မြန်မာလွှတ်တော် ကိုယ်စားလှယ်များ ဂျာမဏီ လေ့လာရေးခရီး စတင်

မြန်မာလွှတ်တော် ကိုယ်စားလှယ်တွေအတွက် ပထမဆုံး ဥရောပခရီးစဉ် ဖြစ်ပါတယ်။ ဒီအစီစဉ်ကို ဂျာမဏီနိုင်ငံက အဓိက နိုင်ငံရေးပါတီကြီး တခုဖြစ်တဲ့ LDP ပါတီနဲ့ နီးစပ်တဲ့ Friedrich Naumann Foundation က ဖိတ်ခေါ်ခဲ့တာ ဖြစ်တယ်လို့ ခရီးစဉ်မှာ လိုက်ပါသွားတဲ့ ရခိုင် တိုင်းရင်းသားများ တိုးတက်ရေးပါတီ ဥက္ကဋ္ဌ အမျိုးသားလွှတ်တော် ကိုယ်စားလှယ် ဒေါက်တာ အေးမောင်က အခုလို ပြောပါတယ်။

" ဒီခရီးစဉ်ကတော့ FNF ကဖိတ်တာ၊ Friedrich Naumann Foundation ကဖိတ်တာ၊ အဲဒီဖိတ်စာလေးပြပြီးတော့မှ ခွင့်ပြုချက်နဲ့ သွားကြတာပါ။ ဂျာမန်ပါလီမန် ကျင်းပတဲ့ကာလလို့ ပြောတယ်ဗျ။ အဲဒီမှာ လေ့လာဖို့ရှိတယ်။ နောက် ခရီးသွား ဆက်ဆံရေးနဲ့ ပတ်သက်တဲ့ ဝန်ကြီးဌာန သူတို့လိုက်ပြတဲ့ နေရာလေးတွေကို လိုက်လေ့လာကြမှာပါ"

ဒေါက်တာအေးမောင်နဲ့အတူ ရှမ်းတိုင်းရင်းသားများ ဒီမိုကရေစီပါတီ SNDP က ဦးစိုင်းအိုက်ပေါင်း၊ ပြည်ခိုင်ဖြိုးပါတီက ဦးဝင်းဦး၊ ဦးဝင်းသန်း၊ ဦးအေးမောက်၊ အမျိုးသားဒီမိုကရေစီ အဖွဲ့ချုပ် NLD ပါတီက ဦးမင်းဦးနဲ့ ဒေါက်တာလှမြတ်သွေးတို့ ပါဝင်ကြမှာ ဖြစ်ပါတယ်။

မြန်မာလွှတ်တော် ကိုယ်စားလှယ်တွေရဲ့ ဂျာမဏီခရီးစဉ်ဟာ သီတင်းတစ်ပတ် ကြာမြင့်မှာ ဖြစ်တယ်လို့ ဒေါက်တာအေးမောင်က ပြောပါတယ်။