ཧོང་ཀོང་ནང་གསུམ་བཅུའི་དུས་དྲན་གྱི་ལས་འགུལ་སྤེལ་རྒྱུ།

ད་ལོར་ཐེ་ཝན་དང་ཧོང་ཀོང་ནང་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་གྱི་བོད་དོན་ལས་འགུལ་སྤེལ་རྒྱུ་ཡིན་འདུག
དེ་ཡང་དེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་བཀོད་པར་གཞིགས་ན། ཐེ་ཝན་སྐུ་ཚབ་དོན་གཅོད་ཁང་དང་། ས་གནས་བོད་རིགས་ཚོགས་པ། བོད་དོན་རྒྱབ་སྐྱོར་ཚོགས་པ་བཅས་ཀྱིས་གོ་བསྒྲིགས་འོག་འདི་ལོའི་གསུམ་བཅུའི་དུས་དྲན་དེ་བཞིན་ཐེ་ཝན་གྱི་རྒྱལ་ས་ཐེ་པེ་དང་། གྲོང་ཁྱེར་ཀའོ་ཤུང་ཙམ་དུ་མ་ཟད། ཧོང་ཀོང་ནང་ལའང་སྲུང་བརྩི་ཞུ་རྒྱུ་དང་གཞི་རྒྱ་ཆེ་བའི་བོད་དོན་ལས་འགུལ་སྤེལ་རྒྱུ་ཡིན་འདུག
གོང་གསལ་ས་གནས་ཁག་གསུམ་ནང་ཡོད་པའི་བོད་དོན་རྒྱབ་སྐྱོར་ཚོགས་པས་དུས་མཚུངས་སུ་ལས་འགུལ་སྤེལ་རྒྱུ་མ་ཟད། ཐེ་པེ་གྲོང་ཁྱེར་གྱི་ཐང་ཆེན་དུ་ཀའོ་ཤུང་དང་ཧོང་ཀོང་ནང་གི་ལས་འགུལ་སྤེལ་བ་རྣམས་ཐད་ཀར་རྒྱང་བསྲིང་བྱེད་རྒྱུ་ཡིན་འདུག ཐེ་ཝན་བོད་རིགས་བདེ་དོན་ཚོགས་པ་གཙོས་པའི་གཞུང་འབྲེལ་མིན་པའི་ཚོགས་པ་མང་པོ་ཞིག་གིས་ཀྱང་སྤྱི་ལོ༢༠༡༥་ལོའི་ཟླ་༣་ཚེས་༡༠་ཉིན་གསུམ་བཅུའི་དུས་དྲན་གྱི་ལས་འགུལ་གཞི་རྒྱ་ཆེན་པོ་སྤེལ་རྒྱུ་ཡིན་འདུག
ཐེངས་འདིའི་ལས་འགུལ་ནང་མང་ཚོགས་གང་མང་མཉམ་ཞུགས་ཡོང་བའི་དོན་དུ་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ཕྱི་ཚེས་༩་ཉིན་ཀའོ་ཤུང་ཁུལ་གྱི་སློབ་ཕྲུག་དང་བོད་དོན་རྒྱབ་སྐྱོར་བ་རྣམས་ལ་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་ངོ་སྤྲོད་གནང་བ་མ་ཟད། བདུན་ཕྲུག་འདིའི་ནང་ཐེ་ཝན་མང་ཚོགས་ལ་བོད་དོན་དང་འབྲེལ་བའི་གོ་རྟོགས་རྒྱ་ཆེ་སྤེལ་གནང་རྒྱུ་རེད་འདུག

གསར་འགོད་པ་འཇམ་དཔལ་ཕུན་ཚོགས།