ສິທທິມະນຸສຍະຊົນໄທຽ ຂໍຄໍາແຈ້ງຂາວ ໃນການສົ່ງມົ້ງກັບ

ທາງຄນະກັມມະກາຣດ້ານ ສິທທິມະນຸສຍະຊົນໄທຽ ກຳລັງ ພິຈາຣະນາ ກັບຫລາຍຝ່າຍ ແລະ ຈະເຊີນຕົນແທນ ຂອງກອງທັພໄທຽ ກັບສະພາຄວາມໝັ້ນຄົງ ແຫ່ງຊາຕຂອງໄທຽ ມາອະທິບາຍ ຢ່າງກະຈ່າງແຈ້ງ ເຖິງສາເຫຕທີ່ຕ້ອງ ໄດ້ຈັດສົ່ງ ຊາວມົ້ງລາວ ທັ້ງໝົດ ໃຫ້ກັບທາງກາຣ ສປປລາວ ໃນທ້າຍເດືອນທັນວາ 2009 ຜ່ານມານີ້.

ພ້ອມດຽວກັນ ກໍໝັ້ນໃຈວ່າ ທາງກາຣລາວ ກໍຈະເປີດໃຫ້ນາໆຊາຕ ເຂົ້າໄປຢ້ຽມຢາມ ຊາວມົ້ງລາວ ທີ່ທາງກາຣໄທຽ ໄດ້ສົ່ງມອບໃຫ້ນັ້ນ ດັ່ງເຈົ້າໜ້າທີ່ ຄນະກັມມະກາຣ ສິທທິມະນຸສຍະຊົນ ແຫ່ງຊາຕໄທຽ ຜູ້ໜຶ່ງກ່າວວ່າ:

ຍານາງວ່າ:“ທາງກັມກາຣດ້ານ ສິທທິມະນຸສ ກຳລັງ ພິຈາຣະນາວ່າ ຂໍ້ມູລທີ່ໄດ້ຮັບນັ້ນ ເຊື່ອຖືໄດ້ຂນາດໃດ ແລະວ່າ ທາງຄນະກັມມະກາຣ ກໍຈະມີໜັງສືເຊີນ ທາງທະຫາຣ ເພື່ອຈະໄດ້ ສອບຖາມຕື່ມອີກ…”.

ພ້ອມດຽວກັນນັ້ນ ຍານາງກໍວ່າ ທາງຄນະກັມມະກາຣ ກໍໄດ້ຕິດຕໍ່ໄປຍັງ ທາງສະພາຄວາມໝັ້ນຄົງ ແຫ່ງຊາຕຂອງໄທຽ ໃຫ້ຊ່ວຍຕິດຕໍ່ໄປຍັງ ທາງພາກສ່ວນກ່ຽວຂ້ອງ ຂອງລາວ ເພື່ອໃຫ້ອະນຸຍາຕ ໃຫ້ທາງອົງກາຣນາໆຊາຕ ເຂົ້າໄປກວດເບິ່ງ ຊາວມົ້ງລາວ ທີ່ທາງຝ່າຍໄທຽ ໄດ້ສົ່ງຄືນນັ້ນ ວ່າເຂົາເຈົ້າໃຊ້ ຊີວີຕກາຣເປັນຢູ່ ຢ່າງໃດແທ້ ແຕ່ກໍຍັງບໍ່ທັນໄດ້ຮັບ ຄຳຕອບ ແຕ່ຢ່າງໃດເທື່ອ ໃນປັຈຈຸບັນນີ້.