တမူးမြို့မှာ သေနတ်ပစ်ခတ် မှုကြောင့် လူတစ်ဦးသေဆုံး

"၁၀နာရီခွဲလောက်မှာ လူနှစ်ယောက်က နောက်ဖေးပေါက်ကနေဝင်လာပြီး အိမ်ရှင်ကို တံခါးခေါက်တော့ ဖွင့်ကြည့်လိုက်တော့ ရန်သူမှန်းသိတော့ ပြန်ပိတ်တာပေါ့၊ ပိတ်လိုက်ဖွင့်လိုက် လုနေကြပြီးတော့ သေနတ်ထိုးထည့်ပြီးပစ်သွားတာ သူ့သမီးလေးကိုလည်း မှန်သွားတယ်၊ ကျနော်တို့ တမူးမြို့က ကျီးလန့်စာ စားပေါ့ဗျာ၊ တစ်လအတွင်းဗုံးကွဲလိုက် နှစ်ရက်အတွင်း ၅ လုံးလောက်ကွဲတယ်ဗျာ ၊ အခုဆိုရင် လူသေမှုဖြစ်တယ်ဗျာ၊ ဒါမျိုးတွေမြို့ထဲမှာလာပစ်တာ ကြတော့မကောင်းဘူးလေ၊ နယ်စပ်နဲ့ ဆိုရင် တော်တော်လှမ်းတယ်၊ ဒီနန့်ဖာလုံရဲကင်းကို ကျော်လာပြီးတော့မှပစ်တာလေ ကျနော်တို့က လုံခြုံမှုနည်းတာပေါ့ဗျာ၊ လုံခြုံမှုအားနည်းတယ်ပြောရမှာပေါ့"

သေဆုံးသူခန္ဓာကိုယ်မှာ သေနတ်ဒဏ်ရာ ရှစ်ချက်ပစ်ခတ်ခံရတယ်လို့ တမူးမြို့မ ရဲစခန်းက စစ်ဆေးတွေ့ရှိခဲ့ ပြီး သေဆုံးသူရဲ့ နေအိမ်မှာတော့ ကျည်ခွံ ၆ ခွံ ကို တွေ့ရှိခဲ့တယ်လို့ ဖြစ်စဉ်ဖြစ်ပြီးမှာ သွားရောက် ကြည့်ရှုခဲ့တဲ့ မြို့ခံ NLD ဥက္ကဋ္ဌ ဦးမြင့်ဇော် ကပြောပါတယ်။

သေနတ်နဲ့ ပစ်ခတ်ခံရမှုကြောင့် ဒဏ်ရာရခဲ့တဲ့ အမျိုးသမီးနှစ်ဦးကို တမူးမြို့ဆေးရုံမှာ လက်ရှိ ဆေးကုသနေပြီး သမီးဖြစ်သူရဲ့ ဒဏ်ရာက အသက်အန္တရာယ် စိုးရိမ်ရတယ်လို့သိရပါတယ်။

ဒီဖြစ်စဉ်နဲ့ပတ်သက်ပြီး တမူးမြို့မရဲစခန်းက ပနံပါတ် ၆၈ /၂၀၁၇ ရာဇသတ်ကြီးဥပဒေပုဒ်မ ၃၀၂ ၊၃၀၇ တို့နဲ့ အမှုဖွင့်ထားပြီး ပစ်ခတ်သွားသူတွေကို စုံစမ်းနေတယ်လို့ သိရပါတယ်။