ແມ່ ມາລາວ ຟັງຄະດີ ລູກສາວ

ນາງ Jane Orobator ອອກເດີນທາງຈາກ ປະເທດອັງກິດ ໃນວັນທີ 12 ພຶສພາ ນີ້ເພື່ອມາພົບ ນາງສະແມນຕາ ຜູ້ເປັນລູກສາວ ທີ່ຖືກຂັງຄຸກ ຢູ່ລາວ ເພື່ອລໍຖ້າ ຂຶ້ນສານ ໃນຄະດີ ພະຍາຍາມ ລັກລອບນໍາ ຢາເສບຕິດ heroin ອອກຈາກ ປະເທດລາວ 680 ກຣາມ ຊຶ່ງເປັນຈໍານວນ ຫລາຍພໍທີ່ຈະ ຖືກຕັດສີນໂທດ ປະຫານ ຊີວິດ ຕາມກົດໝາຍ ຂອງລາວ ຕາມຣາຍງານຂ່າວ Irish Examiner.

ນາງສະແມນຕາ ຊຶ່ງຜູ້ເປັນແມ່ ອາໃສຢູ່ເຂດ Dublin ປະເທດອັງກິດ ກັບນ້ອງສາວອີກ 3 ຄົນນັ້ນຈະຖືກ ພິຈາຣະນາ ຄະດີ ເປັນເທື່ອທໍາອິດ ຢູ່ລາວ ແລະນາງອາຈ ພົ້ນໂທດ ປະຫານຊີວິດ ຖ້າສານຫາກ ຕັດສີນວ່ານາງ ມີຄວາມຜິດຈິງ ຍ້ອນນາງຖືພາ ຄາທ້ອງ ຊຶ່ງຫລາຍຄົນ ເຊື່ອວ່ານາງ ຖືກຂົ່ມຂືນ ໃນຣະຫວ່າງ ຖືກຂັງຄຸກຢູ່ ໂພນຕ້ອງໃນ ນະຄອນຫລວງ ວຽງຈັນ. ຄ່າປີ້ຍົນ ສໍາລັບຜູ້ ເປັນແມ່ນັ້ນ ໝູ່ຄູ່ເປັນຜູ້ ຊື້ໃຫ້ພ້ອມທັງ ຈະດູແລລູກໆ ທັງສາມ ຖ້ານາງ ໃນຣະຫວ່າງທີ່ ນາງໄປລາວແລະ ລໍຖ້າຂຶ້ນສານ ກັບລູກສາວ. ແຕ່ເຖິງແນວໃດ ກໍຍັງບໍ່ເປັນ ທີ່ຈະແຈ້ງເທື່ອ ວ່ານາງຈະໄດ້ ຮັບອະນຸຍາດ ໃຫ້ເຂົ້າໄປນັ່ງ ໃຫ້ກໍາລັງໃຈ ລູກສາວຢູ່ສານ ຟັງການ ພິຈາຣະນາ ຄະດີ ແຕ່ຕົ້ນຈົນຈົບ ຫລືບໍ່.

Anna Morris ຜູ້ຊຽວຊານດ້ານ ກົດໝາຍ ຈາກອົງການ Repreive  ຊຶ່ງມີກໍານົດ ພົບກັບ ນາງ ສະແມນຕາ ເມື່ອວັນຈັນ ຜ່ານມາແຕ່ 30 ນາທີ ກ່ອນການພົບນັ້ນ ກໍຖືກໃຫ້ເລື່ອນ ມາໃສ່ມື້ ວັນອັງຄານ ນີ້.

ນາງສະແມນຕາ ໂອໂຣບາຕໍຣ ຖືກຂັງຄຸກຢູ່ ລາວ ແຕ່ເດືອນ 8 ປີກາຍ ແລະເວລານີ້ ນາງມີທ້ອງໄດ້ 5 ເດືອນແລ້ວ ແລະກໍຫາມີ ທະນາຍຄວາມ ເມື່ອວັນພຣະຫັດ ແລະໄດ້ພົບກັບ ທະນາຍຄວາມ ໃນມື້ຕໍ່ມາ.

ຂ່າວ Irish Examiner ຣາຍງານຕື່ມວ່າ  ຢູ່ທີ່ຣັຖສະພາ House of Commons ໃນກຸງລອນດອນ ພັກຝ່າຍ ເພື່ອການລົບລ້າງ ໂທດປະຫານ ຊີວິດ ມີກໍານົດ ເປີດປະຊຸມ ເພື່ອພິຈາຣະນາ ກໍຣະນີ ກ່ຽວພັນກັບ ຄະດີ ນາງສະແມນຕາ ໃນວັນທີ 12 ພຶສພາ ນີ້ຊຶ່ງນາງ Orobator ຮູ້ສຶກດີໃຈ ແລະ ເປັນບູນເປັນຄຸນ ໃນຄວາມ ພະຍາຍາມ ຊ່ວຍເຫລືອນາງ ຂອງທາງການ ອັງກິດ ແລະປະຊາຊົນ ໃນອັງກິດດ້ວຍ.

ແຕ່ເຖິງແນວໃດ ນາງ ໂອໂຣບາຕໍຣ ກໍຍັງມີຄວາມ ກັງວົນຫລາຍ ກ່ຽວກັບລູກ ໃນທ້ອງຂອງ ນາງ ສະແມນຕາ ຊຶ່ງກໍເຊັ່ນ ດຽວກັນກັບຄົນ ອຶ່ນ ເພາະເດັກໃນທ້ອງ ບໍ່ໄດ້ກະທໍາ ຄວາມຜິດໃດໆ ເລີຍ.