ວັນຕ້ານ ຢາເສບຕິດ ສາກົນ
2008.06.26
ເນື່ອງໃນໂອກາດ ວັນຕ້ານ ຢາເສບຕິດ ສາກົນ ໃນມື້ວັນທີ 26 ເດືອນມີຖຸນາ ສປປລາວ ຊື່ງເປັນປະເທດນື່ງ ທີ່ກຳລັງ ປະເຊີນ ກັບບັນຫາ ຢາເສບຕິດ ແລະ ກຳລັງ ພາກັນ ປາບປາມ ຢູ່ໃນເວລານີ້ ໄດ້ພາກັນຈັດ ກິຈກຳ ຕ່າງໆຂື້ນ ໃນທົ່ວປະເທດ ເພື່ອປະກອບສ່ວນ ໃນວັນສຳຄັນ ດັ່ງກ່າວ, ດັ່ງທ່ານ ຢົ້ງ ຈັນທະລົງສີ ໂຄສົກກະຊວງ ການຕ່າງປະເທດລາວ ກ່າວ ກ່ຽວກັບ ເຣື້ອງນີ້ ວ່າ:
“ໄດ້ຈັດ ພິທີ ຢູ່ນະຄອນຫລວງ ທຳລາຍ ຢາເສບຕິດ ກໍ່ຄື ຢູ່ແຂວງ ຕ່າງໆ ກໍ່ໄດ້ຈັດ ພິທິ ຄືກັນ ແລະ ກໍ່ອົງການ ສາກົນ ຄົບຖ້ວນ ເຂົ້າຮ່ວມ ພິທີ ສລູບຜົລ ນື່ງປີ ທີ່ຜ່ານມາ ແລະ ກໍ່ໄດ້ແຈ້ງ ໃຫ້ພວກເພີ່ນຊາບວ່າ ກ່ຽວກັບ ແຜນການຕໍ່ໄປ ພວກເຮົາ ຊີ່ເຮັດຫຍັງແດ່ ກ່ຽວກັບ ບັນຫາ ຢາເສບຕິດ”
ກິຈກຳ ທີ່ທາງການລາວ ໄດ້ກະທຳ ຂື້ນ ໃນທົ່ວປະເທດ ໃນວັນຕ້ານ ຢາເສບຕິດ ສາກົນ ນັ້ນ ກໍ່ແມ່ນວ່າ ໃນບາງແຂວງ ກໍ່ມີ ການຈູດເຜົາ ຢາເສບຕິດ ທີ່ທາງການ ສະສົມ ຢືດມາ ໄດ້ ເພື່ອເປັນການສົ່ງ ສັນຍານ ໃຫ້ກຸ່ມຄ້າ ແລະ ເສບຢາເສບຕິດ ວ່າ ຣັຖບານລາວ ຈະທຳ ທຸກຢ່າງ ເພື່ອຕ້ານພັຍ ທີ່ຈະເກີດຈາກຢາເສບຕິດ ໃນກຸ່ມຊຸມຊົນ ໃນລາວ ນອກຈາກນັ້ນ ບາງແຂວງ ກໍ່ມີ ການແຂ່ງຂັນ ກິລາ ເພື່ອຄວາມສາມະຄີ ແລະ ກໍ່ເພື່ອສຸຂພາບ ໃນກຸ່ມ ເຍົາວະຊົນ ວັຍລຸ້ນ ຊື່ງເປັນກຸ່ມ ທີ່ຍັງມີ ການສ່ຽງ ໃນບັນຫາ ຢາເສບຕິດ ໃນລາວ, ຊັກຊວນ ໃຫ້ກຸ່ມ ດັ່ງກ່າວ ຫລີ້ນກິລາ ໃຊ້ເວລາຫວ່າງ ໃຫ້ເກີດປະໂຍດ ແທນການ ໄປມົ້ວສຸມ ເສບຢາເສບຕິດ ແລະ ສີ່ງມືນເມົາ ປະເພດ ຕ່າງໆ.
ທ່ານ ຢົ້ງ ກ່າວກ່ຽວ ກັບຄວາມພຍາຍາມ ຂອງຣັຖບານ ໃນການລົບລ້າງ ບັນຫາ ຢາເສບຕິດ ໃນລາວວ່າ:
“ພວກເຮົາ ພະຍາຍາມ ຫມົດທຸກສີ່ງທຸກຢ່າງ ເພື່ອບໍ່ໃຫ້ ກາຍເປັນປະເທດ ທາງຜ່ານ ເຮົາກໍ່ໄດ້ ເອົາໃຈໃສ່ ໃນການສະກັດກັ້ນ ສືບຂ່າວ ປາບປາມ ນອກຈາກນັ້ນ ພວກເຮົາ ຍັງໄດ້ຣະດົມ ໃຫ້ປະຊາຊົນ ມີສ່ວນຮ່ວມ.”
ລາຍງານ ຄັ້ງລ້າສຸດ ຈາກຫ້ອງການ ຕ້ານຢາເສບຕິດ ຂອງສະຫາຣັຖ ຫລື DEA ຣະບຸ ວ່າ ທາງການສະຫາຣັຖ ສແດງຄວາມຊົມຊື່ນ ເຖີງຄວາມພຍາຍາມ ຂອງຣັຖບານລາວ ທີ່ຈະລົບລ້າງ ບັນຫາຢາເສບຕິດ ໃນລາວ ໂດຍສເພາະ ການຫລຸດ ຈຳນວນ ພື້ນທີ່ ໃນການປູກຝີ່ນ ການຕ້ານ ຂະບວນການຄ້າຢາເສບຕີດ ແລະ ການໃຫ້ການບຳບັດ ແກ່ຜູ້ທີ່ ຕິດຢາເສບຕິດ ແຕ່ບັນຫາ ຢາເສບຕິດ ໃນລາວ ອາດຈະບໍ່ສີ້ນສຸດລົງ ໂດຍງ່າຍ ເພາະລາວ ຍັງເປັນ ທາງຜ່ານ ທີ່ສຳຄັນ ຂອງຂະບວນການຄ້າ ຢາເສບຕິດຢູ່ ໃນເວລານີ້.