ນອກຈາກນີ້ ຍັງມີການສະແດງ ສິນລະປະວັດທະນະທັມ. ເຈົ້າໜ້າທີ່ ຈາກຜແນກ ການຄ້າ ແລະ ອຸດສາຫະກັມ ໃຫ້ລາຍລະອຽດວ່າ:
“ປີນີ້ ເນື່ອງໃນໂອກາດ ງານນະມັດສະການ ພຣະທາດ ອິງຮັງ ແລ້ວມັນມີ ຂໍ້ຕົກລົງກັນ ລະຫວ່າງກະຊວງ ອຸດສາຫະກັມ ການຄ້າລາວ ແລະ ກະຊວງພານິດ ແຫ່ງ ຣາຊອານາຈັກໄທ ສະນັ້ນ ຈຶ່ງໄດ້ເປີດງານ ຕລາດນັດຂື້ນ ເມື່ອວັນທີ 8 ຫາ ວັນທີ 13.”
ບຸນພຣະທາດ ອິງຮັງ ເປັນບຸນ ປະຈໍາປີ ເພື່ອໃຫ້ ຊາວລາວ ແລະ ຕ່າງປະເທດ ໄດ້ກາບໄຫວ້ ບູຊາ ສິ່ງສັກສິດ ຄູ່ບ້ານຄູ່ເມືອງ ຊຶ່ງແຕ່ລະປີ ຈະມີ ນັກທ່ອງທ່ຽວ ເຂົ້າມາຮ່ວມ ເປັນຈໍານວນຫລວງຫລາຍ ເພາະຖືວ່າ ເປັນບຸນສໍາຄັນ ຂອງ ແຂວງ ສວັນນະເຂດ.”
ສໍາລັບປີນີ້ ຫ້ອງການທ່ອງທ່ຽວ ແຂວງສວັນນະເຂດ ກໍໄດ້ສະແດງ ສິນຄ້າ ປະເພດ ຫັດຖະກັມ ແລະ ປະເທດໄທ ກໍມີສິນຄ້າ ຢ່າງຫລວງຫລາຍມາ ສະແດງ ແລະ ວາງຂາຍ ໃຫ້ນັກທ່ອງທ່ຽວ ທີ່ສົນໃຈ ດັ່ງ ເຈົ້າໜ້າທີ່ ໄດ້ເວົ້າອີກວ່າ:
“ໃສ່ຊື່ບຸນນີ້ ວ່າ ອິນໂດຈີນໄທ ເພາະວ່າ ມີ ສິນຄ້າ ອິນໂດຈີນໄທ ກໍມີ ແຕ່ການສະແດງ ສິນຄ້າ ສິນລະປະ ວັນນະຄະດີ ກໍມີ ວົງໂປງລາງ ຂອງ ອຸບົນຣາຊະທານີ ມາສົມທົບ ແລ້ວກໍມີ ໝໍລໍາ ພຣະຍາ ຈາກມຸກດາຫານ ຈໍານວນນຶ່ງ.”
ພຣະທາດອິງຮັງ ເປັນ ສິນລະປະ ແລະ ເປັນ ສະຖາປັດສະຍະກັມ ຫລື ມີ Architect ທີ່ສວຍງາມ ທັງເປັນ ປູຊະນີຍະສະຖານ ທີ່ສໍາຄັນ ແຫ່ງນຶ່ງ ຢູ່ ສປປລາວ ຕັ້ງຢູ່ ແຂວງສວັນນະເຂດ ທາງພາກໃຕ້ ຂອງລາວ ແລະ ປະມານ 15 ກິໂລແມັດ ລະຫວ່າງ ເສັ້ນທາງ ສວັນນະເຂດ-ເຊໂນ. ພຣະເຈດີນີ້ ເປັນສິນລະປະ ສມັຍລ້ານຊ້າງ.