སྲིད་སྐྱོང་མཆོག་གིས་བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་༢༠༡༤ཞེས་པ་ལག་བསྟར་ཡོང་བའི་འབོད་བསྐུལ་ཞུས་ཡོད་པ།

སྤྱི་ལོ་༢༠༢༡ཟླ་༡༢པའི་ཚེས་༣ཉིན། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་དང་ལྡེ་ར་ལྡུན་དང་ཧལ་པར་པུར་ས་གནས་འགོ་འཛིན་བཅས་ཨུཏྟརཱ་ཁནྜ་མངའ་སྡེའི་སྤྱི་ཁྱབ་དྲུང་ཆེ་གཞོན་པ་སྐུ་ཞབས་ཨ་ནྣཏ་ཝར་ངྷན་མཆོག་དང་མཇལ་འཕྲད་ཀྱིས། རྒྱ་གར་གཞུང་དང་ལྷག་པར་དུ་མངའ་སྡེ་གཞུང་གིས་ས་གནས་བོད་པ་རྣམས་ལ་སྡོད་གནས་སོགས་ཀྱི་མཐུན་རྐྱེན་སྦྱོར་སྤྲོད་གནང་བར་ཐུགས་རྗེ་ཆེ་ཞེས་དང་། ད་དུང་ས་གནས་བོད་མི་རྣམས་ལ་བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་༢༠༡༤ཞེས་པའི་སྲིད་བྱུས་ལག་བསྟར་གྱིས་དེའི་དགོངས་དོན་ལྟར་མཐུན་རྐྱེན་གནང་རོགས་ཞེས་སྙན་གསེང་ཞུས་ཡོད་པའི་སྐོར་ལ་ལྡེ་ར་ལྡུན་ས་གནས་འགོ་འཛིན་དོན་གྲུབ་རྒྱལ་པོ་ལགས་ནས་འགྲེལ་བརྗོད་གནང་བྱུང་།
སྲིད་སྐྱོང་མཆོག་གིས་མངའ་སྡེའི་སྤྱི་ཁྱབ་དྲུང་ཆེ་གཞོན་པ་མཆོག་དང་མཇལ་འཕྲད་ཀྱིས་སྙན་གསེང་ཞུས་བའི་སྐབས་མངའ་སྡེའི་སྤྱི་ཁྱབ་དྲུང་ཆེ་གཞོན་པ་མཆོག་གིས་རིང་མིན་བོད་པའི་ས་གནས་འགོ་འཛིན་དང་ལྷན་དུ་ཚོགས་འདུ་བསྐོང་སྟེ་ཐག་ཆོད་བྱ་རྒྱུ་ཡིན་པ་ལན་འདེབས་གནང་ཡོད་འདུག
རྩ་བའི་བོད་མིའི་སྒྲིག་འཛུགས་ཀྱིས་ངོས་ནས་བོད་མི་གནས་སྡོད་ས་གནས་ཚང་མའི་ནང་སྲིད་བྱུས་ལག་བསྟར་ཡོང་བའི་འབད་བརྩོན་བྱེད་མུས་ལ་ཀར་ནཱ་ཊཱ་ཀཱ་མངའ་སྡེའི་ནང་སྲིད་བྱུས་དེ་ལག་བསྟར་བྱེད་ཐུབ་ཡོད་པ་ལས། གཞན་ཨུ་ཏར་ཁནྜ་གཙོས་མངའ་སྡེ་ཚང་མའི་ནང་སྲིད་བྱུས་དེ་ད་བར་ལག་བསྟར་བྱེད་ཐུབ་མེད་པ་རེད་འདུག སྲིད་བྱུས་དེ་ལག་བསྟར་བྱ་ཐུབ་པ་ཡིན་ན་བོད་པའི་གཞིས་སྒར་ཁག་ཏུ་ལམ་དང་། ཆུ་དང་གློག་སོགས་ཀྱི་མཐུན་རྐྱེན་མང་པོ་ཞིག་རག་གི་ཡོད་པ་རེད།
ཐེངས་འདིར་སྲིད་སྐྱོང་མཆོག་ལྡེ་ར་ལྡུན་ཁུལ་དུ་ཕྱོགས་ཕེབས་ཀྱི་མཛད་རིམ་ནང་། ཨུ་ཏར་ཁནྜ་མངའ་སྡེའི་སྤྱི་ཁྱབ་བློན་ཆེན་མཆོག་དང་མཇལ་འཕྲད་བྱེད་རྒྱུའི་དུས་ཚད་བཟོས་ཡོད་ཀྱང་རྒྱ་གར་གྱི་སྲིད་བློན་མོ་དྷི་མཆོག་འདི་ཕྱོགས་སུ་ཕེབས་པའི་སྐབས་དང་འཁེལ་ནས་མངའ་སྡེའི་སྤྱི་ཁྱབ་བློན་ཆེན་ལ་ཐུགས་འཕྲད་བྱེད་ཐུབ་མེད་པ་རེད་འདུག
གསར་འགོད་པ། བློ་བཟང་།
རྩོམ་སྒྲིག་པ། རྡོ་རྗེ་དགྲ་འདུལ།
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། རྟ་མགྲིན་དབང་ཕྱུག