ແຂວງຄໍາມ່ວນ ໄດ້ຮັບຜົນກະທົບ ຈາກພັຍນໍ້າຖ້ວມ ຢ່າງໜັກ
2008.08.13
ແຂວງຄໍາມ່ວນ ເປັນແຂວງນຶ່ງ ທີ່ໄດ້ຮັບ ຜົນກະທົບ ຢ່າງໜັກ ຈາກພັຍນໍ້າຖ້ວມ, ໂດຍສະເພາະ ພື້ນທີ່ປູກຝັງ ຂອງປະຊາຊົນ, ອີງຕາມ ການເປີດເຜີຍ ຂອງເຈົ້າໜ້າທີ່ ແຂວງຄໍາມ່ວນ:
“ດຽວນີ້ ຖ້ວມປະມານ 10,000 ກ່ວາເຮັກຕາ, ຖ້ວມເນື້ອທີ່ນາ ແລະ ພືດ 4 ໂຕເມືອງໃຫຍ່ ແລະ ແມ່ແມ່ນໍ້າຂອງ ເຮົານີ້ແຫລະ ທີ່ມັນລົ້ນຝັ່ງ. ທາງແຂວງເຮົາ ກໍແຕ່ງຕັ້ງ ໜ່ວຍຮັບຜິດຊອບ ເຣື້ອງນໍ້າຖ້ວມ.”
ທ່ານ ກ່າວຕື່ມວ່າ ໃນເວລານີ້ ພື້ນທີ່ ໄຮ່ນາ ຂອງຊາວບ້ານ, ໂດຍສະເພາະ ໃນເຂດເມືອງເຊບັ້ງໄຟ, ເມືອງຫີນບູນ ແລະ ທ່າແຂກ ເສັຍຫາຍ ຮວມກັນແລ້ວ ປະມານ 10,000 ເຮັກຕາຣ. ທັ້ງນີ້ ຍ້ອນວ່າ ຣະດັບນໍ້າ ສາຍສໍາຄັນຕ່າງໆ ໃນແຂວງທີ່ຍັງສູງຂຶ້ນ ຢ່າງຕໍ່ເນື່ອງ, ເປັນຕົ້ນ, ຣະດັບນໍ້າຂອງ ຊຶ່ງຫລ້າສຸດນີ້ ວັດແທກ ໄດ້ປະມານ 14 ແມັດ. ສ່ວນ ຣະດັບນໍ້າເຊບັ້ງໄຟ ວັດແທກໄດ້ ປະມານ 29.50 ແມັດ,
ເຖິງຢ່າງໃດ ກໍຕາມ, ໃນເວລານີ້, ຍັງບໍ່ທັນ ມີຣາຍງານ ບັນຫາ ນໍ້າຖ້ວມ ໃນເຂດບ້ານເຮືອນ ຂອງປະຊາຊົນ ໃນແຂວງ ແຕ່ຢ່າງໃດ, ແຕ່ທາງການກ່ຽວຂ້ອງ ພວມຕິດຕາມ ສະຖານນະການ ຜົນກະທົບ ຕ່າງໆ ຢ່າງໃກ້ຊິດ, ເພາະຣະດັບນໍ້າ ຍັງບໍ່ສາມາດ ລະບາຍອອກໄປ ໄດ້ງ່າຍໆ ຈາກພື້ນທີ່ ຖ້ວມຂັງ ໃນເວລານີ້. ເຈົ້າໜ້າທີ່ ທ່ານດຽວກັນນີ້ ກ່າວເຖິງ ການກະກຽມ ເພື່ອບັນເທົາທຸກ ແກ່ຊາວບ້ານ ອີກວ່າ:
“ດຽວນີ້ ມີແຕ່ຊຸກຍູ້ ເຣື້ອງໃຫ້ຂະເຈົ້າ ເຣື້ອງການຜລິດ ທົດແທນຄືນ ໃນເຂດທີ່ມີນໍ້າຖ້ວມ, ແຕ່ລະບ່ອນ ດຽວນີ້ ກະກຽມ ຊ່ອມແຊມ ແປງໃດສູບນໍ້າ ນັ້ນແລ້ວ.”
ໃນເວລານີ້ ທາງການທ້ອງຖິ່ນ ກໍາລັງ ຕິດຕໍ່ ຂໍການຊ່ອຍເຫລືອ ຈາກສູນກາງ ແລະ ອົງການຈັດຕັ້ງ ສາກົນຕ່າງໆ ເພື່ອໃຫ້ເຂົ້າໄປຊ່ອຍເຫລືອ ເບື້ອງຕົ້ນ ແກ່ ຊາວບ້ານ ທີ່ຖືກຜົນກະທົບ ຍ້ອນພັຍນໍ້າຖ້ວມໃນແຂວງ. ຢ່າງໃດ ກໍຕາມ, ແຂວງຄໍາມ່ວນ ແມ້ຈະເປັນແຂວງ ທີ່ອຸດົມສົມບູນ ແລະ ສາມາດ ຜລິດ ສະບຽງອາຫານ ໄດ້ຢ່າງຫລວງຫລາຍ ກໍຕາມ, ແຕ່ໃນແຕ່ລະປີ ກໍມັກ ຈະຖືກຜົນກະທົບ ຈາກພັຍນໍ້າຖ້ວມ ເປັນປະຈໍາ.