རྒྱ་ནག་གིས་བཀག་ཉར་འོག་གི་ཁྲིམས་རྩོད་པ་ཚོ་གློད་དགོས།

དེ་ཡང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་སྤྱི་ཁྱབ་འགན་འཛིན་སྐུ་ཞབས་ (Zeid Ra'ad al-Hussein)མཆོག་གིས། རྒྱ་ནག་གཞུང་གིས་ཟླ་བ་སྔོན་མའི་ནང་འཛིན་བཟུང་བྱས་པ་ཐེ་བའི་སྔ་ལོ་ཕྱི་ཟླ་༧པ་ནས་ད་བར་དོ་དམ་བཀར་ཉར་འོག་ཏུ་བཞག་ཡོད་པའི་འགྲོ་བ་མིའི་ཐོབ་ཐང་ཁྲིམས་རྩོད་པ་ཚང་མ་གློད་གྲོལ་གཏོང་དགོས། གང་ལགས་ཞེ་ན། དོ་དམ་བྱས་བསྡད་ཡོད་པའི་ཁྲིམས་རྩོད་པ་དེ་ཚོའི་ལས་འགུལ་ཐོག་ལ་ཁྲིམས་ཞིབ་བྱེད་པ་དང་། ཉེས་ཆད་བཀལ་བ་ནི་ནོར་འཁྲུལ་ཅན་དང་ཁྲིམས་མཐུན་མ་རེད་ཅེས་གསུངས་འདུག
མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་(Zeid Ra'ad al-Hussein)མཆོག་གིས། དེ་རིང་ཧོང་ཀོང་ནང་གི་དེབ་ཚོང་བ་མི་གྲངས་ལྔའི་གནད་དོན་ཐད་ལའང་ཐུགས་འཚབས་ཆེན་པོ་ཡོད་ཅེས་གསུང་གནང་བ་དང་སྦྲགས་རྒྱ་ནག་གཞུང་གིས་ ཁོང་ཚོའི་གནད་དོན་ཐད་ཕྱི་གསལ་ནང་གསལ་ཅན་དང་། དྲང་བདེན་ཅན་གྱི་ཐག་གཅོད་གནང་དགོས་པའི་སྐུལ་འདེད་གནང་ཡོད་པ་རེད།
ཁོང་གིས་མུ་མཐུད་དུ། རྒྱ་ནག་གཞུང་གིས་གཞུང་འབྲེལ་མིན་པའི་སྒྲིག་འཛུགས་ཁག་གི་སྨྲ་བརྗོད་དང་། འདུ་འཛོམས་རང་དབང་གི་ཐོག་ལ་སྟངས་འཛིན་བྱ་རྒྱུའི་ཁྲིམས་གཞིའི་ཟིན་བྲིས་ཐོག་ལའང་ཚད་མཐོའི་བློ་འཚབ་ཡོད་ལ་དེ་ཡིས་ཞི་བའི་མི་མང་གི་སྤྱི་ཚོགས་ཀྱི་ལས་དོན་ཐོག་ལ་ཤུགས་རྐྱེན་ཐེབས་ཉེན་ཡོད་པའི་དགོིངས་ཚུལ་གསལ་བཤད་གནང་ཡོད་པ་རེད།

གསར་འགོད་པ་འབེན་པ་སྟོབས་རྒྱལ།