ရေးမြို့က မွန်ပြည်သစ်ပါတီ ဆက်ဆံရေးရုံးကို တပ်နဲ့ ရဲတပ်ဖွဲ့ ဝင်ရောက်စစ်ဆေး

ဒီနေ့မနက် ၁၁နာရီက ရေးမြို့အခြေစိုက် ခမရ ၅၈၇ က ဒုတိယဗိုလ်မှူးကြီးအဆင့်ရှိသူအပါအဝင် အင်အား ၂၃ ဦးနဲ့ ရဲတပ်ဖွဲ့ဝင် ၄ ဦးက ဆက်ဆံရေးရုံးကို လက်နက်ရှိ မရှိ ဝင်ရောက်စစ်ဆေးခဲ့တာဖြစ်ပါတယ်။

စစ်ဆေးရာမှာလက်နက်မတွေ့ဘဲ အရင်ငြိမ်းချမ်းရေးလက်မှတ်ရေးထိုးစဉ်ကတည်းက အသုံးပြုနေတဲ့ ဆက်သွယ်ရေး စက်တစ်လုံးကို သိမ်းဆည်းသွားတာဖြစ်ပါတယ်။

မနေ့ကလည်း ဘုရားသုံးဆူ - သံဖြူဇရပ် ကားလမ်းမပေါ်မှာရှိတဲ့ ဘုရားသုံးဆူ မြို့အထွက်နားက မွန်ပြည်သစ်ပါတီရဲ့ အကောက်ခွန်ဂိတ်နှစ်ခုဖြစ်တဲ့ ဘုရားတောင်ဂိတ်စခန်းနဲ့ သံဖြူဇရပ်မြို့ အဝင်မှာရှိတဲ့ ဇီးနှစ်ပင်ဂိတ်စခန်းတို့ကို အစိုးရတပ်မတော်က ဖယ်ရှားခိုင်းတဲ့အတွက် ဖယ်ရှားပေးလိုက်ရတယ်လို့ သိရပါတယ်။

ဒီနေ့မှာ အစိုးရတပ်မတော်ယာဉ်တွေဟာ သံဖြူဇရပ်နဲ့ ဘုရားသုံးဆူတစ်လျောက်မှာ စစ်ရေးလှုပ်ရှားတာတွေပြု လုပ်နေပြီး စစ်ရေးတင်းမာမှုတွေ ဖြစ်နေတယ်လို့ သိရပါတယ်။