သတင်းသမားတွေကို ထောင်ချတာရပ်ဖို့ CPJ တောင်းဆို

မြန်မာနိုင်ငံမှာ သတင်းသမားတွေကို စစ်ကောင်စီက ထောင်ဒဏ်ချမှတ်နေတာတွေ ရပ်တန့်ဖို့ နယူးယောက် အခြေစိုက် သတင်းသမားများ ကာကွယ်ရေးကော်မတီ (CPJ) က မတ်လ ၂၄ ရက် ဒီကနေ့မှာ တောင်းဆိုလိုက်ပါတယ်။

ဒီလထဲမှာ ထောင်ဒဏ် ၂ နှစ်စီချမှတ်ခံခဲ့ရတဲ့ ကမာရွတ်မီဒီယာရဲ့ အယ်ဒီတာ ကိုဟံသာညိန်းနဲ့ မဇ္ဈိမသတင်းဌာနရဲ့ အယ်ဒီတာ ကိုသန်းထိုက်အောင်တို့ကိုလည်း အမြန်ပြန်လွှတ်ပေးဖို့ တောင်းဆိုချက်မှာ ဖော်ပြထားပါတယ်။

သတင်းသမားတွေကို ထောင်ဒဏ်ချမှတ်တဲ့ နိုင်ငံတွေထဲမှာ မြန်မာနိုင်ငံဟာ ဒုတိယအဆိုးဆုံးနိုင်ငံ ဖြစ်လာတယ်လို့လည်း CPJ က ဆိုပါတယ်။

ဒီလထဲမှာ ကိုဟံသာညိန်းနဲ့ ကိုသန်းထိုက်အောင်အပြင် မြန်မာသံတော်ဆင့် သတင်းထောက် ကိုရဲရင့်ထွန်းနဲ့ Mandalay Free Press (MFP) သတင်းဌာနက ကိုအောင်ဇော်ဇော် တို့လည်း ထောင်ဒဏ် ၂ နှစ်စီ ချမှတ်ခံခဲ့ရပါတယ်။

၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်တပ်က အာဏာသိမ်းပြီးနောက် သတင်းသမား အယောက် ၁၀၈ ထက်မနည်း ဖမ်းဆီးခံခဲ့ရပြီး တချို့ ပြန်လွတ်လာပါတယ်။

သတင်းသမားတွေကို စစ်ကောင်စီက ရာဇသတ်ကြီး ဥပဒေပုဒ်မ ၅၀၅ (က) နဲ့ အများဆုံး တရားစွဲဆိုတာလည်း ဖြစ်ပါတယ်။

နယ်စည်းမခြားသတင်းထောက်များအဖွဲ့ RSF ရဲ့စာရင်းအရ အကျဉ်းထောင်အသီးသီးမှာ ဖမ်းဆီးထိန်းသိမ်းခံနေရဆဲ သတင်းထောက် ၅၇ ဦးရှိပြီး သတင်းထောက်သုံးဦး သေဆုံးခဲ့ရပါတယ်။