ເຂື່ອນຈະບໍ່ໄດ້ກໍາໄຣ ຕາມກະໄວ້

ບົດລາຍງານ ຜົລວິຈັຍ ຂອງ ມະຫາວິທຍາລັຍ ແມ່ຟ້າຫລວງ ຂອງໄທ ແລະ ມະຫາວິທຍາລັຍ ປອດແລນ ສະເຕຕ ຂອງ ສະຫະຣັຖ ຊີ້ໃຫ້ເຫັນວ່າ ຜົລກຳໄຣ ທີ່ ສປປລາວ ຈະໄດ້ຈາກ ໂຄງການ ສ້າງເຂື່ອນ 11 ແຫ່ງ ຕາມລຳ ແມ່ນ້ຳຂອງ ນັ້ນ ຖ້າຫັກ ຈາກ ຄ່າເສັຽຫາຍ ຈາກ ຜົລກະທົບ ຕ່າງໆແລ້ວ ອາດຈະໄດ້ ກຳໄຣ ຫນ້ອຍກວ່າ ທີ່ຄາດໄວ້. ນັກວິຊາການ ລາວຜູ້ນື່ງ ເວົ້າວ່າ:

"ແຮ່ງມີເຂື່ອນ ຫລາຍແຮ່ງພາໃຫ້ ຜົລກະທົບ ຫລາຍ ຕົວຢ່າງ ວ່າເຮັດ 6 ເຂື່ອນ ນີ້ມັນກໍຈະມີ ລາຍຮັບສູສີ ກັນກັບການ ຄາດໃວ້ ແຕ່ສົມມຸດ ເຮັດ 11 ເຂື່ອນ ແລ້ວລາຍຮັບ ຊີ່ຫລຸດລົງຫລາຍ  ເພາະວ່າມັນມີ ຜົລກະທົບ ຫລາຍທີ່ວ່າ ຕ້ອງໄດ້ ໄປທົດແທນ ທີ່ວ່າຈະຕ້ອງ ໄປຈ່າຍ ກັບສີ່ງທີ່ຕ້ອງ ສູນເສັຽໄປ".

ບົດຣາຍງານ ຈາກແຜນພັທນາ ຊັພຍາກອນນ້ຳ ໃນເຂດລຸ່ມ ແມ່ນ້ຳຂອງ ທີ່ໄດ້ເປີດເຜີຍ ໃນປີ 2011 ຍັງຊີ້ໃຫ້ ເຫັນອີກວ່າ ຫາກມີການ ເອົາມູນຄ່າ ຄວາມເສັຽຫາຍ ຕໍ່ຜົລກະທົບ ຕ່າງໆ ມາລົບກັບ ຜົລກຳໄຣ ທີ່ໄດ້ຮັບ ຈາກ 11 ເຂື່ອນ ຜົນກຳໄຣ ທັງຫມົດ ທີ່ທາງການລາວ ໄດ້ຮັບ ໃນຈຳນວນ 11 ເຂື່ອນນັ້ນ ຈະຫລຸດຈາກ 33 ພັນ ລ້ານ ໂດລາ ມາເປັນ 6 ພັນ ລ້ານ ໂດລາ ຊື່ງ ໂຕເລກ ດັ່ງກ່າວ ເປັນການຄິດ ຄວາມເຊື່ອມ ສະພາບ ຂອງເຂື່ອນ ໃນຣະຍະ 10 ປີ ປີລະ 10% ແຕ່ຖ້າຫາກ ຄຳນວນດ້ວຍ ການຄິດ ຄວາມເຊື່ອມ ປີລະ 1% ແລ້ວ ໂຄງການເຂື່ອນ ດັ່ງກ່າວ ຈະຂາດທືນ ປະມານ 274 ພັນ ລ້ານ ໂດລາ ຊື່ງມູນຄ່າ ຜົລກະທົບ ເຫລົ່ານັ້ນ ນັກລົງທືນ ບໍ່ເອົາມາ ຄຳນວນໃສ່ ໃນການ ລົງທືນ ແລະ ການສ້າງ. ນັກວິຊາການ ໄທ ທ່ານນື່ງເວົ້າວ່າ:

"ຕາມຄວາມ ເປັນຈີງແລ້ວ ມັນມີຕົ້ນທືນ ທີ່ທ່ານ ບໍ່ໄດ້ຈ່າຍເອງ ບໍ່ແມ່ນຄ່າ ກໍ່ສ້າງ ແມ່ນມູນຄ່າ ທີ່ຝຸງປາ ຫາຍສາບສູນໄປ ມູນຄ່າ ຂອງ ສີ່ງແວດລ້ອມ ທີ່ຖືກ ຜົລກະທົບ ມູນຄ່າ ດັ່ງກ່າວ ກຸ່ມນັກ ລົງທືນ ບໍ່ເອົາມາໃສ່ ໃນການ ຄຳນວນ ການກໍ່ສ້າງ ໃນການຈ່າຍຄ່າ ຊົດເຊີຍ".

ນັກວິຊາການ 2 ທ່ານ ສລູບວ່າ ຣັຖບານລາວ ຊື່ງເປັນຜູ້ ມີສິດ ໃນການກໍ່ສ້າງ ເຂື່ອນ ໃສ່ນ້ຳຂອງ ນັ້ນຄວນເອົາ ຂໍ້ມູນ ຜົລກະທົບ ດັ່ງກ່າວ ມາປະກອບເຂົ້າ ໃນການ ພິຈາຣະນາ ວ່າຈະສ້າງ ຫລືບໍ.