ဓာတ်ပုံသတင်းထောက် ကိုကျော်စွာထွန်း အင်းစိန်ထောင်က ပြန်လွတ်

စစ်ကောင်စီက ဖမ်းဆီးအကျဥ်းချထားတဲ့ ဓာတ်ပုံသတင်းထောက် ကိုကျော်စွာထွန်းဟာ နိုဝင်ဘာ ၁၄ ရက် ဒီနေ့မှာ လွတ်ရက်စေ့ပြီး အင်းစိန်အကျဥ်းထောင်ကနေ ပြန်လည် လွတ်မြောက်လာပါတယ်။

သူ့ကို ဆန္ဒပြပွဲတွေမှာ ပါဝင်တယ် ဆိုတဲ့စွပ်စွဲချက်နဲ့ စစ်ကောင်စီတပ်က ၂၀၂၂ ခုနှစ်၊ စက်တင်ဘာမှာ ဖမ်းဆီးခဲ့ပြီးနောက် ရာဇသတ်ကြီးပုဒ်မ ၅၀၅ - ကနဲ့ ထောင်သုံးနှစ် ချမှတ်ခဲ့တာပါ။ အဲဒီနောက် ချုပ်ရက်၊ လျှော့ရက် ခံစားခွင့်တွေနဲ့ နှစ်နှစ်ကျော်အတွင်း ပြန်လည် လွတ်မြောက်လာတာ ဖြစ်ပါတယ်။

အကျဥ်းထောင်ထဲ ကျန်နေသေးတဲ့ လုပ်ဖော်ကိုင်ဖက် သတင်းသမားတွေနဲ့ နိုင်ငံရေးအကျဥ်းသားတွေ အားလုံးကိုလည်း အမြန်ဆုံး လွတ်မြောက်စေချင်တယ်လို့ ကိုကျော်စွာထွန်းက RFA ကို ပြောပါတယ်။

“ကျွန်တော် ဒီနေ့ပဲ လွတ်ရက်စေ့လို့ ပြန်လွတ်မြောက်လာတာပါ။ လုပ်ဖော်ကိုင်ဖက်တွေအားလုံးနဲ့ နိုင်ငံရေးအကျဥ်းသားတွေအားလုံးကိုလည်း လွတ်မြောက်စေချင်ပါတယ်”

အာဏာသိမ်းကာလအတွင်း အနည်းဆုံး သတင်းသမား ၁၅၀ ခန့် ဖမ်းဆီးထောင်ချခံခဲ့ရပြီး အဲဒီအထဲက ၆၄ ဦးဟာ ဆက်လက် ဖမ်းဆီးခံထားရဆဲပဲလို့ နယ်စည်းမခြား သတင်းထောက်များအဖွဲ့ (RSF) ရဲ့ အောက်တိုဘာအတွင်း ထုတ်ပြန်ချက်မှာ ဖော်ပြထားပါတယ်။

RSF ရဲ့ ၂၀၂၄ ခုနှစ်၊ ကမ္ဘာ့သတင်းမီဒီယာ လွတ်လပ်ခွင့်ညွှန်းကိန်းမှာ မြန်မာနိုင်ငံဟာ နိုင်ငံပေါင်း ၁၈၀ မှာ အဆင့် ၁၇၁ က ရပ်တည်နေပြီး တရုတ်နိုင်ငံပြီးနောက် သတင်းသမားတွေကို ဖမ်းဆီးထောင်ချမှုအများဆုံး ဒုတိယနိုင်ငံလည်း ဖြစ်ပါတယ်။