ပြည်သူ့အတွက် “ပွင့်လင်းလွှတ်တော်” လာပြီ

လွှတ်တော်ကိုယ်စားလှယ်တွေကို ပြည်သူတွေ တိုက်ရိုက်ဆက်သွယ်မေးမြန်းနိုင်မယ့် "ပွင့်လင်းလွှတ်တော်" အင်တာနက်စာမျက်နှာနဲ့ "Open Hlutaw" Facebook စာမျက်နှာကို ရန်ကုန်မြို့ ဖန်တီးရာအဖွဲ့ရုံးမှာ ဒီကနေ့ စတင်မိတ်ဆက်လိုက်ပါတယ်။

ပြည်သူတွေ သိချင်တာတွေနဲ့ လွှတ်တော်ကိုယ်စားလှယ်တွေ ပြည်သူ့အသံနားထောင်ဖို့ အဓိကရည် ရွယ်ပြီး "ပွင့်လင်းလွှတ်တော်" အင်တာနက်စာမျက်နှာကို ဖွင့်လှစ်လိုက်ရတာဖြစ်တယ်လို့ အင်တာနက် စာမျက်နှာ ဖန်တီးရာမှာ ပါဝင်ခဲ့တဲ့ မြန်မာ့ပဉ္စမမဏ္ဍိုင်အဖွဲ့ရဲ့ IT ပညာရှင် ကိုစိုးလင်းထွဋ် က ပြောပါတယ်။

"ပြည်သူတွေမှာ လွှတ်တော်ကိုယ်စားလှယ်တွေကို ပြောစရာကိစ္စတွေ၊ တင်ပြစရာကိစ္စတွေ၊ တိုင်ပင်စရာတွေ၊ အသိပေးစရာတွေ ရှိနေတယ်လို့ ကျနော်တို့ယူဆတယ်၊ အဲ့လိုပဲ တစ်ချိန်တည်းမှာပဲ လွှတ်တော်ကိုယ်စားလှယ်တွေ အနေနဲ့ကလည်း သူတို့ရဲ့မဲဆန္ဒရှင်သော်လည်းကောင်း တကယ့်လက်တွေ့ အခြေအနေမှာဆိုရင် အားလုံးဆီကိုရောက်အောင် လက်လှမ်းမီဖို့အတွက် အားလုံးအသံနားထောင်ပြီး ထိထိရောက်ရောက် လုပ်နိုင်ဖို့အတွက် အခက်အခဲတွေရှိနိုင်တယ်လို့ပဲ ကျနော်တို့က ယူဆပါတယ်၊ ဒီလိုမျိုးအခြေအနေရှိတဲ့အချိန်မှာ လွှတ်တော်ကိုယ်စားလှယ်တွေနဲ့ ပြည်သူတွေ ထိထိရောက်ရောက် ဆက်သွယ်နိုင်မယ့် အလွယ်တကူဆက်သွယ်နိုင်မယ့်နည်းလမ်းတွေ ဖန်တီးပေးလိုက်မယ်ဆိုလို့ရှိရင် လူတွေကအဲ့တော့မှ လုပ်လို့ရပါလား၊ အဆက်အသွယ်လုပ်လို့ရပါလား ဆိုလို့ရှိရင် လုပ်ကိုင်ကြမယ်၊ ဆက်သွယ်ကြဖို့အတွက် ဆန္ဒရှိမယ်လို့လည်း ကျနော်တို့က ယူဆပါတယ်"