ຜູ້ປະສານງານຮັບໃຊ້ ກິລາຊີເກັມສ ຍັງຂ້ອງໃຈໃນໜ້າທີ່

ເມື່ອວັນທີ 18ພຶສຈິກາຜ່ານມາ ທີ່ຫໍວັທນະທັມແຫ່ງຊາດ ໃນນະຄອນຫລວງວຽງຈັນ ບັນດາຜູ້ປະສານງານ ແລະ ອາສາສມັກໄດ້ຣາຍງານ ເຖິງຄວາມພ້ອມຂອງຕົນ ຕໍ່ຄນະກັມມະການ ຈັດງານຊີເກັມສຄັ້ງທີ25. ພ້ອມດຽວກັນກໍວ່າ ຄົງເປັນການຍາກທີ່ ພວກຕົນຈະເຮັດໃຫ້ແຂກ ແລະ ຄນະນັກກິລາທັງ11ປະເທດ ມີຄວາມປະທັບໃຈ ໃນການບໍຣິການຂອງພວກຕົນ ແລະ ສເນີໃຫ້ຄະນະຮັບຜິດຊອບ ແກ້ໃຂບັນຫານີ້ໂດຍດ່ວນ.

ເມື່ອໄດ້ຮັບຟັງ ການລາຍງານແລ້ວ ທ່ານສົມສວາດ ເລັ່ງສວັດ ປະທານຄນະກັມມະການ ຈັດງານໄດ້ແນະນໍາວ່າ ຄນະກັມມະການ ຮັບຜິດຊອບວຽກງານນີ້ ຕ້ອງຮີບຈັດຕັ້ງ ການຝຶກອົບຮົມ ແກ່ອາສາສມັກເລົ່ານີ້ ເລີ່ມແຕ່ວັນທີ 19ພຶສຈິກາ ໄປຈົນຮອດວັນໄຂ ງານຊີເກັມສ ໂດຍແນະນໍາຢ່າງ ລະອຽດ ກ່ຽວກັບໜ້າທີ່ ຂອງແຕ່ລະຄົນ.  ພ້ອມກັນນັ້ນທ່ານກໍ ແນະນໍາໃຫ້ພວກເຂົາເຈົ້າ ຊອກຮູ້ກ່ຽວກັບວັທນະທັມ ຮີດຄອງປະເພນີ ແລະນິສັຍໃຈຄໍ ຂອງແຂກ ແຕ່ລະປະເທດທີ່ຕົນ ຮັບຜິດຊອບ ເພື່ອໃຫ້ເປັນພື້ນຖານ ແລະຈະເປັນຜົລດີ ໃນການເຮັດວຽກຮ່ວມກັນ ຣະຫວ່າງແຂກແລະເຈົ້າພາບ ຕລອດລະຍະການຈັດງານ.

ການຈັດງານຊີເກັມສ ຄັ້ງທີ25 ເປັນຄັ້ງປວັດສາດ ທີ່ລາວໄດ້ເປັນເຈົ້າພາບ  ຕ້ອງໃຫ້ຄວາມສໍາຄັນ ອັນດັບນຶ່ງ ແລະ ຫລີກເວັ້ນການຈັດງານ ອຶ່ນໆຄຽງຄູ່ກັບງານນີ້

ທ່ານສົມສວາດ ກ່າວ.