ရွှေ့ပြောင်းလုပ်သားတွေ အရေး ဆွေးနွေး

ရွှေ့ပြောင်းလုပ်သားတွေရဲ့ အခြေခံလွတ်လပ်ခွင့်နဲ့ ရပိုင်ခွင့်တွေကို ထိထိရောက်ရောက် ကာကွယ်ဖို့ အစိုးရ၊ လူ့အခွင့်အရေးအဖွဲ့တွေနဲ့ အရပ်ဘက်အဖွဲ့အစည်းတွေ ပူးပေါင်းဆောင်ရွက်ဖို့ လိုတယ်လို့ အလုပ်သမား၊ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာန ဝန်ကြီး ဦးသိန်းဆွေက ပြောပါတယ်။

ဒီကနေ့ နေပြည်တော်က Hilton ဟိုတယ်မှာကျင်းပတဲ့ နဝမအကြိမ်မြောက် ရွှေ့ပြောင်းအလုပ်သမားဆိုင်ရာ အာဆီယံအစည်းအဝေးရဲ့ နိုင်ငံအဆင့် သုံးပွင့်ဆိုင်ညှိနှိုင်းအစည်းအဝေးမှာ ရွှေ့ပြောင်းလုပ်သားတွေရဲ့ အခွင့်အရေးမြှင့်တင်ရေးအတွက် ဆောက်ရွက်ဖို့နဲ့ပတ်သက်ပြီး ဝန်ကြီးဦးသိန်းဆွေက ပြောတာဖြစ်ပါတယ်။

"ရွှေ့ပြောင်းအလုပ်သမားများရဲ့ အခွင့်အရေးကို မြှင့်တင်ပေးနိုင်ရေးအတွက် သက်ဆိုင်ရာနိုင်ငံတော်အစိုးရ အဖွဲ့အစည်းများ၊ လူ့အခွင့်အရေးဆိုင်ရာ အဖွဲ့အစည်းများနဲ့ အရပ်ဘက်အဖွဲ့အစည်းများ အားလုံးဟာ အတူတကွ ပူးပေါင်းဆောင်ရွက်ဖို့ အထူးလိုအပ်ပါတယ်"

ဒါ့အပြင် မြန်မာနိုင်ငံအနေနဲ့ ပြည်တွင်းသာမက ပြည်ပက ပြန်လည်ရောက်ရှိလာတဲ့ နိုင်ငံသားတွေအတွက် ရည်ရွယ်ပြီး အလုပ်အကိုင်အခွင့်အလမ်း ဖော်ထုတ်ပေးဖို့ စီးပွားရေးမူဝါဒမှာ ချမှတ်အကောင်အထည်ဖော်နေတယ် လို့လည်း ပြောပါတယ်။

ဒီနေ့အစည်းအဝေးဟာ ၂ဝ၁၅ ခုနှစ်က မလေးရှားနိုင်ငံမှာ ကျင်းပတဲ့ အဌမအကြိမ်မြောက် ရွှေ့ပြောင်းလုပ်သား အစည်းအဝေးက ဆုံးဖြတ်ချက်တွေနဲ့ ပတ်သက်ပြီး အကောင်အထည်ဖော်မှု အခြေအနေတွေကို ဆွေးနွေးတာဖြစ် ပါတယ်။

ဒီနေ့ အစည်းအဝေးကို တိုင်းဒေသကြီး၊ ပြည်နယ်အစိုးရအဖွဲ့တွေက ကိုယ်စားလှယ်တွေ၊ နိုင်ငံတကာအလုပ်သမား အဖွဲ့ ကိုယ်စားလှယ်တွေ၊ အလုပ်ရှင်အဖွဲ့အစည်းတွေက ကိုယ်စားလှယ်တွေ၊ အလုပ်သမားအဖွဲ့အစည်းတွေက ကိုယ်စားလှယ်တွေ တက်ရောက်ကြပါတယ်။