱུར་གྱིས་སྐྲུན་པའི་གཞིས་ཆགས་ཁང་པ། ༢༠༡༤།༩

གནས་སྤོ་བྱས་བས་ས་གནས་བོད་མི་ཚོར་ལུས་སེམས་གཉིས་ཀྱི་དཀའ་ངལ་ཡོད་པ་དང་མ་འོངས་བར་འཚོ་བའི་རྟེན་ས་མེད་པར་གྱུར་ཡོད་འདུག
འདི་ག་རླུང་འཕྲིན་ཁང་ལ་གནས་ཚུལ་འབྱོར་གསལ་ལྟར་ན། རྒྱུན་རིང་ནས་མལ་གྲོ་གུང་དཀར་རྒྱ་མ་ཤང་ནས་རྒྱ་ནག་གི་གཏེར་བཏོན་ཚོང་གཉེར་ཚན་པས་གཏེར་ཁ་སྔོག་ནས་ཡོད་པ་དང་། ས་གནས་ཀྱི་མང་ཚོགས་ལ་དཀའ་ངལ་དུ་མ་འཕྲད་བཞིན་ཡོད་པའི་ཐོག་སྤྱི་ཟླ་༩ཚེས་༡༢ཉིན་རྒྱ་མ་ཤང་ཁོངས་སུ་ཡོད་པའི་གྲོང་ཚོ་བཞིའི་ཁྱིམ་དུད་༢༠༠ལྷག་ཙམ་ཞིག་བཙན་ཤེད་ངང་གཅིག་གྱུར་གྱིས་སྐྲུན་པའི་གཞིས་ཆགས་ཁང་པའི་ནང་སྤོ་བཅུག་ཡོད་འདུག གནས་ཚུལ་ངོ་སྤྲོད་པས་བརྗོད་དོན། རྒྱ་མ་ཤང་གི་གྲོང་ཚོའི་བཞིའི་མང་ཚོགས་ཚོ་འབྲོག་པ་ཡིན་ཞིང་གཏེར་བཏོན་ཚན་པ་ནས་གལ་ཏེ་གནས་སྤོས་མ་བྱས་ཚེ་ཁང་པ་བཤིག་རྒྱུ་ཡིན་པ་བརྗོད་དེ་རང་དབང་མེད་པར་རང་ཁྱིམ་ནས་གནས་སྤོ་བྱ་དགོས་བྱུང་འདུག སྐབས་དེ་དུས་གྲོང་ཚོ་བཞིའི་འབྲོག་པ་མང་ཚོགས་ནས་ཞུ་འབོད་བྱས་སྐབས་མལ་གྲོ་གུང་དཀར་རྫོང་ནས་མཚོན་ཆ་ཐོགས་པའི་དྲག་ཆས་ཉེན་རྟོག་པ་དང་ལྕགས་ཁྲབ་མོ་ཊ་སླེབས་ཏེ་མི་༢༠ཙམ་འཛིན་བཟུང་བྱས་ཐོག་ད་དུང་ལས་བྱེད་པ་མངགས་གཏོང་གིས་གནས་ཚུལ་ཕྱི་ལ་བཤད་མི་ཆོག་པ་བརྗོད་འདུག ཡང་འཛིན་བཟུང་བྱས་པའི་མི་སྣ་མལ་གྲོ་གུང་དཀར་གྱི་བཀག་ཉར་ཁང་དུ་བཅུག་པ་མ་ཟད། ཉེས་རྡུང་དྲག་པོ་བཏང་ཡོད་ལ། གཟའ་འཁོར་གཅིག་རྗེས་མི་ཉི་ཤུ་ལྷག་ཙམ་གློད་བཀྲོལ་ཐོབ་ན་ཡང་ཉེས་རྡུང་གི་རྐྱེན་སྨན་ཁང་དུ་སྐྱོད་དགོས་བྱུང་འདུག་ལ། གྲོང་ཚོའི་འགོ་ཁྲིད་བསམ་གཏན་ཟེར་བ་ཞིག་ད་ལྟ་ཀློད་གྲོལ་ཐོབ་མིན་དང་། ཡང་ན་ཉེས་ཆད་ཇི་ཙམ་བཏང་མིན་ཤེས་རྟོགས་མི་འདུག     
གཏེར་བཏོན་ཚན་པ་ནས་གཞིས་ཆགས་བྱ་ཡུལ་ཁང་པ་གསར་རྒྱག་བྱས་ཡོད་ན་ཡང་འབྲོག་པ་ཚོར་ས་ཆ་མེད་པའི་ཐོག་ཕྱུག་རིགས་འཚོ་ས་མེད་པ་དང་། མ་འོངས་བར་འཚོ་བའི་རྟེན་ས་མེད་པར་གྱུར་ཡོད་འདུག་ལ། ད་ཐེངས་བོད་མི་ཚོས་ཞུ་འབོད་བྱས་པའི་སྐབས་ཁྱིམ་ཚང་༢༠༠ལྷག་ཙམ་གྱིས་དེ་སྔ་བོད་ཀྱི་ju longཟངས་གཏེར་ཚོང་གཉེར་ཁང་ནས་ཁས་ལེན་བྱས་པ་ཁག་ལག་ལེན་བསྟར་དགོས་པ་བརྗོད་ཡོད་ཅིང་། དེའི་ནང་༢༠༡༠ལོར་ཁས་ལེན་བྱས་པའི་༢༠༡༣་ལོ་ནས་མ་འོངས་ལོ་༥༠ནང་མི་རེར་ལོ་ལྟར་སྒོར་༩༠༠༠སྤྲོད་རྒྱུ་དང་། རྒས་ཁོག་དང་ཕྲུ་གུར་ལྟ་རྟོགས་བྱ་རྒྱུ། གཞོན་སྐྱེས་ལ་ལས་ཀ་སྤྲོད་རྒྱུ་སོགས་ལག་བསྟར་དགོས་པ་བརྗོད་ཡོད། ཤེས་རྟོགས་བྱུང་བར་གཞིགས་ན། གཞོན་སྐྱེས་ལ་ལས་ཀ་སྤྲོད་ཕྱོགས་ཐད་བོད་པས་གཏེར་རྡོ་མོ་ཊ་གཅིག་དབོར་བར་སྒོར་༧༠དང་རྒྱ་མིར་སྒོར་༤༠༠སྤྲད་ཀྱི་ཡོད་འདུག

གསར་འགོད་པ་སྒྲོལ་དཀར།