ນັກລົງທຶນຈີນສົນໃຈບຶງ ທາຕຫຼວງ

ກຸ່ມນັກ ທຸຣະກິດ ຈີນ ທີ່ ດຳເນີນ ທຸຣະກິດ ໃນໄທ ໄດ້ເຂົ້າມາ ສຶກສາ ຄວາມ ເປັນໄປໄດ້ ໃນ ອະນາຄົດ ໃນການ ລົງທຶນ ຢູ່ເຂດ ເສຖກິດ ພິເສດ ບຶງ ທາດຫລວງ ນະຄອນຫລວງ ວຽງຈັນ. ຕົວແທນ ຈາກ ກຸມ ດັ່ງກ່າວ 15 ຄົນ ທີ່ເປັນ ເຈົ້າຂອງ ໂຮງງານ ໃນໄທ ທີ່ຜລິດ ສິນຄ້າ ປະເພດ ຕ່າງໆ ເຊັ່ນເກືອ ເຂົ້າສານ ໂຮງງານ ຫລອມເຫລັກ ແລະ ທຸຣະກິດ ທີ່ ກ່ຽວພັນ ກັບ ອຸປກອນ ກໍ່ສ້າງ.

ເຈົ້າຫນ້າທີ່ ລາວ ເວົ້າວ່າ ກຸ່ມນັກ ການຄ້າຈີນ ສົນໃຈ ໃນການ ລົງທຶນ ໃນເຂດ ເສຖກິດ ພິເສດ ດັ່ງກ່າວ ແຕ່ຕ້ອງການ ເວລາ ໃນການ ສຶກສາ ຄົ້ນຄວ້າ ກ່ອນ. ຫລັງຈາກ ມາຮອດ ນະຄອນຫລວງ ວຽງຈັນ ໃນວັນຈັນ ກຸ່ມນັກ ທຸຣະກິດ ຈີນ ຖືກຕ້ອນຮັບ ຈາກ ເຈົ້າຄອງ ກຳແພງ ນະຄອນ ວຽງຈັນ ທ່ານ ສຸກັນ ມະຫາຣາດ ແລະ ເຈົ້າຫນ້າທີ່ ຣະດັບ ສູງ ຂອງລາວ ຫລາຍທ່ານ ໃນເຂດ ເສຖກິດ ພິເສດ ສອງຝ່າຍ ໄດ້ປືກສາ ຫາລືກັນ ກ່ຽວກັບ ໂອກາດ ການລົງທຶນ ໃນລາວ.

ທ່ານ ສຸກັນ ໄດ້ກ່າວ ຕໍ່ກຸ່ມ ນັກ ທຸຣະກິດ ຈີນວ່າ ເຂດ ເສຖກິດ ພິເສດ ບຶງທາດຫລວງ ສ້າງຂຶ້ນ ເພື່ອຊ່ອຍ ພັທນາ ເສຖກິດ ແລະ ສັງຄົມ ໃນລາວ ເພື່ອໃຫ້ລາວ ກາຍເປັນ ປະເທດ ທີ່ ພັທນາ ຢ່າງວ່ອງໄວ.