ခွဲမထွက်ရအချက် ညှိနှိုင်းမရ

နိုင်ငံတော်ရဲ့ နယ်မြေအပိုင်းအခြားဟူသမျှ နိုင်ငံတော်မှ မည်သည့်အခါမျှ ခွဲမထွက်ရဆိုတဲ့ အချက်နဲ့ ပတ်သက်ပြီး တိုင်းရင်းသားလက်နက်ကိုင် အဖွဲ့အစည်းတွေနဲ့ ဆွေးနွေးညှိနှိုင်းလို့ မရတဲ့အတွက် အဲဒီအချက်ကို အခုကျင်းပနေ တဲ့ ပြည်ထောင်စု ငြိမ်းချမ်းရေးညီလာခံမှာ တင်သွင်းနိုင်တော့မှာ မဟုတ်ဘူးလို့ နိုင်ငံတော် အတိုင်ပင်ခံရုံး ညွှန်ကြားရေးမှူးချုပ် ဦးဇော်ဌေး က ပြောပါတယ်။

ခွဲမထွက်ရဆိုတဲ့အချက်ကို တိုင်းရင်သားလက်နက်ကိုင် အဖွဲ့အစည်းတွေဘက်က လက်ရှိအချိန်မှာ မထည့်သွင်းစေချင်တာကြောင့် သဘောတူညီမှု မရခဲ့တာဖြစ်တယ်လို့ ဦးဇော်ဌေး က ပြောပါတယ်။

"ခွဲထွက်ခွင့်ကိစ္စနဲ့ပတ်သက်လို့ ကျနော်တို့ နှစ်ဖက်အပြန်အလှန် ဆွေးနွေးကြတယ်၊ ဆွေးနွေးကြတဲ့ အခါမှာ တိုင်းရင်းသားလက်နက်ကိုင် အဖွဲ့အစည်းများဘက်က ဒီခွဲထွက်ခွင့် ကတိကဝတ်နဲ့ပတ်သက်လို့ ဒါကိုသူတို့က ဒီအချိန်မှာ မထည့်စေချင်ဘူး၊ အဲဒီတော့ ကျနော်တို့ ဒီချပြီးတော့ ဖက်ဒရယ်မူကို ဆွေးနွေး ခဲ့ရတိုင်း ခွဲမထွက်ဘူးဆိုတဲ့ဟာကို ကျနော်တို့က ယူပါတယ်၊ ယူပြီးတော့ တဘက်ကလည်း ပြည်နယ်တွေ ရဲ့ ကိုယ်ပိုင်ပြဌာန်းခွင့်၊ ကိုယ်ပိုင်ဖွဲ့စည်းပုံ အခြေခံဥပဒေပေါ့နော်၊ တန်းတူရည် ကိုယ်ပိုင်ပြဌာန်းခွင့် ဒါကို ကျနော်တို့က ချိန်ထားတာပါ၊ ဆွေးနွေးတဲ့အခါမှာ ခွဲမထွက်ရဆိုတဲ့ ဒီအချက်ကို သဘောတူမှ ဗဟိုအချက်တွေကလာမှာဖြစ်ပါတယ်၊ အဲဒီအချက်မှာတင် ကျနော်တို့က သဘောတူညီမှု မရပါဘူး၊ မရတဲ့အတွက် ကျန်တဲ့အချက်တွေလည်း ကျနော်တို့ ဒီညီလာခံမှာပေါ့နော် စိတ်မကောင်းစွာပဲ ချန်ခဲ့ရပါတယ်"