လယ်သမားနစ်နာမှု စုံစမ်းရေးကော်မရှင်ဖွဲ့မည်
2012.07.26

ဇလွန် မဲဆန္ဒနယ်က ဦးတင်ထွဋ် တင်သွင်းတဲ့ "လယ်ယာမြေ သိမ်းဆည်းခံရခြင်းအား စုံစမ်းလေ့လာ ဖော်ထုတ်ပြီး တောင်သူ လယ်သမားများအား နစ်နာမှု မရှိစေရေး တရားမျှတစွာ ဖြေရှင်း ဆောင်ရွက်ပေးရန်" အဆိုကို ပြည်သူ့လွှတ်တော် ဥက္ကဋ္ဌ သူရ ဦးရွှေမန်း ဝင်ရောက် ဆွေးနွေးပြီးနောက် ကော်မရှင်ဖွဲ့ရေးကို အတည်ပြု ဆုံးဖြတ်လိုက်တာ ဖြစ်ကြောင်း အမျိုးသား လွှတ်တော် ကိုယ်စားလှယ် ဦးဖုန်းမြင့်အောင်က ပြောပါတယ်။
"နောက်ဆုံး အပြီးသတ်ကို ဦးရွှေမန်း ဆွေးနွေးပါတယ်။ သူကဆွေးနွေးပြီးတော့မှ ပြည်ထောင်စုဝန်ကြီးက ပြန်ရှင်းပြီးတော့မှ ကျွန်တော်တို့က ဒီကိစ္စကို မဲခွဲတဲ့ အဆင့်ရောက်သွားပါတယ်။ အဲတာ ပြည်သူ့လွှတ်တော်က အဲဒီကိစ္စကို ဆုံးဖြတ်ပေးလိုက်ပါတယ်။ ကော်မရှင်ဖွဲ့မှာပါ။ ကော်မရှင်ရဲ့တာဝန်တွေ၊ လုပ်ပိုင်ခွင့်တွေကတော့ ကော်မရှင်ဖွဲ့ပြီးတော့မှပဲ သူတို့လွှတ်တော်ကို တင်မှာပါ"
ဒီကော်မရှင်မှာ လွှတ်တော် ကိုယ်စားလှယ်တွေ၊ အစိုးရ အဖွဲ့ဝင်တွေနဲ့ ပညာရှင်တွေ ပါဝင်မှာ ဖြစ်တယ်လို့ သိရပါတယ်။ ဒီကော်မရှင်က ဥပဒေပညာရှင်တွေနဲ့ ဆွေးနွေးတိုင်ပင်ပြီး လယ်သမားတွေ အရေးကို ဆွေးနွေး ဖြေရှင်းမှာ ဖြစ်ကြောင်းလည်း သိရပါတယ်။
ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီက ဦးတင်ထွဋ် တင်သွင်းတဲ့ ဒီအဆိုကို ဝင်ရောက်ဆွေးနွေးသူ ကိုယ်စားလှယ်ပေါင်း ၄၆ ဦး ရှိပြီး အမျိုးသား ဒီမိုကရေစီ အဖွဲ့ချုပ် ပြည်သူ့လွှတ်တော် ကိုယ်စားလှယ် နှစ်ဦးလည်း ပါဝင် ဆွေးနွေးကြောင်း သိရပါတယ်။