ອັງກິດ ເຣັ່ງ ຂໍຄວາມເປັນທັມ ຄະດີ ຍີງຊາວ ອັງກິດ

ກ່ຽວກັບ ກໍຣະນີ ຂອງນາງ Samantha Orobator ອາຍຸ 20 ປີ ດັ່ງກ່າວ ທີ່ວ່າຖ້າທາງ ກາຣສາລ ສປປລາວ ຕັດສີນວ່າ ນາງມີຄວາມຜິດ ຕາມຂໍ້ກ່າວຫາ ແທ້ນັ້ນ ນາງອາຈຖືກ ລົງໂທດດ້ວຍກາຣ ຍີງເປົ້າ ກໍເປັນໄດ້. ສະນັ້ນທາງ ເຈົ້າໜ້າທີ່ຂອງ ຣັຖບາລ ອັງກິດ ຢູ່ ບາງກອກ ກໍວ່າ ທາງກາຣອັງກິດ ຈະສືບຕໍ່ ໃນກາຣ ພະຍາຍາມ ທີ່ຈະໃຫ້ມີ ເຈົ້າໜ້າທີ່ ເປັນຕົວແທນໃຫ້ ນາງເພື່ອຊ່ວຍ ໃນກາຣດຳເນີນ ຄະດີຢູ່ສາລ ແຕ່ກໍຍັງ ບໍ່ທັນຮູ້ເປັນ ທີ່ແນ່ນອນ ວ່າຈະມີ ກາຣເຣີ່ມດຳເນີນ ຄະດີໃນ ສັປດານີ້ ແທ້ຫລືບໍ?

ໃນຂະນະ ດຽວກັນນີ້ ທ່ານ Bil Rammell ຣັຖມົນຕຣີ ກາຣຕ່າງປະເທສ ອັງກິດ ກໍວ່າທ່ານ ຈະຍົກເອົາ ບັນຫາ ນີ້ຂື້ນຫາຣື ໂອ້ລົມກັບ ທ່ານທອງລຸນ ສີສຸລິດ ຮອງນາຍົກ ຣັຖມົນຕຣີ ແລະຣັຖມົນຕຣີ ກາຣຕ່າງ ປະເທສລາວ ທີ່ວ່າມີ ກຳໜົດຢ້ຽມຢາມ ອັງກິດ ໃນມື້ວັນທີ່ 6 ພຶສພານີ້ ນັ້ນເຊັ່ນກັນ.

ຢ່າງໃດກໍຕາມ ທາງຣັຖບາລ ອັງກິດ ກໍໄດ້ຕິດຕາມ ກໍຣະນີຂອງ ນາງ Samantha Orobator ດັ່ງກ່າວນີ້ມາ ໂດຽຕລອດ ແລະວ່າຄະນະ ເຈົ້າໜ້າທີ່ ຈາກຫ້ອງກາຣ ທະນາຍຄວາມ ກໍເດີນທາງໄປ ຍັງນະຄອນ ຫລວງວຽງຈັນ ເພື່ອໃຫ້ຄວາມ ຊ່ວຍເຫລືອ ແລະໃນຂະນະ ດຽວກັນ ຍານາງ Jane Orobator ຜູ້ເປັນແມ່ຂອງ ນາງກໍມີຄວາມ ເປັນຫ່ວງພິເສດ ນຳສຸຂພາບ ຂອງນາງ Samantha ໂດຽສະເພາະ ທີ່ວ່ານາງມີ ກຳໜົດຈະ ຄອດລູກພາຍ ໃນເດືອນ ກັນຍາ ທີ່ຈະມາເຖີງ ນີ້ນັ້ນ.