ເກັບຄ່າຣົຖ ເຂົ້າ-ອອກ ສະຖານີຣົຖໄຟ ນະຄອນຫຼວງ

ນັບຕັ້ງແຕ່ວັນທີ່ 12 ກັນຍາ ປີ 2022 ເປັນຕົ້ນມາ ປ້ອມເກັບຄ່າບໍຣິການຝາກຣົຖ ຫຼື ຄ່າຜ່ານເຂົ້າໄປຮັບ-ສົ່ງຜູ້ໂດຍສານ ຢູ່ສະຖານີຣົຖໄຟ ນະຄອນຫຼວງວຽງຈັນ ໄດ້ມີການ ເກັບເງິນຈາກຣົຖທຸກຄັນ ທີ່ແລ່ນເຂົ້າສະຖານີຣົຖໄຟດັ່ງກ່າວ ເຖິງແມ່ນວ່າ ຣົຖໃຫຍ່ຫຼາຍຄັນ ໄດ້ແລ່ນເຂົ້າໄປແວ່ສົ່ງຜູ້ໂດຍສານ ແລ້ວແລ່ນອອກຈາກ ສະຖານີຣົຖໄຟ ໂດຍບໍ່ໄດ້ຈອດ ຄ້າງຊົ່ວຄາວ ກໍຕ້ອງໄດ້ເສັຍຄ່າບໍຣິການຝາກຣົຖ ທຸກກໍຣະນີ ເຊິ່ງໄດ້ເສັຍຄ່າບໍຣິການ 10,000 ກີບຕໍ່ຄັ້ງ ແລະບາງຄົນ ກໍໄດ້ເສັຍຄ່າບໍຣິການຮອດ 30,000 ກີບ ແລະເມື່ອວັນທີ່ 12 ກັນຍາ ທີີ່ຜ່ານມານີ້ ຜູ້ປະກອບການຣົຖຮັບ-ສົ່ງນັກທ່ອງທ່ຽວ ທ່ານນຶ່ງ ໄດ້ບັລຍາຍ ຜ່ານສື່ສັງຄົມອອນລາຍນ໌ ວ່າ:

“ຂ້ອຍໄດ້ແລ່ນໄປສົ່ງຄົນ ຢູ່ສະຖານີຣົຖໄຟ ນະຄອນຫຼວງວຽງຈັນ ຂ້ອຍຕ້ອງເສັຍເງິນ 30,000 ກີບ ທັງທີ່ເຄີຍໄປແວ່ ສົ່ງຜູ້ໂດຍສານ ຢູ່ສນາມບິນສາກົລວັດໄຕ ຫຼືດ່ານຂົວມິຕພາບລາວ-ໄທຍ ແຫ່ງທີ່ 1 ຮວມທັງ ສະຖານີ ຂົນສົ່ງສາຍໃຕ້ ແລະສາຍເໜືອ ກໍບໍ່ໄດ້ເສັຍຄ່າບໍຣິການຈັກເທື່ອ ແຕ່ມາສົ່ງຄົນ ຢູ່ສະຖານີຣົຖໄຟ ພັດເສັຍເງິນ 30,000 ກີບ ຈຶ່ງຮູ້ສຶກເສັຍໃຈ, ຜິດຫວັງ ແລະເສັຍຄວາມຮູ້ສຶກພ້ອມ.”

ກ່ຽວກັບເຣື່ອງນີ້ ຜູ້ປະກອບການຣົຖແທັກຊີ້ ຢູ່ນະຄອນຫຼວງວຽງຈັນ ທ່ານນຶ່ງ ກ່າວວ່າ ທ່ານເອງ ກໍເຄີຍເສັຍຄ່າບໍຣິການ ຜ່ານເຂົ້າໄປສະຖານີຣົຖໄຟ ນະຄອນຫຼວງວຽງຈັນ ລາຄາ 15,000 ກີບ ເຖິງແມ່ນວ່າໄດ້ເຂົ້າໄປແວ່ສົ່ງຜູ້ໂດຍສານ ຢູ່ສະຖານີດັ່ງກ່າວ ໂດຍບໍ່ໄດ້ຈອດຮອດ 3 ນາທີ ເລີຍກໍຕາມ ເຊິ່ງທ່ານເອງກໍເຫັນວ່າ ເປັນສິ່ງທີ່ບໍ່ເໝາະສົມ ແລະ ທັງເປັນການຂູດຮີດ ແບບທາງອ້ອມ ແລະກໍມີຊາວລາວຫຼາຍຄົນ ສະແດງຄວາມເຫັນທີ່ບໍ່ດີ ຕໍ່ການເກັບເງິນ ໃນຮູບແບບ ດັ່ງກ່າວ ຢູ່ໃນສື່ສັງຄົມອອນລາຍນ໌ເວລານີ້.

ດັ່ງທ່ານກ່າວຕໍ່ ວິທຍຸເອເຊັຽເສຣີ ໃນວັນທີ່ 14 ກັນຍາ ນີ້ວ່າ:

“ຫຼາຍຄົນທ້ວງຢູ່. ແບບມັນບໍ່ຢາກເໝາະສົມ. ຫຼາຍຄົນທ້ວງຢູ່ ເພິ່ນຫາກໍເກັບ ໄດ້ 2 ມື້ນີ້ນ່າ ຕອນນີ້ເຂົາເກັບ 15,000 ນ່າ ເປັນຣົຖແທັກຊີ້ ເຂົາເກັບ 15,000.”

ໃນຂະນະທີ່ ຜູ້ປະກອບການຣົຖຮັບ-ສົ່ງ ນັກທ່ອງທ່ຽວ ອີກທ່ານນຶ່ງ ທີ່ຫາກໍຖືກເກັບເງິນ ຢູ່ປ້ອມ ເກັບຄ່າບໍຣິການ ຕໍ່ໜ້າສະຖານີຣົຖໄຟ ນະຄອນຫຼວງວຽງຈັນ ກ່າວວ່າ ທ່ານເອງ ຫາກໍຖືກ ເກັບເງິນຄ່າບໍຣິການ 10,000 ກີບ ທັ້ງໆທີ່ແວ່ໄປສົ່ງ ຜູ້ໂດຍສານຂຶ້ນຣົຖໄຟ ແລ້ວຟ້າວຂັບຣົຖອອກ ຈາກສະຖານີຣົຖໄຟ.

ດັ່ງທ່ານກ່າວວ່າ:

“ໂອ້! 10,000 ກີບຕໍ່ຄັນເດີ້ເຈົ້າ. ແມ່ນເຮົາໄປສົ່ງເຂົາທາງຣົຖໄຟຫັ້ນ ເຂົາເກັບຄັນລະ 10,000 ກີບ ແມ່ນໄປສົ່ງແປບນຶ່ງກະເສັຍ 10,000 ກີບຄືກັນ ຈອດຄ້າງຄືນລະ 80,000 ກີບ.”

ໃນຂະນະດຽວກັນ ຜູ້ປະກອບການຣົຖຮັບ-ສົ່ງນັກທ່ອງທ່ຽວ ຢູ່ນະຄອນຫຼວງວຽງຈັນ ອີກທ່ານນຶ່ງ ກໍຮູ້ສຶກບໍ່ພໍໃຈ ທີ່ຖືກເກັບເງິນຄ່າບໍຣິການ 10,000 ກີບ ທັ້ງໆທີ່ບໍ່ໄດ້ຈອດຣົຖ ຢູ່ສະຖານີຣົຖໄຟ ເປັນເວລາດົນ ແລະໄດ້ແນະນໍາວ່າ ຄັນຢາກເກັບຄ່າບໍຣິການແທ້ໆ ກໍຢາກໃຫ້ຄິດລາຄາພຽງແຕ່ 3,000 ກີບ ຫຼື 5,000 ກີບ ສໍາລັບ ຜູ້ທີ່ແວ່ ສົ່ງຜູ້້ໂດຍສານຊື່ໆ.

ດັ່ງທ່ານ ກ່າວວ່າ:

“ບໍ່ຢາກພໍໃຈ ຂ້ອຍກະບໍ່ພໍໃຈໂອ້. ບາງເທື່ອນີ້ຂ້ອຍໄປສົ່ງລູກຄ້າ ໄປສົ່ງປຸບ ເຮົາກະຂີ່ຣົຖຄືນຊິນ່າ. ເສັຍເງິນ 10,000 ແລ້ວ 5,000 ບໍ່ ເຫຼືອ 3,000 ນີ້ ກະໂອເຄຢູ່. ເຂົ້າໄປຮັບພີ່ນ້ອງ ອີ່ຫຍັງກະຢ່າ ຂີ່ເຂົ້າຜ່ານດ່ານເຂົ້າໄປ ລະເພິ່ນຈະເກັບ ປີ້ນຶ່ງ 10,000.”

ທາງດ້ານຜູ້ທີ່ຮູ້ ແລະຕິດຕາມເຣື່ອງນີ້ ກ່າວວ່າ ການເຮັດແນວດັ່ງກ່າວ ຂອງບໍຣິສັດ ທາງຣົຖໄຟລາວ-ຈີນ ຈໍາກັດ ແຮ່ງຊິເຮັດໃຫ້ເປັນການ ທໍາລາຍການທ່ອງທ່ຽວ ເນື່ອງຈາກ ອາຈເຮັດໃຫ້ບັນດາຜູ້ປະກອບການ ຮັບ-ສົ່ງນັກທ່ອງທ່ຽວ ບໍ່ຢາກໄປສົ່ງນັກທ່ອງທ່ຽວ ຫຼືຜູ້ໂດຍສານຢູ່ສະຖານີຣົຖໄຟ ນະຄອນຫຼວງວຽງຈັນອີກ ຍ້ອນບໍ່ຄຸ້ມຄ່າກັບຄ່າຈ້າງ ຂອງພວກເຂົາເຈົ້າ.

ດັ່ງທ່ານ ກ່າວວ່າ:

“ເປັນການທໍາລາຍ ການທ່ອງທ່ຽວແດ່ ເພາະວ່າ ແຂກຄົນມາ ສົມມຸດວ່າ ເອົາໄປຈ້າງຣົຖສາມລໍ້ໄປສົ່ງ ເອົານໍາແຂກ 30,000 ສາ ເຂົ້າໄປຫັ້ນ ກະໄປຈ່າຍໃຫ້ເຂົາເຈົ້າ ລະກໍບໍ່ມີຫຍັງ ເຂົາເຈົ້າກະບໍ່ຢາກໄປສົ່ງຄົົນ ບໍ່ຢາກໄປສົ່ງລູກຄ້າ, ເຂົາເຈົ້າໄປສົ່ງລູກຄ້າໃຫ້ເຈົ້າ ລະເອົາຄົນໄປຂີ່ຣົຖໄຟ ມັນເປັນຕ່ອງໂສ້ທຸຣະກິຈຫັ້ນນ່າ.”

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ຫາບໍຣິສັດ ທາງຣົຖໄຟລາວ-ຈີນ ຈໍາກັດ ແລະບໍຣິສັດ ສ່ຽນຝົງ ການບໍຣິການ ບໍ່ເຕັນ ຈໍາກັດ ຫຼື (Boten Frontier Service Limited) ເພື່ອສອບຖາມຣາຍລະອຽດເພີ່ມຕື່ມ ແຕ່ບໍ່ມີເຈົ້າໜ້າທີ່ຄົນໃດ ສາມາດໃຫ້ສັມພາດໄດ້.

ແຕ່ເຖິງຢ່າງໃດກໍຕາມ ອະດີຕເຈົ້າໜ້າທີ່ລາວທ່ານນຶ່ງ ເຫັນວ່າ ການທີ່ ບໍຣິສັດທາງຣົຖໄຟ ລາວ-ຈີນ ຈໍາກັດ ໄດ້ມີການເກັບເງິນ ຣົຖທຸກປະເພດ ທີ່ເຂົ້າໄປເຂດສະຖານີຣົຖໄຟ ນະຄອນຫຼວງວຽງຈັນ ທັງແບບໄປຈອດຊົ່ວຄາວ ຫຼື ແວ່ສົ່ງຜູ້ໂດຍສານຊື່ໆນັ້ນ ກໍເປັນການເໝາະສົມແລ້ວ ຍ້ອນຣົຖທຸກຄັນ ທີ່ເຂົ້າໄປເຂດສະຖານີຣົຖໄຟ ຕ້ອງໄດ້ປະຕິບັດຕາມກົດຂອງເຂົາເຈົ້າ ແລະຕ້ອງໄດ້ເສັຍເງິນ ເພື່ອເປັນຄ່າເບິ່ງແຍງ ຄວາມເປັນລະບຽບຮຽບຮ້ອຍ.

ດັ່ງທ່ານ ກ່າວວ່າ:

“ເອີ່! ການຄຸ້ມຄອງຫັ້ນຊື່ໆ ຄືກັນກັບບ່ອນອື່ນໆຫັ້ນແຫຼະ. ຂີ່ໄປແລ້ວ ລະແມ່ນເຂົ້າລານຈອດຂອງເຂົາ ແນ່ນອນແຫຼະອັນນັ້ນນ່າ ຄັນແລ່ນເຂົ້າໄປບ່ອນທາງໃນພຸ້ນ ມັນຕ້ອງໄດ້ເສັຍ ບ່ອນຝາກຣົຖ ພຸ້ນຫັ້ນນ່າ.”

ຕາມປົກກະຕິແລ້ວ ໃນຫຼາຍປະເທດ ຖ້າຫາກຜູ້ໂດຍສານ ຫຼື ຜູ້ທີ່ຈະໄປໃຊ້ບໍຣິການ ໃນສະຖານີ ໂດຍສານ ບໍ່ວ່າຈະເປັນສະຖານີຣົຖໄຟ ຫຼືສະຖານີຣົຖໂດຍສານຕ່າງໆ ພ້ອມທັງສນາມບິນ ຈະບໍ່ມີການເກັບຄ່າຜ່ານສະຖານີ ເປັນຕົ້ນ ຢູ່ປະເທດໄທຍ ແລະ ສະຫະຣັຖອາເມຣິກາ.