နိုင်ငံရေးအကျဉ်းသား ၄ ဦး ထပ်တိုးလာကြောင်း AAPP ကြေညာချက်ထုတ်

အဲ့ဒီ ကြေညာချက်အရ မြန်မာနိုင်ငံမှာ နိုင်ငံရေးအကျဉ်းသား ၁၉၉၈ ဦး ရှိနေတယ်လို့ သိရပါတယ်။ သြဂုတ်လ စာရင်းတွေအရ နိုင်ငံရေးအကျဉ်းသား ၄ ဦး ထပ်တိုးလာတာ တွေ့ရတယ်လို့ AAPP အတွင်းရေးမှူး ကိုတိတ်နိုင်က ပြောပါတယ်။

“အကျဉ်းထောင်တွေနဲ့ ပတ်သက်ပြီး ထူးခြားတဲ့ အခြေအနေတွေကို လစဉ် ပုံမှန် အစီရင်ခံစာ ထုတ်တဲ့သဘောပါ။ ဒီလထဲမှာ နိုင်ငံရေးအကျဉ်းသားအဖြစ် ၄ ယောက် အဖမ်းခံရတယ်ဆိုတဲ့သဘော ကျနော်တို့ ပြောချင်တာပါ”

ဒီနေ့ ထုတ်ပြန်တဲ့ ကြေညာချက်ထဲမှာ ဖမ်းဆီးခံရတဲ့ တိုင်းရင်းသား ၃ ရာကျော်ရှိပြီး ကျောင်းသား၂၆၈ ဦး၊ သံဃာ ၂၂၂ ဦး ရှိတယ်လို့ ဖော်ပြထားသလို ၁၉၉ဝ ခုနှစ် ရွေးကောက်ပွဲဝင် ပြည်သူ့လွတ်တော် ကိုယ်စားလှယ်တွေ၊ ဆရာဝန်တွေ၊ ရှေ့နေတွေနဲ့ ကျောင်းဆရာ ဆရာမတွေရဲ့ စာရင်းလည်း ပါဝင်ပါတယ်။

အစိုးရသစ်နဲ့ အရင် စစ်အစိုးရ လက်ထက်က မြန်မာနိုင်ငံမှာ နိုင်ငံရေးအကျဉ်းသား ဆိုတာ မရှိကြောင်း ငြင်းဆိုထားပြီး နိုင်ငံရေးအကျဉ်းသားများ လွတ်ငြိမ်းချမ်းသာခွင့်ပေးရေးကိစ္စကို လွှတ်တော်မှာ တင်ပြရာမှာ “ယုံကြည်ချက်ကြောင့် အကျဉ်းကျသူများ’ ဆိုပြီး ဝေါဟာရ ပြောင်းလဲ တင်ပြရတယ်လို့ သိရပါတယ်။