ဆန္ဒပြ အလုပ်သမားများ ခြိမ်းခြောက်ခံလာရ

အလုပ်သမားတွေဘက်က ငြိမ်းငြိမ်းချမ်းချမ်း ဆန္ဒပြနေပေမဲ့ အလုပ်ရှင်အများစုဘက်က ခြိမ်းခြောက်တဲ့ ပုံစံမျိုးတွေနဲ့ တုံ့ပြန်ကြတာ တွေ့ရတယ်လို့ မနေ့က လှိုင်သာယာစက်မှုဇုန်မှာ ဆန္ဒပြနေတဲ့ စက်ရုံတွေထဲက စက်ရုံ (၅) ရုံကို သွားရောက်ကြည့်ရှု ကူညီခဲ့တဲ့ ၈၈ မျိုးဆက် ကျောင်းသားများအဖွဲ့က မသက်သက်အောင်က အခုလို ပြောပါတယ်။

" စက်ရုံကနေအပြင်ဘက်ပေါ့နော်၊ စက်ရုံဝင်း အပြင်ဘက်ကနေပြီးတော့ သူတို့တွေ ထိုင်ပြီးတော့ ငြိမ်းငြိမ်းချမ်းချမ်းနဲ့ပဲ ဆန္ဒပြ တောင်းဆိုနေကြတာရှင့်။ ကျွန်မမြင်ရသလောက်တော့လေ အလုပ်ရှင်တွေဘက်က ညှိနှိုင်းမှုအား၊ ညှိနှိုင်းတယ်ဆိုတာ နည်းနည်း အားနည်းတယ်ရှင့်။ ဘယ်လိုဖြစ်နေလဲဆိုတော့ ညှိနှိုင်းတဲ့ စက်ရုံတွေကလည်း ညှိနှိုင်းတယ်။ မညှိနှိုင်းတဲ့ စက်ရုံတွေက ဒီအတိုင်း ထားထားတယ်ပေါ့နော်။ ဘာမှမညှိဘူး။ အဒီလိုမျိုး ဖြစ်နေတယ်။ ညှိနှိုင်းတဲ့ စက်ရုံတွေကျတော့လည်း ဥပမာ-သူတို့တောင်းတဲ့ သုံးသောင်းဆိုရင် ဒီစက်ရုံမှာဆိုရင် ၈၀၀၀ တိုးပေးတယ်။ ဆန်နီမှာဆိုရင် တစ်သောင်းတိုးပေးတယ်။ အဲဒီထက် ဘာမှ တိုးမပေးနိုင်တော့ဘူးပေါ့နော်။ မလုပ်နိုင်ရင် ထွက်ဆိုတဲ့ သဘာမျိုးတွေ ပြောနေတယ်"

မိုးသည်းထန်ပြီး ရာသီဥတု ဆိုးရွားနေတဲ့ကြားက Hi-mo ဆံပင်တုစက်ရုံအပါအဝင် တော်ဝင်မြန်မာ၊ မြန်မာဆန်နီ ဖိနပ်ချုပ်စက်ရုံတွေအပြင် Hallmark ၊ Myth Appeal ၊ Costec စတဲ့ အထည်ချုပ် စက်ရုံတွေမှာလည်း အလုပ်သမားတွေဟာ နေ့စဉ် ဆန္ဒပြ တောင်းဆိုနေကြပါတယ်။

မနေ့က Hall Mart အထည်ချုပ် စက်ရုံမှာတော့ ဆန္ဒပြအလုပ်သမားတွေနဲ့ အလုပ်ရှင်ဘက်က လူတွေအကြား ရိုက်နှက်မှုတွေ ရှိခဲ့တယ်လို့ ဆိုပါတယ်။