ແຂວງຈຳປາສັກເປີດສູນປິ່ນປົວ ຜູ້ຕິດເຊື້ອໂຣກເອສ

ເຈົ້າໜ້າທີ່ຂະແໜງ ຣະບາດວິທຍາ ຜແນກສາທາຣະນະສຸຂ ແຂວງຈຳປາສັກ ເວົ້າວ່າຂນະນີ້ ຢູ່ໃນຣະຫວ່າງການ ກະຕຣຽມໂຍກຍ້າຍ ຄົນປ່ວຍເປັນໂຣກເອສ ທີ່ປິ່ນປົວຢູ່ແຂວງ ສວັນນະເຂດ ມາຮັກສາຢູ່ສູນແຫ່ງນີ້. ທ່ານກ່າວວ່າ:

"ເພາະວ່າຜ່ານມາ ຄົນຈຳປາສັກກໍໄປປົວ ຢູ່ທີ່ສວັນນະເຂດ ດຽວນີ້ຈະໂອນຖ່າຍຄົນເຈັບມາ ກຳລັງປຶກສາຫາລືກັນ ຄາດວ່າ ຫລັງຈາກທີ່ວ່າ ປຶກສາຫາລືກັນແລ້ວ ກໍຖ່າຍໂອນກັນໄດ້ ພຸ້ນແຫລະ ຈັ່ງຊິສາມາດບໍຣິການໄດ້ປົກກະຕິ".

ທ່ານເວົ້າຕື່ມອີກວ່າ ສູນປິ່ນປົວຜູ້ ຕິດເຊື້ອໂຣກເອສ ຢູ່ແຂວງຈຳປາສັກ ອາດເລີ້ມໃຫ້ການ ບໍຣິການໄດ້ ພາຍໃນເດືອນທັນວາ ພາຍຫລັງທີ່ສຳເຣັດ ການໂຍກຍ້າຍຄົນເຈັບ ມາແຕ່ແຂວງ ສວັນນະເຂດ.

ສູນປິ່ນປົວແຫ່ງນີ້ ຈະຮັບຄົນປ່ວຍ ທີ່ເປັນເອສ ຢູ່ແຂວງຈຳປາສັກ ແລະຈາກແຂວງ ສາລະວັນ ເຊກອງ ແລະ ແຂວງອັຕປື. ສະເພາະແຂວງຈຳປາສັກ ມີຜູ້ຕິດເຊື້ອທີ່ໄດ້ ຮັບການຊ່ວຍເຫລືອ ດ້ວຍຢາ ARV-ຢາຕ້ານvirus ໃນຜູ້ຕິດເຊື້ອເອສ ຈາກກອງທຶນໂລກ.

ເວົ້າເຖິງຄວາມຮັບຮູ້ ຂອງປະຊາຊົນ ກ່ຽວກັບບັນຫາໂຣກເອສ ຢູ່ ສປປລາວ ໃນປັດຈຸບັນນີ້ ເຈົ້າໜ້າທີ່ຂະແໜງ ຣະບາດວິທຍາ ກ່າວວ່າG

"ເລື່ອງຄວາມຮູ້ຄວາມຫຍັງນີ້ ຖືວ່າປະຊາຊົນເຮົານີ້ ກໍຮູ້ຫລາຍເຕີບແລ້ວ ແຕ່ເຂົາຈະບໍ່ກ້າ ສາມາດເປີດຕົນ ເປີດຕົວເຂົ້າມາ ປິ່ນປົວຫັ້ນ ອັນນີ້ກໍຍັງເປັນບັນຫາ ຢູ່ຕົວນີ້ເນາະ ບາງຄົນກໍຢູ່ຫ່າງໄກ ບໍ່ມີເງິນ ເຂົາກໍໄດ້ຫລົບໄປ ບໍ່ກ້າມາແນ່ ບາງເທື່ອບໍ່ມີເງິນ ຫັ້ນໜາ".

ຈຳນວນຜູ້ຕິດເຊື້ອເອສ ທີ່ຍັງບໍ່ສາມາດ ເຂົ້າມາປິ່ນປົວຕົວ ສະເພາະ ຢູ່ແຂວງຈຳປາສັກ ທ່ານກໍວ່າ ອາດຈະມີອີກຢູ່ ປະມານ 50–60ຄົນ ຊຶ່ງອາດຈະເປັນເລື່ອງ ທີ່ຈະຕ້ອງໄດ້ ຫາທາງແກ້ໄຂຕໍ່ໄປ.