ຊ່ວງເຮືອ ສວັນນະເຂດ-ມຸກດາຫານ
2008.10.15
ການແຂ່ງຂັນ ຊ່ວງເຮືອ ສວັນນະເຂດ-ມຸກດາຫານ
ແຂວງສວັນນະເຂດ ໄດ້ຈັດງານ ເທສການ ບຸນອອກພັນສາ ເລີ້ມແຕ່ວັນທີ 12 ເປັນຕົ້ນມາ ແຕ່ໃນວັນທີ 14-15 ແມ່ນການແຂ່ງຂັນ ເຮືອຊ່ວງ ຕາມປະເພນີ ເປັນປະຈຳ ໃນແຕ່ລະປີ, ໃນມື້ນີ້ ແມ່ນຮອບ ຊີງ ຊະນະເລີດ ໃນການແຂ່ງຂັນ ຊື່ງມີເຮືອ ຊ່ວງຈາກຝັ່ງໄທ ມາຮ່ວມແຂ່ງຂັນ ນຳດ້ວຍ.
ທ່ານ ເຊົາ ສີສຸກ ເຈົ້າຫນ້າທີ່ ຈາກຫ້ອງການ ການທ່ອງທ່ຽວ ແຂວງສວັນນະເຂດ ເວົ້າວ່າ:
“ເປັນມື້ຄ່ຳນື່ງ ຫລື ມື້ວັນທີ 15 ເນີ້ ແລ້ວຈະມີຂະບວນແຫ່ ເພາະແຂ່ງເຮືອ ຈະມີສວັນ ກັບ ມຸກດາຫານ ປະມານ 30 ກວ່າລຳ ຊີງຊະນະເລີດ ຕອນນີ້ ກຳລັງຊີງກັນຢູ່”
ທ່ານ ໄດ້ອະທິບາຍ ເພີ້ມອີກວ່າ ໃນຕອນເຊົ້າ ຈະມີການຟອ້ນລຳ ຢ່າງສວຍງາມ ຈາກພາກສ່ວນ ຕ່າງໆຂອງແຂວງ, ເຮືອທີ່ເຂົ້າແຂ່ງຂັນ ໃນປີນີ້ ມີຢູ່ 30 ລຳ ຈາກຫົວເມືອງຕ່າງໆ ຂອງແຂວງສວັນນະເຂດແລະ ຈາກຝັ່ງໄທ. ສຳລັບ ລາງວັນນັ້ນ ຈະປະກອບດ້ວຍ ເງີນສົດ ລາງວັນກຽດຕິຍົດ ແລະ ລາງວັນຊະນະເລີດ ຫລາຍກ່ວາ ປີທີ່ຜ່ານມາ ເພາະມີຫລາຍອົງການ ບໍຣິຈາກ ເງີນຊ່ອຍເຫລືອ ໃນປີນີ້.
“ໃນງົປະມານ ບອກໄດ້ເລີຍວ່າ ມີຫລາຍລ້ານກີບ ເນື່ອງຈາກວ່າ ຕ້ອງເປັນ ລາງວັນ ຂອງຂວັນ ໃຫ້ຝີພາຍ ເພາະ ແຕ່ລະ ຕອ້ງຍົກຂື້ນ ຕາມອັຕຣາຂື້ນ ຂອງຄ່າຄອງຊີບ.”
ແຂວງສວັນນະເຂດ ແລະ ແຂວງມຸກດາຫານ ໄດ້ຈັດ ງານເທສການ ອອກພັນສາ ຊ່ວງເຮືອ ຮ່ວມກັນມາ ແຕ່ປີ 1988 ເພື່ອສ້າງຄວາມສຳພັນ ອັນດີງາມ ຣະຫວ່າງ ປະຊາຊົນ ຂອງສອງປະເທດ.