ກັມມາທິການແມ່ນໍ້າຂອງ ຕົກລົງຮ່ວມມືກັນ

ບັນດາສີ່ປະເທດ ໃນລຸ່ມແມ່ນ້ຳຂອງ ໄດ້ຕົກລົງກັນ ໃນມື້ວັນຈັນ ທີ 5 ເມສາ 2010 ວ່າຈະເພີ້ມການ ຮ່ວມມືໃນການ ປົກປັກຮັກສາ ແລະ ສົ່ງເສີມ ສາຍແມ່ນ້ຳຂອງນີ້.
ຜູ້ນຳຈາກ ສີ່ປະເທດຊຶ່ງ ເປັນສະມາຊິກ ຂອງຄະນະກັມມາທິການ ແມ່ນ້ຳຂອງ ຫລື MRC ໄດ້ແກ່ ກໍາ ພູຊາ, ລາວ, ໄທ ແລະວຽດນາມ ໄດ້ຈັດກອງປະຊຸມ ທີ່ໃຊ້ເວລາ ນຶ່ງວັນ ເພື່ອປຶກສາຫາລື ກ່ຽວກັບ ສະພາບການປ່ຽນແປງ ຂອງດິນຟ້າອາກາດ ແລະ ການທ້າທາຍອື່ນໆ ຕໍ່ສະພາບຂອງ ແມ່ນ້ຳຂອງ ທີ່ເປັນແຫລ່ງໃຫ້ ວຽກງານ ແລະ ລ້ຽງປະຊາກອນ ປະມານ 65 ລ້ານຄົນໃນ 6 ປະເທດ. ນາຍົກຣັຖມົນຕຣີ ໄທ ທ່ານ ອະພິສິດ ເວຊາຊີວະ ກ່າວໃນກອງປະຊຸມ ໃນຕອນນຶ່ງວ່າ:

"ທ່ານຮູ້ສຶກເປັນກຽດ ທີ່ໄດ້ສເນີ ຖະແຫລງການຮ່ວມ ໂດຍຫຍໍ້ຂອງກອງ ປະຊຸມສຸດຍອດ ຄັ້ງທຳອິດ ຂອງຄະນະກັມມາທິການ ແມ່ນ້ຳຂອງ MRC ຊຶ່ງຈະມີຊື່ວ່າ ຖະແຫລງການ MRC ຫົວຫີນ".

ກອງປະຊຸມຄັ້ງນີ້ ໄດ້ມີປະເທດ ສະມາຊິກ ຄະນະກັມມາທິການ ແມ່ນ້ຳຂອງ MRC ແລະ ປະເທດຄູ່ ເຈຣະຈາ ຮວມທັງຈີນ ແລະ ພະມ້າເຂົ້າຮ່ວມ. ບັນຫາທີ່ສຳຄັນ ໃນກອງປະຊຸມ ກໍແມ່ນ ລະດັບນ້ຳ ໃນແມ່ນ້ຳຂອງ ທີ່ບົກແຫ້ງຫລາຍ ທີ່ສຸດ ພາຍໃນຮອບ 20 ປີ.

ນັກເຄື່ອນໄຫວ ດ້ານສິ່ງແວດລ້ອມ ອອກຄວາມເຫັນວ່າ ຍ້ອນເຂື່ອນໃນ ຈີນ ທີ່ກັກຕັນນ້ຳ ຊື່ງກຳລັງນຳ ຄວາມຫາຍຍະນະ ມາສູ່ ຊາວກະສິກອນ, ຊາວປະໂມງ ແລະ ລະບົບນິເວດວິທຍາ ໂດຍທົ່ວໆໄປ.

ນັກວິທຍາສາດ ຂອງ MRC ຊ້ຳພັດກ່າວວ່າ ລະດັບນ້ຳໃນ ແມ່ນໍ້າຂອງປີນີ້ ຕໍ່າທີ່ສຸດກໍ ເພາະວ່າ ລະດູຝົນ ໃນປີ 2009 ນັ້ນສັ້ນ ຝົນກໍຕົກໜ້ອຍ ປະຣິມານນໍ້າຝົນ ຈື່ງບໍ່ພຽງພໍ.