ຣັຖ ໃຫ້ເອກກະຊົນ ຕັດໄມ້ຢູ່ປ່າ ສງວນແຫ່ງຊາດ
2023.02.28
ໄມ້ທີ່ຕັດໄວ້ ນັບແຕ່ເດືອນ ພືສຈິກາ 2022 ຢູ່ ປ່າສງວນເຊປຽນ ເຊນ້ຳນ້ອຍ.
ນັກຂ່າວ ພົລເມືອງ
ມີການເຂົ້າໄປຕັດໄມ້ ຢູ່ເຂດປ່າສງວນເຊປຽນ ເຊນ້ຳຊ້ອງ ຢູ່ ເມືອງສນາມໄຊ ແຂວງອັດຕະປື ໂດຍ ອຳນາດການປົກຄອງ ໃຫ້ສຳສັມປະທານ ເຮັດໂຄງການກະສິກັມ 1,500 ເຮັກຕ້າຣ໌, ແຕ່ວ່າ ບໍຣິສັດ ໄດ້ເຂົ້າຕັດຕົ້ນໄມ້ຂນາດໃຫຍ່ ເພື່ອເອົາໄມ້ໄປຂາຍ.
ເຈົ້າໜ້າທີ່ກ່ຽວຂ້ອງ ທ່ານ ນຶ່ງ ຜູ້ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ເອເຊັຽເສຣີ ຕໍ່ເອເຊັຽເສຣີ ໃນວັນທີ 24 ກຸມພາ ວ່າ:
“ໄມ້ແມ່ນຕັດອອກຈາກປ່າສງວນເຊປຽນ ເຊນ້ຳນ້ອຍ ຢູ່ເຂດເມືອງສນາມໄຊ ແຂວງອັດຕະປື ເຊິ່ງເປັນໄມ້ທີ່ຕັດອອກຈາກເນື້ອທີ່ສັມປະທານທີ່ດິນ 1,500 ເຮັກຕ້າ ຂອງບໍຣິສັດ ຈີນທີ່ໄດ້ສັມປະທານປູກພືດກະສິກັມ.”
ເຈົ້າໜ້າທີ່ກ່ຽວຂ້ອງ ທ່ານນີ້ ກ່າວຕື່ມອີກວ່າ:
“ປັດຈຸບັນ ຈຳນວນໄມ້ດັ່ງກ່າວ ໄດ້ຕັດອອກໄປແລ້ວປະມານ 38,000 ແມັດກ້ອນ ຢູ່ເຂດປ່າສງວນເຊປ່ຽນເຊນ້ຳນ້ອຍ ແຕ່ ຍັງມີການດຳເນີນການຕັດໄມ້ ຕໍ່ໄປອີກ ແລະ ບໍ່ມີກຳນົດວ່າ ຈະຢຸດເຊົາຕັດເມື່ອໃດ.”
ຮູບພາບທີ່ເອເຊັຽເສຣີ ໄດ້ມາ ສະແດງໃຫ້ເຫັນໄມ້ທ່ອນຂນາດໃຫຍ່ ຢ່າງໜ້ອຍ 2 ຫຼື 3 ຄົນ ຂຶ້ນໄປ ຈຶ່ງສາມາດກອດຫຸ້ມ ໃນຂະນະທີ່ ຕົ້ມໄມ້ບາງຕົ້ນທີ່ຖືກຕັດລົງມາ ກໍມີຂນາດໃຫຍ່ທີ່ມີໜ້າຕັດ ຫຼື ເສັ້ນຜ່າສູນກາງເກືອບ 2 ແມັດ.
ປັດຈຸບັນ ມີການຕັດໄມ້ ກັນເປັນບໍລິເວນກວ້າງ ຢູ່ເຂດປ່າສງວນເຊປ່ຽນເຊນ້ຳນ້ອຍ ເພື່ອບຸກເບີກທີ່ດິນເຮັດສວນມັນຕົ້ນ, ໂຄງການກະສິກັມສະອາດ, ແລະ ການປູກກ້ວຍ.
ບຸກຄົນທີ່ໃກ້ຊິດ ເຈົ້າໜ້າທີ່ລະດັບສູງ ແຂວງອັດຕະປື ໄດ້ກ່າວຕໍ່ເອເຊັຽເສຣີ ໃນວັນທີ 27 ກກຸມພາ ວ່າ: “ມີຫຼາຍໂຄງການສັມປະທານ ບໍຣິສັດ ໄດ້ສຳປະທານ ຜູ້ລະ 5,000 ເຮັກຕ້າ, 10,000 ເຮັກຕ້າຣ໌ ຈັ່ງຊີ້ນ່າ ຈົນໝົດລະດິນປ່າສງວນ ເຂດເມືອງສນາມໄຊ ແຂວງອັດຕະປື ແຕ່ວ່າ ເຂດປ່າສງວນເປຊຽນ ເຊນ້ຳນ້ອຍ ເບື້ອງແຂວງຈຳປາສັກ ບໍ່ມີການຕັດໄມ້.”
ບຸກຄົນທີ່ໃກ້ຊິດເຈົ້າໜ້າທີ່ ລະດັບສູງແຂວງອັດຕະປື ທ່ານນີ້ ຍັງກ່າວຕື່ມວ່າ:
“ບາງກໍລະນີ ກໍມີປະຊາຊົນເຂົ້າໄປບຸກເບີກທີ່ດິນ ແລ້ວຂາຍໃຫ້ບໍຣິສັດຈີນ ໃນລາຄາເຮັກຕ້ານຶ່ງ 30 ລ້ານກີບ ເພື່ອເຂົ້າມາປູກກ້ວຍ ແລະ ໝາກຖົ່ວລຽນ ຫຼັງຈາກນັ້ນ ທີ່ດິນກໍເປັນຂອງນັກລົງທຶນຈີນເລີຍ.”
ປັດຈຸບັນນີ້ ມີການຕັດໄມ້ເປັນຈຳນວນຫຼາຍຢູ່ ແຂວງອັດຕະປື ຢູ່ເຂດປ່າສງວນເຊປຽນ ເຊນ້ຳນ້ອຍ ແລະ ໄມ້ຈະຖືກຕັດລົງໝົດ ໃນອະນາຄົດ ອີງຕາມຂໍ້ມູນຈາກບຸກຄົນໃກ້ຊິດ ເຈົ້າໜ້າທີ່ລະດັບສູງ ແຂວງອັດຕະປື.
ໃນທ້າຍປີ 2022 ທີ່ຜ່ານມາ ແຂວງອັດຕະປື ໄດ້ອອກໂຄ່ຕ້າ ອະນຸຍາດໃຫ້ຫົວໜ່ວຍທຸຣະກິຈ 15 ຫົວໜ່ວຍ ຕັດໄມ້ປະມານ 100,000 ແມັດກ້ອນ.
ບຸກຄົນທີ່ໃກ້ຊິດ ກັບເຈົ້າໜ້າທີ່ແຂວງອັດຕະປື ໄດ້ກ່າວຕໍ່ເອເຊັຽເສຣີ ວ່າ:
“ຫົວໜ່ວຍທຸຣະກິຈໃດ ໂດຍສະເພາະໂຮງເລື່ອຍ ແລະ ບໍຣິສັດ ທີ່ຈ່າຍເງິນໃຫ້ເຈົ້າໜ້າທີ່ ກ່ຽວຂ້ອງແຂວງອັດຕະປື ກໍຈະໄດ້ໂຄ່ຕ້າຕັດໄມ້ທັນທີ.”
ການອະນຸຍາດໃຫ້ມີການຕັດໄມ້ ຢູ່ແຂວງອັດຕະປື ໄດ້ມີຂຶ້ນນັບແຕ່ເດືອນພຶສຈິກາ 2022 ທີ່ຜ່ານມາ ຫຼັງຈາກທີ່ ມີຜ່ອນຜັນຄຳສັ່ງເລກທີ 15 ວ່າດ້ວຍ ການເພີ່ມທະວີ ຄວາມເຂັ້ມງວດ ໃນການຄຸ້ມຄອງ ແລະ ກວດກາການຂຸດຄົ້ນໄມ້ ເຄື່ອນຍ້າຍໄມ້ ແລະ ທຸຣະກິຈໄມ້ ໂດຍ ທ່ານ ທອງລຸນ ສີສຸລິດ ນາຍົກຣັຖມົນຕຣີ ໃນເວລານັ້ນ ເປັນຜູ້ອອກຄຳສັ່ງດັ່ງກ່າວ.
ບຸກຄົນທີ່ໃກ້ຊິດເຈົ້າໜ້າທີ່ ແຂວງອັດຕະປື ໄດ້ກ່າວວ່າ ການຕັດໄມ້ ມີ 3 ຈຸດ ຄື ຢູ່ ເຂດເຂື່ອນນ້ຳກົງ ເມືອງພູວົງ, ເຂື່ອນເຊກະໝານ ເມືອງຊານໄຊ, ແລະ ຢູ່ ເຂດ ເມືອງສນາມໄຊ.
ການຕັດໄມ້ຢູ່ຕາມສັນພູ ກວມເອົາບໍຣິເວລາກວ້າງ ໃນເນື້ອທີ່ຫຼາຍກິໂລແມັດມົນທົນ. ຊາວບ້ານແຂວງອັດຕະປື ຜູ້ທີ່ພົບເຫັນການຕັດໄມ້ ໄດ້ກ່າວຕໍ່ເອເຊັຽເສຣີ ວ່າ:
“ມີການຕັດໄມ້ຢູ່ເຂດປ່າສງວນເຊປຽນ ເຊນ້ຳນ້ອຍ ເປັນບໍລິເວນກວ້າງ ພໍພຽງແຕ່ຈຸດໃດມີໄມ້ ກໍມີການເຂົ້າໄປຕັດໝົດ.”
ມີການບຸກເບີກເສັ້ນທາງເຂົ້າໄປ ເພື່ອໃຫ້ຣົຖສາມາດແກ່ໄມ້ອອກມາຈາກສນາມນຶ່ງ ແລະ ສນາມສອງ.
ຊາວບ້ານແຂວງອັດຕະປື ທ່ານນີ້ ໄດ້ກ່າວວ່າ:
“ໄມ້ຢືນຕົ້ນເຂົາກະຕັດ ໄມ້ນອນຂອນຕາຍວ່າແຕ່ພໍ້ເຂົາກະຕັດໝົດ ຕັດໃຫ້ໝົດວ່າຊັ້ນຊະ ເຂດນີ້ແຫຼະເມືອງສນາມໄຊ ມີແຕ່ເຂດດຽວນີ້ແຫຼະ ມັນຕັດຢູ່ເຂດໜອງຫີນ ຢູ່ເຂດບ້ານໄຊດອນໂຂງ ເຂດບ້ານໜອງມ່ວງ ມັນຂຶ້ນກັບເມືອງສນາມໄຊໝົດ.”
ມີການຕັດໄມ້ຢູ່ບ່ອນອື່ນ ເຂົ້າມາປົນໃສ່ກັບໄມ້ທີ່ຕັດຢູ່ ເຂດສຳປະທານ. ເຈົ້າໜ້າທີ່ກ່ຽວຂ້ອງ ໄດ້ກ່າວຕໍ່ເອເຊັຽເສຣີວ່າ:
“ລະບົບການຕັດໄມ້ ເຂົາເຮັດຈັ່ງຊີ້ ຫາກເຂົາໄປຕັດຢູ່ບ່ອນອື່ນພຸ້ນ ມັນເປັນແນວນັ້ນດອກ ບ້ານເຮົາ ມັນ ໄປໝາຍຕົ້ນ ໝາຍຕໍກະຄືເກົ່າຫັ້ນລະ ເຂົາກະໄປຕັດຢູ່ບ່ອນອື່ນພຸ້ນ ແນວພະນັກງານຕິດຕາມເຂົາກະໄປເອົາເງິນຢູ່ຫັ້ນອີກ.”
ເຈົ້າໜ້າທີ່ກ່ຽວຂ້ອງທ່ານນີ້ ກ່າວວ່າ:
“ພວກທີ່ໄດ້ຮັບສຳປະທານຕັດໄມ້ ຂໍພຽງແຕ່ໄດ້ໃບອະນຸຍາດສັມປະທານ ຕັດໄມ້ຈາກຣັຖບານ ເຖິງວ່າ ໄມ້ຢູ່ເຂດສຳປະທານບໍ່ມີກໍຕາມ ເຂົາເຈົ້າຈະໄປຕັດບ່ອນອື່ນ ແລ້ວແກ່ເຂົ້າມາ.”
ເຖິງຢ່າງໃດກໍຕາມ, ທ່ານ ເລັດ ໄຊຍະພອນ ເຈົ້າຂອງອັດຕະປື ກໍບໍ່ຕິດເສດວ່າ ບໍ່ມີການອະນຸມັດຕັດໄມ້. ດັ່ງທ່ານ ໄດ້ກ່າວຕໍ່ເຊັຽເສຣີ ໃນວັນທີ 31 ມົກຣາ ວ່າ:
“ອັນນີ້ແມ່ນຂໍ້ມູນປອມ ພວກຄົນບໍ່ດີເຂົາຫາເຣື່ອງ.”
ການຂຶ້ນແຜນເຮັດໂຄງການ ເພື່ອເປັນຂໍ້ອ້າງໃນການຕັດໄມ້ ຢູ່ແຂວງອັດຕະປື ຍັງຄົງເກີດຂຶ້ນຢ່າງຕໍ່ເນື່ອງ.
ສະເພາະຢູ່ເມືອງສນາມໄຊ, ບຸກຄົນທີ່ໃກ້ຊິດເຈົ້າໜ້າທີ່ ລະດັບສູງແຂວງອັດຕະປື ໄດ້ກ່າວວ່າ: ທາງການແຂວງອັດຕະປື ອະນຸຍາດ ໃຫ້ບໍຣິສັດ ເອກຊົນ ເຂົ້າມາຕັດໄດ້ ຢູ່ເຂດເມືງສນາມໄຊ ແຂວງອັດຕະປື ໂດຍຕັ້ງໂຄງການພັທນາ ນິເວດກິສິກັມທັນສມັຍຄົບວົງຈອນ ແລະ ເຂດປູກປ່າໄມ້ເປັນສິນຄ້າ ໃນເນື້ອທີ່ປະມານ 1,500 ເຮັກຕ້າ.
ແຕ່ໃນຄວາມເປັນຈິງ ກໍເປັນພຽງແຕ່ຂຶ້ນແຜນ ເພື່ອເຂົ້າມາຕັດໄມ້ອອກໄປຂາຍເທົ່ານັ້ນ ແລະ ປະຊາຊົນຍັງບໍ່ເຊື່ອວ່າ ໂຄງການດັ່ງກ່າວຈະເກີດຂຶ້ນຫຼືບໍ່ ຫຼັງຈາກທີ່ມີການຕັດໄມ້ອອກໝົດແລ້ວ.
ຜແນກກະສິກັມ ແລະ ປ່າໄມ້ ແຂວງອັດຕະປື ໄດ້ຂຽນບົດສເນີ ເຖິງກະຊວງກະສິກັມ ແລະ ປ່າໄມ້ ໃນວັນທີ 18 ກໍຣະກະດາ 2022 ເພື່ອໃຫ້ຮັບຮອງເອົາ ບໍຣິສັດ ອິນທະວົງ ການຄ້າ ຂາອອກ-ຂາເຂົ້າ ຈຳກັດຜູ້ດຽວ ເຂົ້າເກັບກູ້ ທ້ອນໂຮມ ໄມ້ຢູ່ໃນເຂດສັມປະທານ ໂຄງການພັທນານິເວດກະສິກັມ ທັນສໄມ ຄົບວົງຈອນ ແລະ ເຂດປູກໄມ້ເປັນສິນຄ້າ ໃນເນື້ອທີ່ປະມານ 1,500 ເຮັກຕ້າຣ໌.
ຕໍ່ມາ ກະຊວງກະສິກັມ ແລະ ປ່າໄມ້ ໄດ້ອອກແຈ້ງການເຖິງຫົວໜ້າ ຜແນກກະສິກັມ ແລະ ປ່າໄມ້ ແຂວງອັດຕະປື ໃນວັນທີ 19 ກໍຣະກະດາ 2022 ທີ່ຜ່ານມາ.
ແຈ້ງການໄດ້ລະບຸວ່າ: ໃຫ້ຜແນກກະສິກັມ ແລະ ປ່າໄມ້ ແຂວງອັດຕະປື ອອກອະນຸຍາດ ໃຫ້ບໍຣິສັດ ອິນທະວົງ ການຄ້າ ຂາອອກ-ຂາເຂົ້າ ຈຳກັດຜູ້ດຽວ ເພື່ອດຳເນີນການຂຸດຄົ້ນໄມ້ ຈຳນວນເກືອບ 80,000 ຕົ້ນ ເທົ່າກັບ ບໍລິມາດ 38,000 ແມັດກ້ອນ ອອກຈາກເຂດສັມປະທານ ຂອງໂຄງການພັທນານິເວດກິສິກັມ ທັນສໄມ ຄົບວົງຈອນ ແລະ ເຂດພັທນາໂຄງການປູກໄມ້ເປັນສິນຄ້າ ໃນເນື້ອທີ່ 1,500 ເຮັກຕ້າຣ໌ ຢູ່ ເມືອງສນາມໄຊ ແຂວງອັດຕະປື.
ແຈ້ງການໄດ້ລະບຸອີກວ່າ: ໃຫ້ຜແນກກະສິກັມ ແລະ ປ່າໄມ້ ແຂວງອັດຕະປື ເປັນເຈົ້າການ ແລະ ນຳສເນີ ຄະນະນຳແຂວງ ແລະ ແຕ່ງຕັ້ງ ຄະນະຮັບຜິດຊອບ ຄຸ້ມຄອງການຂຸດຄົ້ນໄມ້ ຢູ່ເຂດສຳປະທານຂອງໂຄງການພັທນາລະບົບສິເວດ ກະສິກັມທັນສໄມຄົບວົງຈອນ ແລະ ເຂດພັທນາໂຄງການປູກໄມ້ ເປັນສິນຄ້າ ໃນເນື້ອທີ່ 1,500 ເຮັກຕ້າຣ໌ ຢູ່ ເມືອງສນາມໄຊ ແຂວງອັດຕະປື.
ເພື່ອເຮັດໜ້າທີ່ຄຸ້ມຄອງ, ຕິດຕາມ ແລະ ກວດກາ ໃຫ້ຖືກຕ້ອງຕາມລະບຽບການ, ຮັບປະກັນ ແລະ ຫຼີກເວັ້ນ ບໍ່ໃຫ່ມີການສວຍໂອກາດ ລັກລອບຂຸດຄົ້ນໄມ້, ເກັບກູ້ ແລະ ທ້ອນໂຮມໄມ້ຈາກບ່ອນອື່ນມາຕື່ມໃສ່ ແລະ ຂຸດຄົ້ນນອກເຂດ ໄດ້ຮັບອະນຸຍາດ ຢ່າງເດັດຂາດ ອີງຕາມແຈ້ງການ ດັ່ງກ່າວ.
ນອກຈາກນີ້ ຍັງມີ ຫົວໜ່ວຍທຸຣະກິຈ ລວມທັງໂຮງເຮື່ອຍ ແລະ ບໍຣິສັດ ທີ່ໄດ້ຮັບໂຄ່ຕ້າ ຫຼື ໃບອະນຸຍາດຕັດໄມ້ ເຊິ່ງລວມກັນທັງໝົດແລ້ວ ແຂວງອັດຕະປື ໄດ້ອະນຸຍາດໃຫ້ຕັດໄມ້ປະມານ 100,000 ແມັດກ້ອນ ອີງຕາມບຸກຄົນທີ່ໃກ້ຊິດ ເຈົ້າໜ້າທີ່ລະດັບສູງແຂວງອັດຕະປື.
ບັນຫາ ການລັກລອບສົ່ງໄມ້ ອອກໄປຕ່າງປະເທດ ຢູ່ແຂວງອັດຕະປື ທີ່ຜ່ານມາ.
ໃນປີ 2017, ຣັຖບານ ສັ່ງຈັບ-ຍຶດ ຣົຖໄມ້ເຖື່ອນ 27 ຄັນ ຢູ່ດ່ານຊາຍແດນ ພູເກືອ ເມືອງພູວົງ ແຂວງອັດຕະປື ໃນຂະນະທີ່ ຣົຖໄມ້ດັ່ງກ່າວ ກຳລັງຈະອອກໄປ ປະເທດວຽດນາມ.
ອີງຕາມຂໍ້ມູນຈາກແຂວງອັດຕະປື ໄດ້ພົບວ່າ, ຣົຖໄມ້ 27 ຄັນ ທີ່ຖືກຢຶດໄດ້ ໃນເວລານັ້ນ ເປັນຂອງຄອບຄົວອາດີດເຈົ້າໜ້າທີ່ຣະດັບສູງແຂວງອັດຕະປື.
ຣົຖໄມ້ 27 ຄັນ ຖືກກັກ ແລະ ຢຶດ ໄວ້ໃນຊ່ວງເດືອນພຶສພາ 2017 ຢູ່ດ່ານພູເກືອ ແຂວງອັດຕະປື ຕິດກັບຊາຍແດນວຽດນາມ ແລະຕໍ່ມາໃນເດືອນ ມິຖຸນາ ຣັຖບານໄດ້ມີຄຳສັ່ງໃຫ້ ຍຶດຣົຖໄມ້ທັງຫມົດນັ້ນໄວ້ ຍ້ອນເຫັນວ່າ ບໍ່ຖືກຕ້ອງຕາມກົດໝາຍ.
ຣົຖໄມ້ 27 ຄັນນັ້ນເປັນຂອງຄົນ ໃນຄອບຄົວຂອງຂອງອາດີດເຈົ້າໜ້າທີ່ຣະດັບສູງຂອງແຂວງອັດຕະປື ນອກຈາກນີ້ ຍັງມີ ພະນັກງານ ທີ່ກ່ຽວຂ້ອງ ຂອງແຂວງ ອີກຫລາຍຄົນທີ່ໄປພົວພັນເລື້ອງນີ້ ແລະ ພະນັກງານເຫລົ່ານັ້ນ ກໍຖືກສັ່ງໃຫ້ຢຸດເຊົາ ການປະຕິບັດໜ້າທີ່.
ນອກຈາກນີ້, ໃນວັນທີ 24 ມົກຣາ 2020, ເຈົ້າໜ້າທີ່ ດ່ານສາກົນ ພູເກືອ ແຂວງ ອັດຕະປື ຍຶດຣົຖໄມ້ 7 ຄັນ ທີ່ກຳລັງ ຈະສົ່ງໄມ້ ອອກໄປ ປະເທດ ວຽດນາມ.
ໄມ້ທີ່ຍຶດໄດ້ເປັນ ໄມ້ແຕ້ ແລະ ໄມ້ແດງ ທີ່ຂົນໄປຈາກ ໂຮງເລື່ອຍຫລັກ 16 ຢູ່ເມືອງໄຊເສດຖາ ແລະ ເຈົ້າໜ້າທີ່ ກັກໄວ້ຢູ່ດ່ານ ແລະ ນຳເອົາຣົຖໄມ້ ລົງມາໄວ້ຢູ່ໃນກອງກວດກາປ່າໄມ້ ຢູ່ ເທສບານແຂວງອັດຕະປື.
ໄມ້ທີ່ບັນຈຸໄວ້ຢູ່ໃນຣົຖ 7 ຄັນນັ້ນ ເປັນໄມ້ທີ່ຍັງ ບໍ່ທັນມີການແປຮູບ ຫລື ໄມ້ຕັບ ເປັນຂອງຄົນວຽດນາມ ທີ່ກຳລັງຈະສົ່ງໄປ ປະເທດ ວຽດນາມ ແຕ່ຖືກເຈົ້າໜ້າທີ່ ກັກໄວ້ກ່ອນ.
ໃນເບື້ອງຕົ້ນເຈົ້າໜ້າທີ່ດ່ານພູເກືອ ຍຶດຣົຖໄມ້ 14 ຄັນ ແຕ່ໃນນັ້ນມີຣົຖໄມ້ສັກ ຫລັງຈາກກວດສອບແລ້ວ ເຈົ້າໜ້າທີ່ ອະນຸຍາດໃຫ້ເອົາຣົຖຂົນສົ່ງໄມ້ສັກ ອອກໄປວຽດນາມ ແລ້ວຍຶດໄວ້ພຽງແຕ່ 7 ຄັນທີ່ມີໄມ້ແຕ້ ແລະ ໄມ້ແດງ ທີ່ບໍ່ໄດ້ແປຮູບ.