ဦးဝင်းချိုနဲ့ လယ်သမား ၅ ဦးကို ထောင်ဒဏ် ၆ လစီ ချမှတ်

ပဲခူးမြို့နယ် တရားရုံးက လယ်သမားအရေးဆောင်ရွက်သူ ဦးဝင်းချိုနဲ့ လယ်သမား ၅ ယောက်ကို ဆူပူအောင် လှုံ့ဆော်မှု ပုဒ်မ ၅၀၅ (ခ) နဲ့ ထောင်ဒဏ် ၆ လ ၊ တရားမဝင် စီတန်းလှည့်လည်မှု ပုဒ်မ- ၁၈ နဲ့ ငွေဒဏ် ၁ သောင်းစီပေးဆောင်ဖို့ ဒီနေ့ အမိန့်ချမှတ်လိုက်ပါတယ်။

ပုဒ်မ ၁၈ အတွက် ငွေဒဏ်တစ်သောင်းကို ပေးဆောင် လိုက်ကြပြီး ထောင်ဒဏ် ၆ လမှာ ၃ လက အကျဉ်းထောင်ထဲမှာ ၃ လ နေထိုင်ပြီး ဖြစ်တာကြောင့် ၃ လသာ ပြစ်ဒဏ်ကျခံရတော့မှာ ဖြစ်တယ်လို့ ဦးဝင်းချို အမှုကို လိုက်ပါဆောင်ရွက်ပေးနေတဲ့ ရှေ့နေ ဦးရောဘတ်ဆန်းအောင်က ပြောပါတယ်။

“၅ဝ၅(ခ)နဲ့ကတော့ ၆ လပေါ့နော်၊ ပုဒ်မ ၁၈ နှစ်ခုအတွက်ကတော့ ဒဏ်ငွေ ၁ သောင်းပေါ့နော်၊ ၆ လဆို သူတို့ချုပ်ရက်က ၃ လရှိတော့ ၃ လပဲကျန်တယ်၊ ရန်ကုန်ရုံးတွေထက်စာရင် အများကြီးသက်ညှာတဲ့ ဆုံးဖြတ်ချက်ဖြစ်တဲ့အတွက် ကျနော်တို့က တရားရုံးရဲ့အမိန့်ကို အယူခံဖို့လုံးဝမရှိပါဘူး”

ဦးဝင်းချို နဲ့ လယ်သမား ၅ ယောက်ဟာ ပြီးခဲ့တဲ့ သြဂုတ်လတုန်းက ပဲခူးမြို့အနီးက စက်မှုဇုန်စီမံကိန်း၊ ဟံသာဝတီ အပြည်ပြည်ဆိုင်ရာစီမံကိန်း စတာတွေကို ဆန္ဒပြရာမှာ ဦးဆောင်ပါဝင်ခဲ့သူတွေ ဖြစ်ပါတယ်။ ၁၉၉၅ ခုနှစ်လောက်က ပဲခူးမြို့အနီးက လယ်သမား ၅၀၀ ကျော် ပိုင်ဆိုင်တဲ့ ဧကသောင်းနဲ့ ချီတဲ့ လယ်မြေတွေကို လျော်ကြေးမပေးဘဲ အစိုးရဌာနတော်တော်များများက သိမ်းယူခဲ့တယ်လို့ သိရပါတယ်။