ကိုယ်ထိလက်ရောက်ကျူးလွန်သူကို အရေးယူပေးဖို့ YBS ယာဉ်မောင်း တရားရုံးထံလျှောက်ထား

YBS  20 ယာဉ်မောင်း တစ်ယောက်ကို ကိုယ်ထိလက်ရောက်ကျုးလွန်ခဲ့တယ်ဆိုပြီး YBS 20 ယာဉ်လိုင်းပိုင်ရှင် ဦးကျော်နေဝင်းနဲ့ ဦးဇွဲနေဝင်းတို့ကို တစ်စုံတစ်ယောက်အား နာကျင်စေမှုပုဒ်မ  ၃၂၃ နဲ့ တရားစွဲဆိုဖို့ကို လှိုင်သာယာမြို့နယ် တရားရုံးက လက်ခံလိုက်ပါတယ်။

အဲဒီအမှုနဲ့ပတ်သက်ပြီး တိုင်ကြားခံရသူတွေကိုပါ ဆင့်ခေါ်သွားမှာဖြစ်တဲ့အကြောင်း တရားသူကြီး က ပြောလိုက်တယ်လို့  ကားမောင်းသမားဘက်က လိုက်ပါကူညီပေးနေတဲ့ အလုပ်သမားအရေးလှုပ်ရှားသူ ဦးမောင်မောင်ဟန် က ပြောပါတယ်။

"တွဲဖက်တရားသူကြီး ၁ ကနေ ရှင်းပြပါတယ်။ ကိုအောင်မြတ်ရဲ့အမှုက နှစ်ဖက်ရဲ့ စွဲဆိုချက်တွေ ကို ပြန်လည်တင်ပြချက်နဲ့ တရားသူကြီးကနေ ၂၉၄/၃၂၃ လူတဖက်သားကို ထိခိုက်ဒဏ်ရာရလိုမှု၊ အဲဒါကို ဆင့်ခေါ်ပါမယ်တဲ့။"

ပြီးခဲ့တဲ့မေလတုန်းက ယာဉ်မတော်တဆ ထိခိုက်တာကြောင့် ကားပျက်စီးတယ်ဆိုပြီး ယာဉ်မောင်း ဦးအောင်မြတ် ကို ယာဉ်လိုင်းပိုင်ရှင် ဦးကျော်နေဝင်းနဲ့ ဦးဇွဲနေဝင်းတို့က ကိုယ်ထိလက်ရောက်ကျူးလွန်ခဲ့တယ်ဆိုပြီး လှိုင်သာယာ မြို့နယ် တရားရုံးမှာ  ဦးတိုက်လျှောက်ထားခဲ့တာဖြစ်ပါတယ်။

ယာဉ်ထိခိုက်တာကြောင့် အလုပ်ထုတ်ခံလိုက်ရတဲ့ ဦးအောင်မြတ်နဲ့ ဦးကျော်မင်းထွန်း အတွက် အလုပ်ထုတ်နစ် နာကြေး၊ လုပ်ခလစာကျန်ငွေနဲ့ အလုပ်ထုတ်မယ်ဆိုရင် ၁ လ ကြိုတင်အကြောင်းမကြားတဲ့ လျော်ကြေးတွေအတွက် မြို့နယ်ညှိနိုင်းဖျဉ်ဖြေရေးရုံးကို တိုင်ကြားခဲ့ပါတယ်။ YBS 20 ယာဉ်လိုင်းဘက်ကနေ လုပ်ခလစာကျန်ငွေသာပေး မယ်ဆိုတဲ့အတွက် အလုပ်သမား ခုံသမာဓိကို ထပ်တိုင်ကြားထားတယ်လို့ ဦးမောင်မောင်ဟန်က ပြောပါတယ်။

ယာဉ်မောင်း ဦးကျော်မင်းထွန်း နစ်နာကြေး ၃ ခုအတွက် ငွေကျပ် ၇ သိန်း ၄ သောင်း၊ ဦးအောင်မြတ်အတွက် ၅ သိန်း ၉ သောင်းကို YBS 20 ယာဉ်လိုင်းကပေးဖို့ တောင်းဆိုထားတာလို့ ပြောပါတယ်။