ཧོང་ཀོང་ནང་ཆབ་སྲིད་བཅོས་བསྒྱུར་གྱི་རྩོད་གཞིའི་སྐོར།

༄༅༎དེ་རིང་ཧོང་ཀོང་གྲོས་ཚོགས་ཀྱི་འཐུས་མི་ཚོས་རྒྱ་ནག་གི་མངའ་ཁུལ་ཧོང་ཀོང་ནང་ཆབ་སྲིད་བཅོས་སྒྱུར་ཐོག་ཚོད་འཛིན་བྱ་རྒྱུའི་རྩོད་གཞི་ཅན་གྱི་འཆར་གཞིའི་སྐོར་གྲོས་མོལ་གནང་བཞིན་པའི་སྐབས་དེར་མི་དམངས་བརྒྱ་ཕྲག་འགའ་ཤས་ཀྱིས་ངོ་རྒོལ་སྐད་འབོད་ཤུགས་ཆེ་རྒྱབ་འདུག

ཧོང་ཀོང་གི་འཛིན་སྐྱོང་ཐད་མང་ཚོགས་ལ་དབང་ཆ་ཆེ་བ་ཐོབ་རྒྱུའི་འཆར་གཞི་ལག་བསྟར་གནང་མིན་ཐད་གྲོས་ཚོགས་ནང་འཐུས་མི་ཕན་ཚུན་དབར་བདུན་ཕྲག་འགའ་ཤས་རིང་རྩོད་གླེང་གནང་ཡོད་པ་དང་ དེ་རིང་ཧོང་ཀོང་གྲོས་ཚོགས་ཀྱི་ཕྱི་ལ་ངོ་རྒོལ་གནང་མཁན་དམངས་གཙོ་དོན་གཉེར་ཅན་དང་རྒྱ་ནག་གཞུང་ལ་རྒྱབ་སྐྱོར་བྱེད་མཁན་དབར་འཐབ་རྩོད་འགོག་ཐབས་སུ་གྲོས་ཚོགས་ཀྱི་མཐའ་སྐོར་ཉེན་རྟོག་པས་སྲུང་ཆ་དམ་པོ་བྱེད་བཞིན་ཡོད་པ་རེད།

གོང་ཞུས་ཚོད་འཛིན་གྱི་ཆབ་སྲིད་བཅོས་སྒྱུར་གཏོང་རྒྱུའི་འཆར་གཞི་དེ་ཧོང་ཀོང་གྲོས་ཚོགས་འཐུས་མི་ཚོད་གཏན་འབེབས་གནང་སྲིད་པ་ཞིག་ཡིན་ནའང་ འཆར་གཞི་དེར་ངོ་རྒོལ་གནང་མཁན་ཚོས་འཆར་གཞི་དེ་རན་འཚམ་ཞིག་མིན་པ་དང་མི་འབོར་ས་ཡ་བདུན་གནས་སྡོད་བྱེད་སའི་ཧོང་ཀོང་ས་གནས་ལ་དམངས་གཙོའི་ཐོབ་ཐང་ཆ་ཚང་བ་ཞིག་དགོས་རྒྱུའི་དགོས་འདུན་བཏོན་བཞིན་ཡོད་པ་རེད།

དམངས་གཙོར་རྒྱབ་སྐྱོར་གནང་མཁན་ཧོང་ཀོང་གྲོས་ཚོགས་ཀྱི་འཐུས་མི་ལི་ཆཀ་ཡན་གྱིས་ ཧོང་ཀོང་གི་དཔོན་རིགས་ནས་ཆབ་སྲིད་བཅོས་སྒྱུར་གྱི་འཆར་གཞི་དེ་གཏན་འབེབས་བྱུང་བ་ཡིན་ན་ཧོང་ཀོང་གི་ལོ་རྒྱུས་ནང་གི་གལ་ཆེའི་འབྱུང་བ་ཞིག་ཆགས་རྒྱུ་ཡིན་སྐོར་གསུང་གི་ཡོད་ནའང་ ཧོང་ཀོང་མང་ཚོགས་ལ་གནད་དོན་དེའི་ཐད་གོ་བསྡུར་གནང་མི་དགོས་པ་ག་རེ་ཡིན་ནམ་ཞེས་སྐྱོན་བརྗོད་དང་སྦྲགས་ རྒྱ་ནག་གཞུང་གིས་བཀོད་ཁྱབ་འོག་ཧོང་ཀོང་ས་གནས་སྲིད་གཞུང་གིས་ཆབ་སྲིད་བཅོས་སྒྱུར་གྱི་འཆར་གཞི་དེ་གཏན་འབེབས་བྱ་རྒྱུར་བྲེལ་འཚུབ་བྱེད་བཞིན་ཡོད་སྐོར་གྲོས་ཚོགས་འཐུས་མི་ལི་ཡིས་འགྲེལ་བརྗོད་གནང་བཞག།