ဆိုက်ကလုံးနာဂစ်ဘေး အာဆီယံနှင့် ကုလဆွေးနွေး

ဒီဆွေးနွေးပွဲမှာ မြန်မာစစ်အစိုးရ အာဏာပိုင်တွေက နိုင်ငံတကာက ကူညီကယ်ဆယ်ရေးတွေကို အချိန်ဆိုင်းထားခဲ့တာကို ထောက်ပြီး နောင်အနာဂတ်မှာ ဒီလိုသဘာဝဘေးဒဏ်ကျရောက်လာခဲ့ရင် အချိန် မဆိုင်းပဲ ကူညီရေးလုပ်နိုင်ဖို့ အရေးကြီးကြောင်း အလေးထားပြောကြားခဲ့တယ်လို့ သိရပါတယ်။

မနေ့ကဆွေးနွေးပွဲမှာ အာဆီယံ အတွင်းရေးမှူးချုပ် ဆူရင် ပစ်ဆူဝမ်က နာဂစ်မုန်တိုင်းကျအပြီး မြန်မာအစိုးရက နိုင်ငံတကာ ကယ်ဆယ်ရေးနဲ့ ကူညီရေးလုပ်ငန်းတွေနဲ့ ပတ်သက်ပြီး မြန်မာအာဏာပိုင်တွေရဲ့ အပြုအမူ ပိုကောင်းမွန်လာခဲ့ကြောင်း၊ နိုင်ငံတကာ ကူညီရေးအဖွဲ့တွေနဲ့ မြန်မာ အစိုးရအကြား ယုံကြည်မှု တည်ဆောက်နိုင်ခဲ့ကြောင်း ပြောကြားပါတယ်။

မြန်မာစစ်အစိုးရ အာဏာပိုင်တွေက မုန်တိုင်းကျအပြီး ကယ်ဆယ်ရေးနဲ့ ကူညီရေးအတွက် အကူအညီ အပူတပြင်း လိုနေချိန်မှာ နိုင်ငံတကာ ကယ်ဆယ်ရေး အဖွဲ့အစည်းတွေရဲ့ ပြည်ဝင်ခွင့်ဗီဇာ အချိန်ဆွဲထားတာ၊ ဆိုင်းငံ့ထားတာနဲ့ မုန်တိုင်းကျဒေသတွေကို သွားရောက်ကယ်ဆယ်ခွင့် တားမြစ် ကန့်သတ်တာတွေကြောင်း ပြည်သူအများ မသေသင့်ပဲ သေဆုံးခဲ့ရတယ်လို့ နိုင်ငံတကာက ဝေဖန်ခဲ့ကြပါတယ်။