བོད་ནང་རྒྱ་ནག་མི་མང་བཅིངས་གྲོལ་དམག་གིས་མདོ་དབུས་མཐོ་སྒང་སྟེང་དམག་སྦྱོང་བྱས་ཡོད་པ།

བོད་ནང་དུ་རྒྱ་ནག་མི་མང་བཅིངས་གྲོལ་དམག་མིས་མདོ་དབུས་མཐོ་སྒང་སྟེང་རེས་གཟའ་ལྷག་པའི་ཉིན་དམག་སྦྱོང་བྱས་པའི་གནས་ཚུལ་བྱུང་ཡོད་པ་དང་། འདི་ནི་རྒྱ་ནག་གི་གནད་དོན་དབྱེ་ཞིབ་པ་ཚོས་རྒྱ་གར་དང་མཐའ་མཚམས་འཁེལ་བའི་ས་ཁུལ་སྲུང་སྐྱོབ་ཐད་གྲ་སྒྲིག་བྱེད་བཞིན་ཡོད་པ་དང་། མཐའ་མཚམས་ཀྱི་དགྲ་བོའི་སར་ནས་ས་ཆ་ཚུར་ལེན་རྒྱུའི་གྲ་སྒྲིག་ཡོད་པའི་བརྡ་ལན་མཚོན་གྱི་ཡོད་པ་འགྲེལ་བརྗོད་བྱས་འདུག
དེ་ཡང་ CCTV རྒྱ་ནག་དབུས་བརྙན་འཕྲིན་ཚན་པས་གནས་ཚུལ་འདོན་སྤེལ་ལྟར་ན། ཉིན་གྲངས་གཉིས་དང་མཚན་མོ་གཅིག་གི་དམག་སྦྱོང་གི་ལས་རིམ་དེའི་ཁྲོད་ས་ཁུངས་ནང་འཛུལ་བ་དང་། གློག་ནུས་ཀྱི་འཐབ་རྒོལ་བྱེད་ཕྱོགས། གསང་བའི་མྱུལ་ཞིབ་བྱེད་སྟངས་སོགས་སྦྱོང་བརྡར་བྱས་ཏེ་མཐའ་མཚམས་ཁུལ་དུ་འགོག་སྲུང་འཐབ་རྒོལ་གྱི་གྲ་སྒྲིག་བྱེད་ཀྱི་ཡོད་པའི་རྣམ་པ་མངོན་རྒྱུ་ཡོད་པ་ཞིག་ལ་དམག་དོན་མཁས་པ་ཚོས་ངོས་འཛིན་བྱས་ཡོད་ཅིང་། འཐབ་རྒོལ་གྱི་སྡེ་ཚན་འདིའི་ནང་དུ་བོད་དམག་ཁུལ་ཁང་གི་དམག་སྦྱོང་ཚད་མཐོ་ཡོད་པའི་དམག་མི་མང་པོ་ཡོད་པ་གསལ་བོར་བསྟན་པ་དང་། བརྙན་འཕྲིན་ཕྱི་བསྒྲགས་བྱས་པའི་ནང་དུ་དྲིལ་བསྒྲགས་ཀྱི་གསལ་བཤད་མེད་པའི་ཐོག་དམག་འཐབ་གཙོ་བཟུང་གི་རྣམ་པ་བསྟན་པ་ནི། རྒྱ་གར་ལ་བརྡ་ལན་ཤུགས་དྲག་ཅིག་ཡིན་པ་མེ་ཁའོ་ནང་གནས་བཞུགས་དམག་དོན་ཉམས་ཞིབ་པ་ Antony Wong གྱིས་ལྷོ་རྒྱ་ནག་སྔ་དྲོའི་གསར་ཁང་ལ་འགྲེལ་བརྗོད་བྱས་ཡོད་པ་རེད།
དམག་སྦྱོང་འདིའི་ནང་དུ་བཅིངས་གྲོལ་དམག་གི་མེ་འགྱོགས་རུ་ཁག་དང་། ས་དམག་རུ་ཁག མཁའ་དམག་རུ་ཁག་སོགས་ཀྱིས་དམག་སྦྱོང་བྱེད་ཡོད་པ་རེད།
དམག་སྦྱོང་འདི་ནི་རྒྱ་གར་དམག་མི་དང་རྒྱ་ནག་དམག་མིའི་དབར་འཕགས་བོད་ས་མཚམས་ལ་དྭགས་ཀྱི་གྷལ་ཝན་ཡུལ་གཤོངས་སུ་གདོང་ཐུག་བྱུང་ནས་རྒྱ་གར་ཕྱོགས་ནས་དམག་དོན་གྱི་ཐབས་བྱུས་གྲ་སྒྲིག་གང་ལེགས་ཡོད་པ་མངོན་གསལ་བྱུང་ནས་ལོ་གཅིག་ལྷག་ཙམ་གྱི་དུས་ཡུན་རྗེས་སུ་རྒྱ་ནག་ཕྱོགས་ནས་བོད་ནང་དུ་དམག་སྦྱོང་བྱེད་པ་དང་། བོད་ནང་དུ་ས་མཐོའི་རི་རྩེར་དམག་འཐབ་བྱེད་པའི་ནུས་པ་ཡོད་མཁན་གྱི་བོད་མི་གཞོན་སྐྱེས་དམག་མིའི་ཁོངས་སུ་བསྡུ་རུབ་བྱེད་ཀྱི་ཡོད་པའི་གནས་ཚུལ་སྔ་རྗེས་ཐོན་ཡོད་པ་རེད།།
གསར་འགོད་པ། བཀྲིས་དབང་ཕྱུག
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། རྟ་མགྲིན་དབང་ཕྱུག