မြန်မာနိုင်ငံ အမျိုးသားလူ့အခွင့်အရေးကော်မရှင်ကို ဖျက်သိမ်းကြောင်း NUG ထုတ်ပြန်

စစ်ကောင်စီက ၂ဝ၂၅ ခုနှစ် ဇန်နဝါရီလ ၃၁ ရက်နေ့မှာ ထပ်မံဖွဲ့စည်းလိုက်တဲ့ မြန်မာနိုင်ငံ အမျိုးသားလူ့အခွင့်အရေးကော်မရှင်ကို အသိမှတ်မပြုကြောင်းနဲ့ ဖျက်သိမ်းကြောင်း အမျိုးသားညီညွတ်ရေးအစိုးရ (NUG) က ဖေဖော်ဝါရီလ ၁၃ ရက်နေ့က ထုတ်ပြန်ကြေညာလိုက်ပါတယ်။ 

ဒီကော်မရှင်ဟာ ဂုဏ်သိက္ခာရှိတဲ့ အဖွဲ့အစည်းမဟုတ်တဲ့အပြင် ပဲရစ်အခြေခံမူတွေနဲ့ မကိုက်ညီဘဲ စစ်ကောင်စီအလိုကျ ဆောင်ရွက်ခဲ့တဲ့ အဖွဲ့ဝင်ဟောင်းတွေနဲ့ ထပ်မံဖွဲ့စည်းထားတာကြောင့် လွတ်လပ်ပြီး အမှီအခိုကင်းတဲ့ အဖွဲ့အစည်းမဟုတ်ဘူးလို့လည်း NUG က ပြောပါတယ်။ 

ဒါ့အပြင် လူအခွင့်အရေးချိုးဖောက်ခံနေရတဲ့ ပြည်သူတွေဘက်ကို ရပ်တည်ထုတ်ဖော်ပြောကြားတာမရှိဘဲ စစ်ကောင်စီရဲ့ နိုင်ငံတကာရာဇဝတ်မှုကျူးလွန်တာတွေကို ရေငုံနှုတ်ဆိတ်နေခဲ့တယ်လို့ ရေးသားထားပါတယ်။

အမျိုးသားလူ့အခွင့်အရေး အင်စတီကျုရဲ့ကမ္ဘာလုံးဆိုင်ရာမဟာမိတ်အဖွဲ့ Global Alliance of National Human Rights Institute (GANHRI) ကလည်း ပဲရစ်အခြေခံမူတွေနဲ့ မကိုက်ညီတာကြောင့် မြန်မာနိုင်ငံ အမျိုးသားလူ့အခွင့်အရေးကော်မရှင်ကို အဖွဲ့ဝင်အဖြစ်ကနေ ၂၀၂၄ ခုနှစ် ဒီဇင်ဘာလ ၃၁ ရက်နေ့မှာ ပြန်လည်ရုပ်သိမ်းခဲ့တယ်လို့ NUG ရဲ့ ထုတ်ပြန်ချက်မှာ ဖော်ပြထားပါတယ်။ 

နိုင်ငံတကာအစိုးရတွေ၊ အဖွဲ့အစည်းတွေအနေနဲ့လည်း စစ်ကောင်စီက ထပ်မံဖွဲ့စည်းထားတဲ့ မြန်မာနိုင်ငံအမျိုးသား လူ့အခွင့်အရေးကော်မရှင်ကို အသိအမှတ်ပြု လက်ခံတွေ့ဆုံတာ၊ အစည်းအဝေး ဖိတ်ကြားတာတွေ မလုပ်ဖို့ NUG က တိုက်တွန်းထားပါတယ်။ 

ဒီထုတ်ပြန်ချက်နဲ့ပတ်သက်ပြီး စစ်ကောင်စီရဲ့ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကို RFA က ဖုန်းနဲ့ ဆက်သွယ်ခဲ့ပေမဲ့ ဖုန်းလက်ခံမဖြေဆိုပါဘူး။

စစ်ကောင်စီက ဖွဲ့စည်းပုံအခြေခံဥပဒေ ပုဒ်မ ၄၁၉ အရ မြန်မာနိုင်ငံအမျိုးသားလူ့အခွင့်အရေးကော်မရှင်ကို ဥက္ကဋ္ဌအပါအဝင် အဖွဲ့ဝင် ကိုးဦးနဲ့ ဖွဲ့စည်းတာဝန်ပေးအပ်ခဲ့ကြောင်း ၂၀၂၅ ခုနှစ် ဇန်နဝါရီလ ၃၁ ရက်နေ့က ထုတ်ပြန်ခဲ့ပါတယ်။