ຜົນກະທົບ ຈາກ ຊາວຈີນ ທີ່ເຂົ້າໄປ ໃນລາວ

ຕົວແທນ ປະຊາຊົນ ແຂວງຫລວງນ້ຳທາ ໄດ້ກ່າວເຖິງ ການທີ່ໃນ ສປປລາວ ປັດຈຸບັນ ມີຊາວຈີນ ມາຢູ່ອາໃສ ແລະ ປະກອບ ທຸຣະກິດ ສົ່ງຜົນໃຫ້ ປະຊາຊົນລາວ ໄດ້ຮັບ ຄວາມເດືອດຮ້ອນ ໃນທາງອ້ອມ ຊຶ່ງທ່ານ ຄຳ ວົງສາ ຕົວແທນ ປະຊາຊົນ ແຂວງຫລວງນ້ຳທາ ໃຫ້ ທັສນະວ່າ:

“ທຳລາຍ ຊີວິຕ ຄວາມເປັນຢູ່ ຂອງປະຊາຊົນ ທຳລາຍ ປ່າສງວນ ຂອງຊາຕ ປະຊາຊົນ ບ່ອນທີ່ເຂົາເຈົ້າ ທຳມາຫາກິນ ກໍ່ກາຍເປັນ ດິນສັມປະທານດິນ ກໍ່ກາຍເປັນ ສິດ ຂອງຈີນ ໄປໝົດ ໂດຍທີ່ ປະຊາຊົນ ບໍ່ພຽງພໍ ໃນການ ທຳມາຫາກິນ ໃນການເຮັດໄຮ່ ເຮັດສວນ ເຮັດນາ”

ນອກຈາກນີ້ ທ່ານຄຳ ຍັງກ່າວ ຕໍ່ໄປວ່າ ໃນດ້ານດີນັ້ນ ກໍ່ພໍມີຢູ່ ເຊັ່ນໃນເຣື້ອງ ຊາວຈີນ ຈ້າງ ແຮງງານລາວ ເຮັດໃຫ້ ປະຊາຊົນ ມີຣາຍໄດ້ ຫລາຍຂຶ້ນ ກວ່າແຕ່ກ່ອນ ແຕ່ເຖິງຢ່າງໃດກໍ່ດີ ການທີ່ ຊາວຈີນ ເຂົ້າມາຢູ່ ອາໃສນັ້ນ ໄດ້ສ້າງ ຄວາມເດືອດຮ້ອນ ໃຫ້ປະຊາຊົນລາວ ໃນຫລາຍດ້ານ.

ເຖິງວ່າ ບໍຣິສັດຈີນ ທີ່ມາລົງທຶນ ຢູ່ລາວ ສ່ວນຫລາຍ ຈະຈ້າງ ຄົນງານລາວ ແລະ ທາງບໍຣິສັດຈີນ ກໍ່ໄດ້ ເຊັນສັນຍາ ສັມປະທານ ທີ່ດິນ ໂດຍທາງຈີນ ຕ້ອງການ ຄົນລາວ ໄປອອກແຮງງານ ແຕ່ກໍມີ ບັນຫາ ເກີດຂຶ້ນ ຕາມພາຍຫລັງ ດັ່ງທ່ານ ຄຳ ອະທິບາຍ ວ່າ

“ເບື້ອງຕົ້ນ ກໍ່ປະຕິບັດ ດັ່ງນັ້ນແທ້ ຜົນສຸດທ້າຍ ກໍ່ມີບັນຫາ ກ່ຽວກັບ ວ່າ ຄົນລາວ ເຮັດບໍ່ໄດ້ ມາຕຖານ ມື້ນັ້ນ ມື້ນີ້ ເຂົາ ກໍ່ນຳເອົາ ຄົນເຂົາເຈົ້າ ເຂົ້າມາ ທີ່ລະ​ເລັກ ທີ່ລະໜ້ອຍ ກໍ່ເກີດ ເປັນຫລາຍຂຶ້ນ ຫລາຍຂຶ້ນໄປ”