ဝူဟန်က တရားမဝင်မြန်မာအလုပ်သမားတွေပြန်ချင်နေပြီး သံရုံးကကူညီမည်ဟုဆို

ကိုရိုနာဗိုင်းရပ်စ်ရောဂါအများဆုံးဖြစ်နေတဲ့ တရုတ်နိုင်ငံ ဝူဟန်မြို့မှာ တရားမဝင်နေထိုင်အလုပ်လုပ်နေရတဲ့ မြန်မာနိုင်ငံသားရာပေါင်းများစွာရှိနေပြီး၊ တချို့က မြန်မာပြည်ပြန်ချင်ပေမယ့် ပြန်နိုင်အောင် ကူညီမယ့်သူမရှိလို့ အခက်အခဲဖြစ်နေတယ်လို့ RFA က စုံစမ်းသိရှိရပါတယ်။

မြန်မာနိုင်ငံကနေ ပညာတော်သင်အဖြစ်နဲ့ရောက်နေတဲ့ ကျောင်းသား ၆၃ ယောက်ကို ပြန်ခေါ်ဖို့ ဘေဂျင်းမြို့ မြန်မာသံရုံးကတရုတ်အစိုးရနဲ့ ဆက်သွယ်ပြီးဆောင်ရွက်နေတယ်လို့ ကြေညာထားတဲ့အတွက် အလုပ်လုပ်နေတဲ့ မြန်မာနိုင်ငံသားတွေအတွက်ကိုရော ဘယ်လိုဆောင်ရွက်ပေးမယ်ဆိုတဲ့ အစီအစဉ် သိချင်နေကြတယ်လို့ ဝူဟန်မြို့က မြန်မာအလုပ်သမားတွေက ပြောကြပါတယ်။ အလုပ်သမားတွေက သူတို့မှာ တရားမဝင်အလုပ်လုပ်နေရတဲ့အတွက် အပြင်မထွက်ရဲသလို၊ လောလောဆယ်မှာတော့ အလုပ်ရုံတွေပိတ်ထားပြီး၊ သူတို့အလုပ်ရှင်တွေ ပေးထားတဲ့ အစားအသောက်တချို့နဲ့ ရှင်သန်နေထိုင်ကြတယ်လို့ ပြောပါတယ်။

တရားမဝင်ရောက်နေတဲ့ မြန်မာအလုပ်သမားအများစုက တရုတ်မှတ်ပုံတင်မရှိတဲ့အတွက် တယ်လီဖုန်းဆင်းကတ်တွေ ဝယ်ခွင့်မရှိလို့ အဆက်အသွယ်တွေလဲ ခက်ကြတယ်လို့ ပြောပါတယ်။

မြန်မာကျောင်းသားတွေကိုတော့ အစောဆုံးအနေနဲ့ဖေဖော်ဝါရီလ ၁ ရက်နေ့ညမှာ နေရပ်ပြန်ပို့နိုင်မယ်လို့ မျှော်လင့်ထားတယ်လို့လဲ သံရုံးက ဒီနေ့ကြေညာထားပါတယ်။

ဒါနဲ့ပတ်သက်လို့ တရုတ်နိုင်ငံဆိုင်ရာမြန်မာသံရုံးရဲ့ ဒုတိယအတွင်းဝန်ဦးစိုးပြည့်ဝင်းကို RFA က ဆက်သွယ်မေးမြန်းတဲ့အခါမှာတော့၊ သူတို့ဆီကိုလဲ အလုပ်သမားတချို့ ဆက်သွယ်လာတာရှိပြီး၊ အလုပ်သမားတွေက ဘယ်မှာရှိနေတယ်၊ ဘယ်လိုဆက်သွယ်ရမယ်ဆိုတာ သံရုံးကို ပြောမယ်ဆိုရင် လိုအပ်တာတွေ ဆက်ပြီးဆောင်ရွက်ပေးမယ်လို့ပြောပါတယ်။ သံရုံးအနေနဲ့ အလုပ်သမားတွေရဲ့ အချက်အလက်သိရတဲ့အခါ မြန်မာနိုင်ငံသားမှန်ကန်ကြောင်း အထောက်အထားထုတ်ပေးမှာ ဖြစ်သလို၊ နေရပ်ပြန်ဖို့ကိုလဲ တရုတ်အာဏာပိုင်တွေနဲ့ ပူးပေါင်းဆောင်ရွက်ပေးမယ်လို့ ပြောပါတယ်။

ပေကျင်းမြို့ မြန်မာသံရုံးဒုတိယအတွင်းဝန် ဦးစိုးပြည့်ဝင်းကို RFA ဝိုင်းတော်သား ကိုနေရိန်ကျော် ဆက်သွယ်မေးမြန်းထားပါတယ်။