ໂຄງການ ຊ່ວຍຊາວລາວ ເຊົາປູກຝິ່ນ

ເມື່ອຕົ້ນເດືອນ ກຸມພາ ທີ່ຜ່ານມາ ທ່ານ ສຸບັນ ສຣິດທິຣາຊ ຣັຖມົນຕຣີ ປະຈຳ ສຳນັກງານ ປະທານ ປະເທດ ສປປລາວ ໄດ້ໄປຢ້ຽມຢາມ ສູນພັທນາ ບ້ານໜອງຫອຍ ຊຶ່ງເປັນໂຄງການ ພັທນາຂອງ ອົງກະສັດໄທ ໃນການຊ່ວຍເຫລືອ ຊົນເຜົ່າ ສ່ວນນ້ອຍຊາວໄທ ໃນພາກເໜືອ ໃຫ້ຢຸດຕິການ ປູກຝິ່ນ ແລ້ວປ່ຽນໄປປູກ ພືດຢ່າງອື່ນແທນ. ຫລັງຈາກ ຢ້ຽມຢາມແລ້ວ ທ່ານ ສຸບັນ ສຣິດທິຣາຊ ກ່າວວ່າ ຖ້າປະເທດລາວ ມີໂຄງການ ພັທນາ ແບບນີ້ ປະຊາຊົນລາວ ຈະບໍ່ພຽງແຕ່ ຢຸດຕິການ ປູກຝິ່ນ ເທົ່ານັ້ນ ແຕ່ພວກເຂົາຈະ ມີຊີວິດການ ເປັນຢູ່ດີຂື້ນ.

ທ່ານ ສຸບັນ ສຣິດທິຣາຊ ຍອມຮັບວ່າ ຊາວລາວຫລາຍໆຄົນ ທີ່ເຊົາ ປູກຝິ່ນແລ້ວ ໄດ້ຫັນໄປປູກຝິ່ນ ຄືນໃໝ່ ໃນຣະຍະ ປະມານສອງປີທີ່ ຜ່ານມາ. ສຸດທ້າຍ ທ່ານ ສຸບັນ ສຣິດທິຣາຊ ເວົ້າວ່າ ທາງການລາວຢາກ ຈັດຕັ້ງໂຄງການ ພັທນາແບບໄທ ຂື້ນຢູ່ ແຂວງອຸດົມໄຊ ຊຶ່ງເປັນແຂວງທີ່ ມີຊົນເຜົ່າ ສ່ວນນ້ອຍ ອາໃສຢູ່ຫລາຍ ແລະກໍຍັງປູກຝິ່ນ ຫລາຍຢູ່. ໃນໂຄງການນີ້ ຣັຖບານລາວ ຢາກຊຸກຍູ້ສົ່ງເສີມ ໃຫ້ປະຊາຊົນ ລາວເຊົາປູກຝິ່ນ ແລ້ວປ່ຽນໄປປູກ ພືດສິນຄ້າ ແນວອື່ນແທນ.

ເມື່ອປະມານ 30 ປີກ່ອນ ພາກເໜືອຂອງໄທ ກໍເປັນເຂດນຶ່ງ ທີ່ປູກແລະ ຜລິດຝິ່ນຫລາຍ ແຕ່ອົງກະສັດໄທ ໄດ້ຈັດຕັ້ງ ໂຄງການພັທນາ ຂື້ນປັດຈຸບັນ ມີເຖິງ 38 ແຫ່ງເພື່ອຊ່ວຍໃຫ້ ຊາວໄທເຊົາ ປູກຝິ່ນ ແລະກໍປະກົດ ວ່າໂຄງການນີ້  ໄດ້ຮັບຜົນສຳເຣັດ ເປັນຢ່າງດີ ການປູກ ຝິ່ນຢູ່ໄທໃນ ປັດຈຸບັນ ເກືອບວ່າ ບໍ່ມີແລ້ວ.