ရှေးဟောင်းကျောက်တော်တောင်ဘုရားမှာ တပ်စွဲထားတာကို တားမြစ်ပေးဖို့ မေတ္တာရပ်ခံ

သာသနိကနဲ့ ယဉ်ကျေးမှုဆိုင်ရာအဆောက်အဦးတွေရှိတဲ့နေရာမှာ တပ်စွဲထားတာ မသင့်တော်ကြောင်း ဒေသခံတွေက လျှောက်ထားလာတဲ့အတွက် အခုလိုမေတ္တာရပ်ခံလိုက်တာလို့ ကျောက်တော်မြို့နယ် သံဃမဟာနာယကအဖွဲ့ ဥက္ကဋ္ဌ ဆရာတော် ဘဒ္ဒန္တသောဘန က RFA ကို မိန့်ပါတယ်။

မနေ့က မေတ္တာရပ်ခံစာထဲမှာ ပြည်နယ်၊ မြို့နယ် သံဃမဟာနာယကအဖွဲ့ ဥက္ကဌ ဆရာတော်တွေအပါအဝင် သံဃာတော်အပါး ၂၀ ကျော်က လက်မှတ်ရေးထိုးထားပါတယ်။

အဲဒီမေတ္တာရပ်ခံစာကို ရခိုင်ပြည်နယ်ဝန်ကြီးချုပ် ဦးညီပုထံ မနေ့က ပေးအပ်ရာမှာ အစည်းအဝေးရှိနေလို့ဆိုပြီး တွေ့ခွင့်မရခဲ့ဘူးလို့ ဆရာတော်တွေက မိန့်ပါတယ်။

ကျောက်တော်တောင်မှာ အစိုးရတပ်က ပြီးခဲ့တဲ့ တစ်ပတ်လောက်ကစပြီး တပ်စွဲထားတာကြောင့် ဒေသခံတွေဟာ ဘုရားကိုမသွားရဲဘဲ ဖြစ်နေကြတယ်လို့လည်း မြို့ခံတွေကပြောပါတယ်။

အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီးဝင်းဇော်ဦးကတော့ အဲဒီမေတ္တာရပ်ခံစာကို သူ့အနေနဲ့ လက်ခံရရှိခြင်းမရှိသေးသလို အဲဒီနေရာမှာ တပ်စွဲထားခြင်းရှိ၊ မရှိဆိုတာကို သူ့အနေနဲ့ ဂဃနဏ မသိရှိသေးဘူးလို့ RFA ကိုပြောပါတယ်။

ဒီသတင်းကို RFA သတင်းထောက် ကိုမင်းသိန်းအောင် ပေးပို့တာပါ။