ບໍ່ແມ່ນໄມ້ແລວນໍ້າ ແຕ່ ເປັນໄມ້ ຕັດຈາກປ່າສງວນ ເຊປຽນ
2023.04.17
ຂົວຫັກ ຢູ່ ບ້ານມິດສຳພັນ ເມືອງ ສນາມໄຊ ໃນວັນທີ 20 ມີນາ 2023 ຍ້ອນ ຣົຖແກ່ໄມ້ນ້ຳໜັກເກີນ.
ນັກຂ່າວ ພົລເມືອງ
ກໍຣະນີທີ່ມີຣົຖບັນທຸກໄມ້ທ່ອນ ນ້ຳໜັກເກີນ ເຮັດໃຫ້ຂົວ ເຂດບ້ານມິດສຳພັນ ເມືອງ ສນາມໄຊ ຫັກ ໃນວັນທີ 20 ມີນາ 2023 ທີ່ຜ່ານມາ ແລະ ເຈົ້າໜ້າທີ່ແຂວງອັດຕະປື ໃຫ້ສັມພາດຕໍ່ສື່ມວນຊົນວ່າ ໄມ້ທ່ອນຢູ່ໃນຣົຖ ນັ້ນ ເປັນໄມ້ແລວນ້ຳ ທີ່ຕັດຢູ່ເຂດປ່າໄມ້ທີ່ໄດ້ຮັບຜົລກະທົບຈາກ ເຂື່ອນເຊປຽນ ເຊນ້ຳນ້ອຍແຕກ, ແຕ່ ມີຊາວບ້ານຢ່າງໜ້ອຍ 3 ຄົນ ໄດ້ຢືນຢັນຕໍ່ວິທຍຸ ເອເຊັຽເສຣີ ວ່າ ໄມ້ທ່ອນຢູ່ນັ້ນຣົຖນັ້ນ ເປັນໄມ້ທີ່ຕັດຈາກປາສງວນເຊປຽນ, ບໍ່ແມ່ນໄມ້ທີ່ຕັດຈາກແລວນ້ຳ ຍ້ອນວ່າ ໄມ້ແລວນ້ຳ ບໍ່ມີແລ້ວ.
ຊາວບ້ານ ທ່ານນຶ່ງ ຜູ້ທີ່ຢູ່ໃກ້ກັບເຂດທີ່ມີການຕັດໄມ້ ທີ່ຂຶ້ນກັບເມືອງຊານໄຊ ແຂວງອັດຕະປື ໄດ້ກ່າວວ່າ: “ເຂົາເວົ້າວ່າຕັດຢູ່ແລວນ້ຳ ຕັດເທິງພູເທິງຜາ ວ່າ ມັນກາຍແລວນ້ຳແລວໃນແລ້ວ ໄມ້ຫັ້ນນ່າ ບໍ່ອຶດບ່ອນເຂົາຕັດ ມັນກາຍແລວນ້ຳແລ້ວ ໂອ້ຍ ມັນບໍ່ແມ່ນ ໄມ້ນຳນຳພູ ນຳອີ່ສັງແລ້ວ ນຳປ່ານຳດົງ ບ່ອນໃດມີໄມ້ເຂົາຕັດໝົດດຽວນີ້ ໂຕຂົວຫັກກະບໍ່ແມ່ນໄມ້ແລວນ້ຳດອກ ໄມ້ແລວນ້ຳ ມັນຕາຍໝົດ ມີແຕ່ໄມ້ດີດີຢືນຕົ້ນຫັ້ນແຫຼະເຂົາຕັດ.”
ການຕັດໄມ້ ຢູ່ປ່າສງວນ ກະມີ ນັບຕັ້ງແຕ່ພູທ່າແສງຈັນ ບ້ານທ່າແສງຈັນ ຈົນຮອດ ບ້ານໜອງຫີນ ເຂົາເຈົ້າຕັດທຸກມື້.
ມີການກ່າວອ້າງວ່າ ຕັດໄມ້ຢູ່ແລວນ້ຳ ແຕ່ ໃນຄວາມເປັນຈິງ ໄມ້ຢູ່ແລວນ້ຳບໍ່ມີໃຫ້ຕັດແລ້ວ. ຊາວບ້ານທ່ານນີ້ ໄດ້ກ່າວຕື່ມອີກວ່າ:
“ແຕ່ເຂົາວ່າຫັ້ນຕັດໄມ້ແລວນ້ຳ ແຕ່ວ່າພວກຕັດບໍ່ໄດ້ຕັດຢູ່ແລວນ້ຳ ພຽງແຕ່ມັນມີໄມ້ວ່າຊັ້ນຊາ ຢູ່ບ່ອນໃດເຂົາກະເອົາໃຫ້ໝົດ ນ້ຳອີ່ຫຼີບໍ່ມີໄມ້ດອກ ເຂົາກະບໍ່ໃຫ້ຕັດ ໄມ້ໂຕມັນຕາຍຢືນເຂົາກະບໍ່ຕັດ ເຂົາຕັດແຕ່ໄມ້ຢືນຕົ້ນດີດີ ນີ້ແຫຼະ.”
ຢູ່ເຂດພື້ນທີ່ປ່າສງວນ ໄດ້ມີການບຸກເບີກເສັ້ນທາງ ແລະ ຖນົນເຂົ້າໄປ ເພື່ອອຳນວຍຄວາມສະດວກໃນການແກ່ໄມ້ຈາກສນາມນຶ່ງ ອອກມາໄວ້ສນາມສອງ.
ຊາວ້ບານ ທ່ານນີ້ ກ່າວວ່າ:
“ຄັນມາກວດກາເບິ່ງໂຕຈິງຫັ້ນ ຊິເຫັນຢູ່ດອກ ທາງຣົຖຊະແລວມັນຂຶ້ນຮອດອີ່ສັງ ບ່ອນໃດມັນມີໄມ້ ມັນເຮັດທາງຂຶ້ນໄປໝົດ ທາງຂຶ້ນໄປໝົດ ຣົຖຈົກຣົຖດຸດເຂົາເຮັດຂຶ້ນ ຂັ້ນວ່າ ມາກວດມາເບິ່ງຫັ້ນເຫັນໂລດ ໄປບ່ອນໃດກະເຫັນກ້ອງທີບໂລດ ໄປນຳຫົນທາງກະເຫັນ ບໍ່ອຶດແຕ່ໄມ້ເຂົາ.”
ທີ່ຜ່ານ ປະຊາຊົນຢູ່ທ້ອງຖິ່ນ ເຄີຍເຂົ້າໄປບຸກເບີກເນື້ອທີ່ດິນ ເພື່ອເຮັດກະສິກັມ, ແຕ່ ຖືກເຈົ້າໜ້າທີ່ປັບໃໝເຂົາເຈົ້າ.
ຊາວບ້ານທ່ານນີ້ ກ່າວຕື່ມວ່າ:
“ຄັນປະຊາຊົນເຮັດບ່ອນໃດ ມັນກະຜິດໝົດ ຄັນລັດເຮັດຫັ້ນບໍ່ມີບ່ອນຜິດ ຄັນປະຊາຊົນໄປ ປ້ຳໄປຫຍັງ ໄປເລື່ອນ ໄປຫຍັງ ຫັ້ນ ຜິດໝົດ ຄັນຣັຖ ເຮັດແນວນັ້ນຫັ້ນບໍ່ຜິດ ຄັນໄປລາກໄປຂົນໄປສັງຫັ້ນ ຄັນວ່າ ປະຊາຊົນ ໄປຖາງປູກມັນປູກເຂົ້າຫັ້ນ ບາດເພິ່ນໄປຕັດໄມ້ທ່ອນໝົດໜ່ວຍຫັ້ນບໍ່ຜິດ.”
ຊາວບ້ານ ທີ່ຢູ່ໃກ້ເຂດຕັດໄມ້ອີກທ່ານນຶ່ງ ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ:
“ດັດໄມ້ຢືນຕົ້ນໂລດ ບໍ່ແມ່ນໃມ້ແລວນ້ຳດອກ ໄມ້ປ່າສງວນເຊປຽນ ກັບໄມ້ປ່າປ້ອງກັນເຂດບ້ານແບ່ງ ມັນຊິມີໄມ້ແລວນ້ຳມາແຕ່ໃສ ເວົ້າວ່າຕັດໄມ້ຂາຍໂລດສາ ມັນງ່າຍກວ່າ ໃມ້ໃຫມ່ໆ ບໍ່ມີດອກໄມ້ເກົ່າ.”
ມີການຕັດໄປຢູ່ເຂດປ່າສງວນແຫ່ງຊາຕເປຊຽນ ແຕ່ ເມື່ອມີການທັກທ້ວງການຂຶ້ນມາ ກໍມີການອ້າງວ່າ ເປັນໄມ້ແລວນ້ຳ.
ຊາວແຂວງອັດຕະປື ຜູ້ທີ່ຮູ້ເຫດການທ່ານນຶ່ງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ:
“ການຕັດໄມ້ແລວນ້ຳ ດຽວນີ້ ມາແຮງ ຢູ່ເຂດບໍລິເວນເຂື່ອນເຊປຽນ ເຊນ້ຳນ້ອຍ ແຕກຫັ້ນ ກະບໍ່ແມ່ນດອກ ຕັດມົ້ວກັນຫັ້ນແຫຼະ ໄມ້ແລວນ້ຳມີການຕັດຫຼາຍຄັ້ງແລ້ວ ແບບອ້າງວ່າ ຄືໄມ້ແລວທາງອິຫຍັງຫັ້ນແຫຼະ ແບບໄມ້ທາງແລວໄຟ ລະກະຕັດທາງໄປເລີຍ.”
ຊາວແຂວງອັດຕະປື ທ່ານນີ້ ກ່າວຕື່ມອີກວ່າ:
“ໄມ້ແລວນ້ຳຂັ້ນ ນ້ຳມາລະມັນຊິຖິ້ມຊື່ໆ ຄວາມໝາຍເພິ່ນຫັ້ນນ່າ ເຂົາສເນີໄປຕັດມົ້ວກັນອີກ ເຂດເມືອງສນາມໄຊ 97,000 ແມັດກ້ອນ ທາງການອະນຸມັດໃໝ່.”
ຣົຖໄມ້ທີ່ແກ່ໄມ້ອອກຈາກສນາມ 2 ຢູ່ ເມືອງສນາມໄຊ ແຂວງອັດຕະປື ທີ່ບັນທຸກນ້ຳໜັກເກີນ ເຮັດໃຫ້ຂົວຫ້ວຍກັນຈານ ຢູ່ບ້ານມິດສຳພັນ ຂ້າມໄປຫາ ບ້ານຫາດຍາວ ເມືອງສນາມໄຊ ຫັກ ຍ້ອນຣົຖແກ່ໄມ້ເກີດຂນາດ ໃນວັນທີ 20 ມານີ 2023 ທີ່ຜ່ານມາ ອີງຕາມຂໍ້ມູນຈາກແຂວງອັດຕະປື.
ເພຈຂ່າວທີ່ຊື່ວ່າ ອັດຕະປືອອນລາຍນ໌ ໄດ້ຣາຍງານ ໃນວັນທີ 22 ມີນາ ໂດຍ ອ້າງຄຳເວົ້າຂອງ ທ່ານ ບົວໄຂ ຊາພູທອນ ຫົວໜ້າໂຄງການເສັ້ນທາງ 18A ຜແນກໂຍທາທິການ ແລະ ຂົນສົ່ງ ແຂວງອັດຕະປື ວ່າ “ການຂົນສົ່ງໄມ້ ອອກຈາກສນາມສອງ ເຂົ້າໂຮງງານ ໂດຍແມ່ນໄມ້ທ່ອນ ທີ່ໄດ້ຮັບອະນຸຍາດຂຸດຄົ້ນຈາກເຂດແລວນ້ຳ ທີ່ໄດ້ຮັບຜົລກະທົບ ຈາກສັນເຂື່ອນເຊປຽນ-ເຊນ້ຳນ້ອຍແຕກ ເຊິ່ງມີບໍລິມາດຂົນສົ່ງໄມ້ທ່ອນທັງໝົດ 94,000 ແມັດກ້ອນ ໃນນັ້ນ ມີໄມ້ຈາກເມືອງສນາມໄຊ 97,000 ແມັດກ້ອນ.”
ທ່ານ ບົວໄຂ ຍັງກ່າວວ່າ:
“ໄມ້ທ່ອນອອກຈາກສະໜາມ 2 ເຂົ້າໂຮງງານ ໂດຍແມ່ນໄມ້ທ່ອນທີ່ຮັບການອະນຸຍາດ ຂຸດຄົ້ນຈາກເຂດແລວນໍ້າທີ່ຮັບຜົນກະທົບ ຈາກເຂືອນເຊປຽນ-ເຊນໍ້ານ້ອຍ ແຕກໃນຄັ້ງວັນທີ 23 ເດືອນ ກໍຣະກະດາ ປີ 2018 ທີ່ຜ່ານມາ.”
ແຂວງອັດຕະປື ໄດ້ອອກໂຄ່ຕ້າ ອະນຸຍາດໃຫ້ຫົວໜ່ວຍທຸຣະກິຈ 15 ຫົວໜ່ວຍ ຕັດໄມ້ປະມານ 100,000 ແມັດກ້ອນ. ບຸກຄົນທີ່ໄກ້ຊິດກັບເຈົ້າໜ້າທີ່ ແຂວງອັດຕະປື ໄດ້ກ່າວຕໍ່ວິທຍຸ ເອເຊັຽເສຣີ ວ່າ ຫົວໜ່ວຍທຸຣະກິຈໃດ ໂດຍສະເພາະໂຮງເລື່ອຍ ແລະ ບໍຣິສັດ ທີ່ຈ່າຍເງິນໃຫ້ເຈົ້າໜ້າທີ່ກ່ຽວຂ້ອງ ແຂວງອັດຕະປື ກໍຈະໄດ້ໂຄ່ຕ້າຕັດໄມ້ໂລດ.
ການອະນຸຍາດໃຫ້ມີການຕັດໄມ້ ຢູ່ແຂວງອັດຕະປື ໄດ້ມີຂຶ້ນນັບແຕ່ເດືອນພຶສຈິກາ 2022 ທີ່ຜ່ານມາ ຫຼັງຈາກທີ່ ມີຜ່ອນຜັນຄຳສັ່ງເລກທີ 15 ວ່າດ້ວຍ ການເພີ່ມທະວີ ຄວາມເຂັ້ມງວດ ໃນການຄຸ້ມຄອງ ແລະ ກວດກາການຂຸດຄົ້ນໄມ້ ເຄື່ອນຍ້າຍໄມ້ ແລະ ທຸຣະກິຈໄມ້ ໂດຍ ທ່ານ ທອງລຸນ ສີສຸລິດ ນາຍົກຣັຖມົນຕຣີ ໃນເວລານັ້ນ ເປັນຜູ້ອອກຄຳສັ່ງດັ່ງກ່າວ.
ບຸກຄົນທີ່ໃກ້ຊິດເຈົ້າໜ້າທີ່ ແຂວງອັດຕະປື ໄດ້ກ່າວວ່າ ການຕັດໄມ້ ມີ 3 ຈຸດ ຄື ຢູ່ ເຂດເຂື່ອນນ້ຳກົງ ເມືອງພູວົງ, ເຂື່ອນເຊກະໝານ ເມືອງຊານໄຊ, ແລະ ຢູ່ ເຂດ ເມືອງສນາມໄຊ. ມີການບຸກເບີກເສັ້ນທາງເຂົ້າໄປ ເພື່ອໃຫ້ຣົຖສາມາດແກ່ໄມ້ອອກມາຈາກ ສນາມນຶ່ງ ແລະ ສນາມສອງ ເຊິ່ງເຣີ່ມຕັດມາແຕ່ເດືອນຕຸລາ 2022 ເປັນຕົ້ນມາ. ມີການຕັດໄມ້ຢູ່ບ່ອນອື່ນເຂົ້າມາປົນໃສ່ ກັບໄມ້ທີ່ຕັດຢູ່ເຂດສັມປະທານ. ເຈົ້າໜ້າທີ່ກ່ຽວຂ້ອງທ່ານນຶ່ງ ໄດ້ກ່າວຕໍ່ວິທຍຸ ເອເຊັຽເສຣີວ່າ:
“ລະບົບການຕັດໄມ້ເຂົາເຮັດຈັ່ງຊີ້ ໄມ້ເຂື່ອນຢູ່ດອກ ຫາກເຂົາໄປຕັດຢູ່ບ່ອນອື່ນພຸ້ນ ມັນເປັນແນວນັ້ນດອກ ບ້ານເຮົາ ມັນໄປໝາຍຕົ້ນໝາຍຕໍກະຄືເກົ່າຫັ້ນລະ ເຂົາກະໄປຕັດຢູ່ບ່ອນອື່ນພຸ້ນ ແນວພະນັກງານຕິດຕາມເຂົາກະໄປເອົາເງິນຢູ່ຫັ້ນອີກ.”
ເຈົ້າໜ້າທີ່ກ່ຽວຂ້ອງທ່ານນີ້ ກ່າວວ່າ:
“ພວກທີ່ໄດ້ຮັບສັມປະທານຕັດໄມ້ ຂໍພຽງແຕ່ໄດ້ໃບອະນຸຍາດສັມປະທານ ຕັດໄມ້ຈາກຣັຖບານ ເຖິງວ່າ ໄມ້ຢູ່ເຂດສັມປະທານບໍ່ມີກໍຕາມ ເຂົາເຈົ້າຈະໄປຕັດບ່ອນອື່ນແລ້ວ ແກ່ເຂົ້າມາ.”
ເຖິງຢ່າງໃດກໍຕາມ, ທ່ານ ເລັດ ໄຊຍະພອນ ເຈົ້າຂອງອັດຕະປື ກໍບໍ່ຕິດເສດວ່າ ບໍ່ມີການອະນຸມັດຕັດໄມ້. ທີ່ຜ່ານມາ ທ່ານ ໄດ້ກ່າວຕໍ່ວິທຍຸ ເຊັຽເສຣີ ວ່າ:
“ອັນນີ້ແມ່ນຂໍ້ມູນປອມ ພວກຄົນບໍ່ດີ ເຂົາຫາເຣື່ອງ.”
ການຂຶ້ນແຜນເຮັດໂຄງການ ເພື່ອເປັນຂໍ້ອ້າງໃນການຕັດໄມ້ ຢູ່ແຂວງອັດຕະປື ຍັງຄົງເກີດຂຶ້ນ ຢ່າງຕໍ່ເນື່ອງ. ສະເພາະຢູ່ເມືອງສນາມໄຊ, ບຸກຄົນທີ່ໃກ້ຊິດເຈົ້າໜ້າທີ່ ແຂວງອັດຕະປື ໄດ້ກ່າວວ່າ: ທາງການແຂວງອັດຕະປື ອະນຸຍາດ ໃຫ້ບໍຣິສັດ ບໍຣິສັດ ເອກຊົນ ເຂົ້າມາຕັດໄດ້ ຢູ່ເຂດເມືງສນາມໄຊ ແຂວງອັດຕະປື ໂດຍຕັ້ງໂຄງການ ພັດທະນານິເວດ ກະສິກັມ ທັນສໄມຄົບວົງຈອນ ແລະ ເຂດປູກປ່າໄມ້ ເປັນສິນຄ້າ ໃນເນື້ອທີ່ປະມານ 1,500 ເຮັກຕ້າຣ໌, ແຕ່ໃນຄວາມເປັນຈິງ ກໍເປັນພຽງແຕ່ຂຶ້ນແຜນ ເພື່ອເຂົ້າມາຕັດໄມ້ອອກໄປຂາຍເທົ່ານັ້ນ ແລະ ປະຊາຊົນຍັງບໍ່ເຊື່ອວ່າ ໂຄງການດັ່ງກ່າວຈະເກີດຂຶ້ນ ຫຼືບໍ່ ຫຼັງຈາກທີ່ມີການຕັດໄມ້ອອກໝົດແລ້ວ.
ຜແນກກະສິກັມ ແລະ ປ່າໄມ້ ແຂວງອັດຕະປື ໄດ້ຂຽນໃບສເນີ ເຖິງກະຊວງກະສິກັມ ແລະ ປ່າໄມ້ ໃນວັນທີ 18 ກໍຣະກະດາ 2022 ເພື່ອໃຫ້ຮັບຮອງເອົາ ບໍຣິສັດ ອິນທະວົງ ການຄ້າຂາອອກ-ຂາເຂົ້າ ຈຳກັດຜູ້ດຽວ ເຂົ້າເກັບກູ້ທ້ອນໂຮມ ໄມ້ຢູ່ໃນເຂດສັມປະທານ ໂຄງການພັດທະນານິເວດ ກະສິກັມ ທັນສໄມ ຄົບວົງຈອນ ແລະ ເຂດປູກໄມ້ເປັນສິນຄ້າ ໃນເນື້ອທີ່ປະມານ 1,500 ເຮັກຕ້າຣ໌.
ຕໍ່ມາ ກະຊວງກະສິກັມ ແລະ ປ່າໄມ້ ໄດ້ອອກແຈ້ງການເຖິງ ຫົວໜ້າຜແນກກະສິກັມ ແລະ ປ່າໄມ້ ແຂວງອັດຕະປື ໃນວັນທີ 19 ກໍຣະກະດາ 2022 ທີ່ຜ່ານມາ. ແຈ້ງການໄດ້ລະບຸວ່າ: ໃຫ້ຜແນກກະສິກັມ ແລະ ປ່າໄມ້ ແຂວງອັດຕະປື ອອກອະນຸຍາດ ໃຫ້ບໍຣິສັດ ອິນທະວົງ ການຄ້າ ຂາອອກ-ຂາເຂົ້າ ຈຳກັດຜູ້ດຽວ ເພື່ອດຳເນີນການຂຸດຄົ້ນໄມ້ ຈຳນວນເກືອບ 80,000 ຕົ້ນ ເທົ່າກັບ ບໍລິມາດ 38,000 ແມັດກ້ອນ ອອກຈາກເຂດສັມ ປະທານຂອງໂຄງການພັດທະນານິເວດກະສິກັມ ທັນສໄມ ຄົບວົງຈອນ ແລະ ເຂດພັທນາໂຄງການປູກໄມ້ເປັນສິນຄ້າ ໃນເນື້ອທີ່ 1,500 ເຮັກຕ້າຣ໌ ຢູ່ ເມືອງສນາມໄຊ ແຂວງອັດຕະປື.
ແຈ້ງການຍັງໄດ້ລະບຸອີກວ່າ: ໃຫ້ຜແນກກະສິກັມ ແລະ ປ່າໄມ້ ແຂວງອັດຕະປື ເປັນເຈົ້າການ ແລະ ນຳສເນີ ຄະນະນຳແຂວງ ແລະ ແຕ່ງຕັ້ງ ຄະນະຮັບຜິດຊອບ ຄຸ້ມຄອງການຂຸດຄົ້ນໄມ້ ຢູ່ເຂດສັມປະທານຂອງໂຄງການພັດທະນາລະບົບສິເວດ ກະສິກັມທັນສໄມ ຄົບວົງຈອນ ແລະ ເຂດພັດທະນາ ໂຄງການປູກໄມ້ເປັນສິນຄ້າ ໃນເນື້ອທີ່ 1,500 ເຮັກຕ້າຣ໌ ຢູ່ ເມືອງສນາມໄຊ ແຂວງອັດຕະປື.
ເພື່ອເຮັດໜ້າທີ່ຄຸ້ມຄອງ, ຕິດຕາມ ແລະ ກວດກາ ໃຫ້ຖືກຕ້ອງຕາມລະບຽບການ, ຮັບປະກັນ ແລະ ຫຼີກເວັ້ນ ບໍ່ໃຫ່ມີການສວຍໂອກາດ ລັກລອບຂຸດຄົ້ນໄມ້, ເກັບກູ້ ແລະ ທ້ອນໂຮມໄມ້ຈາກບ່ອນອື່ນມາຕື່ມໃສ່ ແລະ ຂຸດຄົ້ນນອກເຂດ ໄດ້ຮັບອະນຸຍາດ ຢ່າງເດັດຂາດ ອີງຕາມແຈ້ງການ.
ນອກຈາກນີ້ ຍັງມີ ຫົວໜ່ວຍທຸຣະກິຈ ລວມທັງໂຮງເຮື່ອຍ ແລະ ບໍຣິສັດ ທີ່ໄດ້ຮັບໂຄ່ຕ້າ ຫຼື ໃບອະນຸຍາດຕັດໄມ້ ເຊິ່ງລວມກັນທັງໝົດແລ້ວ ແຂວງອັດຕະປື ໄດ້ອະນຸຍາດໃຫ້ຕັດໄມ້ປະມານ 100,000 ແມັດກ້ອນ ອີງຕາມບຸກຄົນທີ່ໃກ້ຊິດ ເຈົ້າໜ້າທີ່ລະດັບສູງ ແຂວງອັດຕະປື.