ຢາເສບຕິດ ເຮັດໃຫ້ເກີດ ປະກົດການ ຫຍໍ້ທໍ້
2008.06.26
ສປປລາວ ຖືເປັນທາງຜ່ານ ຂອງຂະບວນ ການຄ້າ ຢາເສບຕິດ ທີ່ສໍາຄັນ ໃນຂົງເຂດ ແລະ ບັນຫາ ຢາເສບຕິດ ທີ່ຫລັ່ງໄຫລ ເຂົ້າໄປ ໃນທ້ອງຖິ່ນ ຂອງລາວ ໃນລະຍະຜ່ານມານີ້, ໄດ້ສົ່ງຜົນສະທ້ອນ ຕໍ່ສັງຄົມລາວ ບໍ່ໜ້ອຍຄືກັນ, ໂດຍສະເພາະ, ເຮັດໃຫ້ເກີດ ປະກົດການ ຫຍໍ້ທໍ້ ຫລື ຄວາມບໍ່ສງົບຮຽບຮ້ອຍ ທີ່ຕາມມາ. ເຈົ້າໜ້າທີ່ ຄະນະ ກັມມະການ ກວດກາ ແລະ ຄວບຄຸມ ຢາເສບຕິດ ແຫ່ງຊາດ ຂອງລາວ ຊີ້ແຈງ ວ່າ:
“ປະກົດການ ຫຍໍ້ທໍ້ ຢູ່ໃນສັງຄົມ ສືບເນື່ອງມາຈາກ ຈໍານວນນຶ່ງ ຂະເຈົ້າ ກໍເສບຢາ ໃນເມື່ອວ່າ ບໍ່ມີເງິນຄໍາອີ່ຫຍັງ, ກໍໄດ້ໄປຊອກທາງອື່ນ ໂດຍທີ່ບໍ່ຊອບ, ໄປຂີ້ລັກງັດແງະ, ຜິດຖຽງຕີກັນ ເຮັດໃຫ້ ມີບັນຫາ ຫຍຸ້ງຍາກ ຢູ່ໂຕນີ້.”
ໃນປັດຈຸບັນ ກຸ່ມເຍົາວະຊົນ, ຊາວໜຸ່ມ, ນັກຮຽນ, ນັກສຶກສາ, ກຸ່ມວັຍໜຸ່ມ ທີ່ຫວ່າງງານ ຮວມໄປເຖິງ ກຸ່ມແຮງງານ ຮັບຈ້າງ ຣາຄາຖືກ ໃນລາວ ຈໍານວນ ບໍ່ໜ້ອຍ, ຖືເປັນກຸ່ມສ່ຽງ ທີ່ເຂົ້າໄປ ກ່ຽວພັນກັບ ຢາເສບຕິດ, ໂດຍສະເພາະ ຢາບ້າ, ຊຶ່ງຖືວ່າ ຫາໄດ້ງ່າຍ ໃນທ້ອງຖິ່ນ ຕ່າງໆ ຂອງລາວ.
ບັນຫາ ຢາເສບຕິດ ນອກຈາກ ຈະສົ່ງຜົນ ຕໍ່ສຸຂພາບ ທີ່ຊຸດໂຊມລົງ ຂອງຜູ້ເສບແລ້ວ, ຍັງສົ່ງຜົນສະທ້ອນ ເຮັດໃຫ້ ເກີດຄວາມທຸກຈົນ ແກ່ຄົນລາວ ນໍາອີກ. ດັ່ງເຈົ້າໜ້າທີ່ ທ່ານດຽວກັນນີ້, ກ່າວວ່າ:
“ມາເບິ່ງປັດຈຸບັນ ຣາຄາຢານີ້ ມັນກໍສູງ ໃນເມື່ອມີຄວາມຕ້ອງການເສບ ມັນກໍຕ້ອງ ໄດ້ຊອກເງິນ ຊອກຄໍາ ແລະ ກໍກ່ຽວພັນ ກັບຣຍຮັບ ຂອງຄອບຄົວ ເຮັດໃຫ້ທຸກຈົນ ກ່ວາເກົ່າອີກ, ລູກໄປຕິດຢາ ກໍຕ້ອງໃຊ້ງົປມານ ຈໍານວນນຶ່ງ ເອົາໄປປິ່ນປົວ.”
ທຸກມື້ນີ້ ລາວ ຕ້ອງສູນເສັຍ ງົປມານໄປ ແຕ່ລະປີ ບໍ່ນ້ອຍ ໃນການບໍາບັດ ຟື້ນຟູ ຜູ້ຕິດຢາ ໃຫ້ກັບມາ ເປັນປົກກະຕິ ອີກທັ້ງ ລາວ ຍັງສ່ຽງຕໍ່ ການສູນເສັຍ ຊັພຍາກອນມະນຸດ ທີ່ມີຄຸນນະພາບ ເພື່ອຊ່ອຍສ້າງສາ ພັທນາ ປະເທດນໍາອີກ. ດັ່ງນັ້ນ ການກໍາຈັດບັນຫາ ຢາເສບຕິດ, ຈຶ່ງຖືເປັນ ແຜນການ ຈໍາເປັນ ທີ່ຕ້ອງເຮັດ ຄຽງຄູ່ ກັບການສົ່ງເສີມ ການສ້າງວຽກງານ ເພື່ອເປັນທາງອອກ ໃຫ້ແກ່ປະຊາຊົນລາວ ໂດຍທົ່ວໄປ.