နာဂအမျိုးသားဆိုရှယ်လစ်ကောင်စီကို အရေးယူမည်

နာဂအမျိုးသားဆိုရှယ်လစ်ကောင်စီ (NSCN-K) ဟာ စစ်ကိုင်းတိုင်းဒေသကြီး အစိုးရအဖွဲ့နဲ့ ချုပ်ဆိုထားတဲ့ ငြိမ်းချမ်းရေး သဘောတူညီချက်စာချုပ်ကို ချိုးဖောက်ခဲ့တာကြောင့် အရေးယူသွားမယ်လို့ တပ်မတော်က သတင်းထုတ်ပြန်လိုက်ပါတယ်။

NSCN-K ဌာနချုပ်နယ်မြေအတွင်းမှာရှိတဲ့ အိန္ဒိယအစိုးရကို ဆန့်ကျင်တိုက်ခိုက်နေတဲ့ အာသံနဲ့ ကသည်းတပ်ဖွဲ့တွေရဲ့ စခန်းတွေနဲ့ သင်တန်းကျောင်းတွေကို သိမ်းပိုက်လိုက်တယ်ဆိုတဲ့ တပ်မတော်ရဲ့ သတင်းထုတ်ပြန်ချက်မှာ ဖော်ပြထားတာ ဖြစ်ပါတယ်။

စစ်ကိုင်းတိုင်းဒေသကြီး နာဂ ကိုယ်ပိုင်အုပ်ချုပ်ခွင့်ရဒေသ၊ တကားကျေးရွာ အနီးတဝိုက်က နာဂအမျိုးသား ဆိုရှယ် လစ်ကောင်စီ (NSCN-K) စခန်းအနီးမှာ အာသံနဲ့ ကသည်းတပ်ဖွဲ့ဝင်တွေဟာ နာဂအမျိုးသား ဆိုရှယ်လစ်ကောင်စီ အဖွဲ့ယောင်ဆောင်ကာ စစ်သင်တန်းတွေ ဖွင့်လှစ်ထားတဲ့ မသင်္ကာစရာ အထောက်အထားတွေရှိတာကြောင့် တပ်မတော်က သွားရောက်ရှင်းလင်းတာလို့ တပ်မတော်ရဲ့ ထုတ်ပြန်ချက်မှာ ပါရှိပါတယ်။

မြန်မာနိုင်ငံအနေနဲ့ အိမ်နီးချင်းနိုင်ငံတွေကို ဆန့်ကျင်တဲ့ ဘယ်လက်နက်ကိုင်အဖွဲ့ကိုမဆို အခြေချခွင့်မပြုကြောင်း၊ လက်မခံကြောင်း စတဲ့မူဝါဒတွေနဲ့ အညီ အခုလိုရှင်းလင်းတာလို့ ဖော်ပြထားပါတယ်။

နာဂတိုင်းရင်းသားလက်နက်ကိုင်အဖွဲ့ NSCN-K ကတော့ သူတို့ဌာနချုပ်နယ်မြေမှာ အစိုးရတပ်မတော်က ဝင်ရောက်နေရာယူ တပ်စွဲထားတာကို ရုပ်သိမ်းပေးဖို့ NSCN-K က တပ်မတော် ကာကွယ်ရေးဦးစီးချုပ်နဲ့ နိုင်ငံတော် အတိုင်ပင်ခံ ပုဂ္ဂိုလ်တို့ထံ မေတ္တာရပ်ခံစာ ပေးပို့ထားတယ်လို့ သိရပါတယ်။

ဒီသတင်းကို RFA သတင်းထောက် ကိုကျော်လွင်ဦး ပေးပို့တာပါ။