ဖမ်းဆီးခံ သတင်းသမားတွေလွှတ်ပေးရေး AI နှိုးဆော်

မြန်မာနိုင်ငံမှာ ဖမ်းဆီးထောင်ချခံထားရတဲ့ သတင်းသမား ၅ ယောက် ပြန်လည်လွှတ်မြောက်ရေး အတွက် နိုင်ငံတကာ သတင်းလွတ်လပ်ခွင့်နေ့ဖြစ် တဲ့ မေလ ၃ ရက်နေ့မှာ တောင်းဆိုလှုပ်ရှားကြဖို့ AI ခေါ် နိုင်ငံတကာလွတ် ငြိမ်းချမ်းသာခွင့်အဖွဲ့က တိုက်တွန်းလိုက်ပါတယ်။

ပခုက္ကူအကျဉ်းထောင်မှာ ထောင်ဒဏ် ၇ နှစ် ချမှတ်ခံထားရတဲ့ ယူနတီဂျာနယ်က အယ်ဒီတာချုပ် ဦးတင့်ဆန်းနဲ့ သတင်းထောက်တွေဖြစ်ကြတဲ့ ဦးလူမော်နိုင်၊ ဦးရာဇာဦး၊ ဦးပိုင်သက်ကျော်နဲ့ ဦးစည်သူစိုးတို့ကို ပြန်လွှတ်ဖို့ တောင်းဆိုတဲ့ လှုပ်ရှားမှုဆောင်ရွက်ကြဖို့ AI အဖွဲ့ရဲ့ မြန်မာနိုင်ငံ ဆိုင်ရာအဖွဲ့  Amnesty’s Myanmar Team က တိုက်တွန်းလွှာထုတ်ပြန်ခဲ့တာပါ။

အဲဒီ ယူနတီဂျာနယ်က သတင်းသမားတွေဟာ မကွေးတိုင်းအတွင်းက လျှို့ဝှက်ဓါတုလက်နက်စက်ရုံ တည်ဆောက်နေတယ်လို့ ယူဆရတယ်ဆိုတဲ့သတင်း ဖေါ်ပြမှုနဲ့ တရားစွဲထောင်ချခံခဲ့ရတာဖြစ်ပါတယ်။

သတင်းအလုပ်ဟာ ရာဇဝတ်မှုမဟုတ်တာကြောင့် ယူနတီသတင်းသမားတွေ ပြန်လွတ်ရေးလှုပ်ရှားမှုအနေ နဲ နိုင်ငံတကာ သတင်းလွတ်လပ်ခွင့်နေ့ဖြစ်တဲ့ မေလ ၃ ရက်နေ့မှာ သမ္မတရဲ့ ပြောခွင့်ရပုဂ္ဂိုလ်၊ ပြန်ကြားရေးဝန်ကြီး ဦးရဲထွဋ်ရဲ့ Facebook မှာ သတင်းသမားတွေ ပြန်လွတ်ရေးတောင်းဆိုချက်တွေ ဝိုင်းဝန်းပေးပို့ကြဖို့ တိုက်တွန်းထားပါတယ်။