မန္တလေးပေါက်ကွဲမှုဟာ ကြိုတင်စီမံပြီး ဖောက်ခွဲတဲ့အမှုဖြစ်တယ်လို့ အစိုးရထုတ်ပြန်

မန္တလေးမြို့၊ ချမ်းအေးသာစံမြို့နယ် ၇၄ လမ်းနဲ့ ၂၈ လမ်းဒေါင့်မှာ မနေ့က ဖြစ်ပွားခဲ့တဲ့ပေါက်ကွဲမှုဟာ ကြိုတင် စီမံထားတဲ့ အချိန်ကိုက်ဖောက်ခွဲမှုဖြစ်တယ်လို့ မန္တလေးတိုင်းဒေသကြီးအစိုးရအဖွဲ့က ဒီကနေ့ ထုတ်ပြန်ခဲ့ ပါတယ်။

အခင်းဖြစ်တဲ့နေရာမှာ စစ်ဆေးတွေ့ရှိချက်တွေအရ ဒီဖြစ်စဉ်ဟာ လက်ကိုင်ဖုန်းကို အသုံးပြုပြီး ဖောက်ခဲ့ဖို့ အတွက် ကြိုတင်ပြင်ဆင်ထားတဲ့ ဖောက်ခွဲမှုဖြစ်စဉ်ဖြစ်တယ်လို့ မန္တလေးတိုင်းဒေသကြီးအစိုးရအဖွဲ့ အတွင်းရေးမှူး ဦးမြင့်တင် က ပြောပါတယ်။

"ဝါယာကြိုး နှစ်စထွက်နေတယ်၊ သူ့မှာဖောက်ခွဲဖို့အတွက်ပေါ့နော် ဥပမာ တစ်နေရာကနေပြီးတော့ သူ့ဖုန်းကိုခေါ်လိုက်လို့ရှိရင် ဒီဖုန်းဝင်လာတာနဲ့ ကွဲသွားစေတယ်၊ ဒါမှမဟုတ်လို့ရှိရင် ဒီဖုန်းထဲမှာပဲ နာရီပါတဲ့အခါကျတော့ ဒီနာရီလေးနဲ့ အချိန်ကိုက်ပြီးတော့ ဒီအချိန်မှာကွဲအောင်လို့ ဆင်ထားတဲ့ပုံစံမျိုး၊ စောစောတုန်းကဝင်လာတဲ့ ဆိုင်ကယ်ရပ်ပြီးတော့ မိသားစုဈေးတန်းထဲသွားတဲ့အချိန်မျိုးမှာ အဲဒီဆိုင်ကယ်ပေါ်မှာ သူချိတ်ကောင်းချိတ်ခဲ့နိုင်တယ်"

မနေ့ည စက်တင်ဘာလ ၂၈ ရက်နေ့ ည ၉ နာရီခွဲခန့်က ချမ်းအေးသာစံမြို့နယ် ၇၄ လမ်းနဲ့ ၂၈ လမ်းဒေါင့်က သုံးဆယ်ဝင်းဓမ္မာရုံ ဘုရားပွဲအနီးမှာ ပေါက်ကွဲမှုတစ်ခု ဖြစ်ပွားခဲ့ပြီး ဘုရားပွဲလာသူတစ်ဦး ဒဏ်ရာအနည်း ငယ်ရရှိ ခဲ့ကာ ဆိုင်ကယ် ၁ စီး ပျက်စီးခဲ့တယ်လို့ ရဲတပ်ဖွဲ့က ထုတ်ပြန်ထားပါတယ်။

ဒဏ်ရာရရှိသူ ဦးဇော်ဟိန်း ကိုတော့ မန္တလေးပြည်သူ့ဆေးရုံ ပြင်ပလူနာဌာနမှာ ဆေးကုသမှု ခံယူနေပါတယ်။

ဒီဖြစ်စဉ်နဲ့ ပတ်သက်ပြီး အမှတ် ၈ မြို့မရဲစခန်းက ပေါက်ကွဲစေတတ်သောသတ္တုပစ္စည်းများ အက်ဥပဒေ ပုဒ်မ ၃ အရ အမှုဖွင့်စုံစမ်းနေတယ်လို့ သိရပါတယ်။

အခုလိုပေါက်ကွဲမှုဖြစ်စဉ်ကြောင့် မန္တလေးတိုင်းအတွင်းမှာရှိတဲ့ လူစည်ကားရာနေရာတွေဖြစ်တဲ့ ဘုရားပွဲ၊ ကျောင်း၊ ဈေးနဲ့ ကားဂိတ်၊ ရထားဘူတာတွေမှာ လုံခြုံရေး တိုးမြှင့်ချထားမယ်လို့ မန္တလေးတိုင်းအစိုးရအဖွဲ့က ဒီကနေ့ ထုတ်ပြန်ကြောငြာခဲ့ပါတယ်။