རྒྱ་གཞུང་གིས་་དགེ་འདུན་པ་༡༢འཛིན་བཟུང་།

༄༅།    །དེ་ཡང་རྒྱ་གར་ལྷོ་ཕྱོགས་ནས་སྐུ་ཞབས་བྱམས་པ་ཡོན་ཏན་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཚེས་ ༡༨ ཉིན་སླར་ཡང་རྫ་ཆུ་ཁ་དབོན་པོ་དགོན་པའི་དགེ་འདུན་པ་། ཀླུ་སྒྲུབ་དང་། རྒན་བློ་བཟང་སྒྲུབ་གསལ། བློ་བཟང་མཐར་ཕྱིན་བཅས་དགེ་འདུན་པ་གསུམ་འཛིན་བཟུང་བྱས་ཡོད་པ་དང་། འཛིན་བཟུང་བྱས་རྗེས་ཉེན་རྟོག་པ་བཅུ་གསུམ་གྱིས་རྒན་བློ་བཟང་སྒྲུབ་གསལ་དང་།    བློ་བཟང་མཐར་ཕྱིན་གཉིས་ཀྱི་གྲྭ་ཤག་གང་བྱུང་བསྔོག་བཤེར་གྱིས་རྩོམ་ཡིག་མང་པོ་ཞིག་བཙན་འཕྲོག་བྱས་འདུག   ཚེས་ ༡༩ ཉིན་གྱི་ཞོགས་པ་དབོན་པོ་དགོན་པའི་དྲུང་ཡིག་བསོད་བཟང་། རྒན་བསོད་ཉི་ཐག་མཆོག་དང་།    དབང་རྒྱལ་བཅས་འཛིན་བཟུང་བྱས་ཡོད་པ་དང་། ཉིན་རྒྱབ་བོད་ནང་གི་ཆུ་ཚོད་༡།༡༧ཙམ་ལ་རྒྱ་གཞུང་གིས་དགོན་པའི་དགེ་འདུན་པ་རྣམས་ཕྱོགས་གཅིག་ཏུ་འདུས་ནས། འདི་ལོའི་ཕྱི་ཟླ་ ༩ ཚེས་ ༧ ཉིན་དབོན་པོ་དགོན་དུ་བོད་ཀྱི་རྒྱལ་དར་སྒྲེང་མཁན་དང་།    བོད་རང་དབང་ཞེས་པའི་ཡི་གེ་གཏོར་མཁན་སུ་ཡིན་མིན་རྩད་གཅོད་བྱེད་ཆེད་ཡིག་གཟུགས་བརྟག་དཔྱད་བྱེད་ཀྱི་ཡིན་ཟེར་ནས། དགེ་འདུན་པ་རེ་རེ་བཞིན་བོད་ཡིག་བྲིས་བཅུགས་ཡོད་པ་རེད། གཞན་ཡང་ཚེས་ ༡༥ ཉིན་འཛིན་བཟུང་བྱས་པའི་དགེ་འདུན་པ་དེ་དག་ནི།    དགོན་པའི་སློབ་གྲྭའི་གྲྭ་པ་ལྔ་ཡིན་པ་རེད་འདུག ཁོང་ཚོའི་མཚན་གང་ཡིན་ད་དུང་ཁ་གསལ་བྱུང་མི་འདུག གོང་འཁོད་འཛིན་བཟུང་བྱས་པའི་དགེ་འདུན་པ་ཁྱོན་ ༡༢ བྱུང་ཡོད་པ་དེ་དག་ད་ལྟ་རྫ་སྟོད་ཆུས་ཐོག་ཏུ་བཀག་ཉར་བྱས་ཡོད་འདུག་ལ།  ཁོང་ཚོར་གྱོན་པ་དང་ཟ་མ་སོགས་མཁོ་སྤྲོད་དང་ཐུག་འཕྲད་བྱེད་འཇུག་གི་མེད་པར་བརྟེན། ཁོང་ཚོའི་ད་ལྟའི་གནས་སྟངས་གསལ་པོ་ཤེས་ཀྱི་མེད་པ་རེད།།