စစ်ပွဲဖြစ်ပွားရာဒေသတွေက သတင်းသမားတွေရဲ့ လုံခြုံရေးကို အာမခံဖို့ IPCM တိုက်တွန်း

စစ်ပွဲဖြစ်ပွားရာ တိုင်းရင်းသားနယ်မြေတွေအပါအဝင် ဒေသအသီသီးက သက်ဆိုင်ရာအဖွဲ့အစည်းတွေအနေနဲ့ သတင်းသမားတွေရဲ့ လုံခြုံရေး၊ သတင်းလွတ်လပ်ခွင့်နဲ့ လွတ်လပ်စွာသတင်းရယူခွင့်ကို အာမခံဖို့ လွတ်လပ်သောမြန်မာသတင်းမီဒီယာကောင်စီ (IPCM) က ဧပြီ ၂၆ ရက်နေ့မှာ ကြေညာချက်ထုတ်ပြန် တိုက်တွန်းလိုက်ပါတယ်။

ကရင်နီပြည် ကြားကာလအုပ်ချုပ်ရေးကောင်စီ (IEC) က ဧပြီလ ၁၆ ရက်နေ့ကထုတ်ပြန်တဲ့ မီဒီယာကျင့်ဝတ်ဆိုင်ရာ ညွှန်ကြားချက်နဲ့ ကရင်အမျိုးသားအစည်းအရုံး (KNU) က ဧပြီလ ၂၁ ရက်နေ့က ထုတ်ပြန်တဲ့ သတင်းနဲ့ပြန်ကြားရေးဆိုင်ရာ မူဝါဒ ထုတ်ပြန်ချက်တွေဟာ သတင်းသမားတွေရဲ့ လုံခြုံရေးနဲ့ သတင်းလွတ်လပ်ခွင့်အပေါ် ခြိမ်းခြောက်နေတဲ့အတွက် သတင်းမီယာသမားတွေအကြား စိုးရိမ်ပူပန်မှု ဖြစ်ပေါ်နေတယ်လို့ ဆိုပါတယ်။

ဒီစိုးရိမ်ပူပန်ချက်တွေကို သက်ဆိုင်ရာအဖွဲ့အစည်းက အဖွဲ့ဝင်တွေထံ IPCM က အလွတ်သဘော တင်ပြဆွေးနွေးခဲ့ပြီးဖြစ်တယ်လို့ ဆိုပါတယ်။

သတင်းမီဒီယာတွေရဲ့ သဘောသဘာဝ၊ ကျင့်ဝတ်စံနှုန်းအပါအဝင် သတင်းမီဒီယာရဲ့ အခန်းကဏ္ဍတွေကို ရှင်းလင်းတင်ပြဖို့အတွက်လည်း သက်ဆိုင်ရာအဖွဲ့အစည်းတွေနဲ့ တွေ့ဆုံဆွေးနွေးဖို့ IPCM က စီစဉ်နေတယ်လို့လည်း ဆိုတယ်။

ဖက်ဒရယ်ဒီမိုကရေစီပြည်ထောင်စုကို ရည်မှန်းထားတဲ့ အဖွဲ့အစည်းတွေအနေနဲ့ သတင်းမီဒီယာလွတ်လပ်ခွင့် စံနှုန်းတွေ တန်ဖိုးတွေကို လေးစားကျင့်သုံးဖို့လည်း IPCM က အလေးအနက် တိုက်တွန်းကြောင်း ထုတ်ပြန်ချက်မှာ ဖော်ပြထားပါတယ်။